Luca 20

Zezusihi pisutu'wa zô, da te isadanharĩzé wasu'u

Mateu 21.23-27; Marcu 11.27-33

1Nimahã bâtâ na te Zezusi hã nhamra, 'Re ihâimana u'âsi mono nhorõwa 'ri ãma. 'Ri 'wawi wa'ra 're, te nhamra, te te dama rowahutu da, duré iwasu'uwẽ na te te da'apo're pu'u da. Tawamhã aibâ norĩ hã ma itẽme aimasa. Ta norĩ hã sasedoti ipire norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ, duré zudeu norĩ ma roti'wa norĩ. 2Itẽme simasa wamhã, te siwi sadanha, ãne:

— E 'wa sadawa para, te bété ãne hã dama 're i'ab'manharĩ mo. E 'wa hã, aipisutu'wa. Ma'ãpé wama asiwasu'u za'ra na, wa te waihu'u za'ra da.

3Tahawa, te Zezusi hã asa tãma nharĩ za'ra, ãne:

— Wa hã wa za duré a'â asadanharĩ na ãma aima wa'rãmi za'ra wa'wa. 4E 'wa sadawa para, ma tô bété Zuwã hã â dawabzuri hã te te dama 're ab'manharĩ. E 'Re ihâimana u'âsi mono zadawa para. E dazadawa parap si. Ma'ãpé, Zuwãhã ãma asimirosa'rada hã, a'â ĩma waihu'u za'ra wa'aba.

5Tahawa, te 'râwi sima nharĩ za'ra, ãne:

— E niha, wa za tãma waihu'u za'ra ni, õne wamhã. 'Re ihâimana u'âsi mono zadawa para, â dawabzuri te te dama 're i'ab'manharĩ mono na, wa te tãma waihu'u za'ra wamhã, te za wazadanharĩ na sahu za'ra, ãne: “E niha bété, Zuwã Batistaha nhimirowasu'u hã saze za'ra wa'aba õ di, dame.” Ãté ãne, te za wama nharĩ za'ra. 6Ma tô da te 're saze za'ra Zuwã hã, 'Re ihâimana u'âsi mono zadawa 'mahârâ'wa 're imorĩ na. Tawamhã dazadawa parap si, â dawabzuri te te dama 're i'ab'manharĩ mono na, wa te tãma nharĩ za'ra wamhã, ãté te za ẽtẽ na dasiwi wa'uprosi ni.

7Tawamhã Zezusihi ma, te oto nharĩ za'ra, ãne:

— Ni'wa sadawa para, ma tô Zuwã hã â dawabzuri hã te te dama 're ab'manharĩ. Wa norĩ hã wa te waihu'u za'ra õ di, ipisutu'wa hã.

8Tahawa, te asa tãma nharĩ za'ra, Zezusi hã, ãne:

— A norĩ wa'wa hã ĩma waihu'u za'ra wa'aba õ nherẽ, wa hã te duré aima waihu'u za'ra wa'aba õ di za, ni'wa sadawa para, te dama 're i'ab'manharĩ mono na hã.

Buru 'madâ'â'wa norĩ wasu'u

Mateu 21.33-46; Marcu 12.1-12

9Tawamhã Zezusi hã te duré dama romnhimiré'é, tinhimirowasu'u na, ãne:

— Aibâ hã te 're hâimana, buru tede'wa hã. Tawamhã tiburu ãma ma tô a're, uwa 'ru hã. Tahawa, ma tô ni'wam norĩ hã sisõ'a ré pisutu za'ra, iburu hã te te sô 're 'madâ'â za'ra mono da. Uwa 'ru 'rã hã 're 'rãi prédub za'ra mono wapsi, te za iwa'rãmi te te tãma 're po'o za'ra, buru tede'wai ma hã. Taha pari, te oto mo, buru tede'wa hã darob amoi u, tamomo a'â hâimana da. Tame te a'â 're hâimana hâ. 10Tawamhã oto 'rãi prédu mono wa, ma tô buru tede'wa hã tãma iromhuri'wa hã 'mazatõ tiburu u, uwa 'ru 'rã hã buru 'madâ'â'wa norĩ te te tãma ipo'o za'ra zô. Tazahã, buru u wisi wamhã, ma tô romhuri'wa hã siwi azâ, buru 'madâ'â'wa norĩ hã. Tahawa, te ubana siwi satõ apâ, isib'apito u. 11Itẽme wisi wamhã, iwa'rãmimhã te duré sô 'mazatõ. Tazahã, buru u wisi wamhã, ma duré siwi azâ, buru 'madâ'â'wa norĩ hã. Ma tô tãma rob'manharĩ wasété za'ra. Tahawa, te duré ubana apâ siwi satõ, isib'apito u. 12Iwa'rãmi ma tô duré sô 'mazatõ, buru tede'wa hã. Si'ubdatõ oto te te isatõrĩ za'ra zé hã. Tazahã, buru u wisi wamhã, ma duré siwi azâ. Ma siwi u'a. Buru hawi, te duré siwi satõ apâ. 13Tahawa, te 'râwi sima tinha, buru tede'wa hã, ãne: “E marĩ, wa za 'manha. Ãté ĩ'ra hã wa za oto satõ, buru 'madâ'â'wa norĩ u hã, ĩma sawi pese nherẽ, ĩ'ra hã. Ĩburu u te satõrĩ wamhã, ãté te za siwi hâiba wazé.” Ãne te 'râwi sima tinha, buru tede'wa hã. Tawamhã ti'ra si'aibâ hã te oto satõ, tiburu u.

14— Tawamhã buru u oto morĩ wamhã, buru 'madâ'â'wa norĩ hã ma tô romhâ ré sima sãmri za'ra. Tahawa, te sima 'mahârâ za'ra, ãne: “Õhõta buru tede'wai 'ra hã te wei mo, timama uirĩ na buru tede'wa da hã. Oto wa te wasiwi wĩrĩ aba, buru hã wate za'ra da oto.”

15— Tawamhã buru hawi ma siwi time. Ma tô siwi tiwĩ.

— Ãne wamhã, e marĩ te za 'manha, buru tede'wa hã. 16Te za sô timorĩ za'ra, uburé te te uprosi da. Tawamhã te za duré aimawi da'maipisutu, tiburu 'madâ'â'wa da hã.

Tawamhã isimirowasu'u hã da te wapari za'ra wamhã, te nharĩ za'ra ni, ãne:

— Rowasédé hã watobro õ neza.

17Tawamhã Zezusi te da'ab'madâ'â pese. Tahawa te dama tinha, ãne:

— Ẽtẽ wasu'u na rob'ui'éré hã, ãne: “Ẽtẽ tomhâpâ wẽ 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô taré nherẽ pire na hã, 're sa'wari u'âsi.” Ãne, ẽtẽ wasu'u na rob'ui'éré, ibaihâ na hã. 18Duré, ẽtẽ tomhâpâ nhisiwi, zé'a 'manharĩ hã 're rere'e mono wa, 're isiprub za'ra mono ne, te za ĩwẽ'õ'wa norĩ hã hâ za'ra, 'Re ihâimana u'âsi mono hã. Duré ẽtẽ tomhâbâ hã zé'a 'manharĩ nhisiwi, 're rere'e mono wa, te te 're ipru pese za'ra mono ne, te za ĩwẽ'õ'wa norĩ hã hâ za'ra, sa'ẽtẽ uptabi na. Ta norĩ ãma hã 're sib'a'uwẽ za'ra mono õ di za.

Rob'uiprazé hã Roma ãma danhib'apito uptabi ma, da te tãma 're i'arĩ za'ra mono zé wasu'u

Mateu 22.15-22; Marcu 12.13-17

19Buru 'madâ'â'wa norĩ wasu'u te te dama wasu'u wamhã, ma tô sina waihu'u za'ra, dama rowahutu'wa norĩ hã. Sasedoti norĩ hã sima ipire za'ra norĩ me, ma tô sina waihu'u za'ra. Taha 'ru te, te aré sima wẽ za'ra, te te siwi âri da, Zezusi hã, awa'awi. Tane nherẽ, dama pahi za'ra wa, ma tô siwi ãma rosazâ a'â. 20Tahawa, ma tô taré a'â ãma 're sõpré. Ãne te aibâ norĩ ma tãma ãma roti za'ra:

— Zezusihi u te za ai'aba'réi wa'wa, marĩ na asiwi sadanharĩ za'ra wa'aba da, tô sena, marĩ asiwi waihu'u za'ra wa'aba dai õ nherẽ, isimirowasu'u na hã. Tawapsi te za asiwi isadanharĩ za'ra wa'wa, tinhimirowasu'u na te te ãma upa zô, te te ãma upai wa, wanhib'apito u, wa te wasiwi saprõni da, marĩ te te tãma 'manharĩ wasété da.

Tawamhã ma tô rob'uiprazém na tãma wa'âbâ za'ra, Zezusi za te te siwi isadanharĩ'wa norĩ ma. 21Itẽme simasa wamhã, te ãne siwi sadanha, aibâ norĩ hã:

— Rowahutu'wa, aimreme hã sena na, wa tô aiwaihu'u za'ra ni. Asimirowahutu zama wẽ di. Asimiroti na 're da'ab'mairẽme mono õ di. Sena na te dama 're i'aroti mo, 'Re ihâimana u'âsi mono nhimirotizéb zarina. 22Ãne wa, a hã ma'ãpé, marĩ hã wama waihu'u za'ra na, marĩ hã wa te waihu'u za'ra da. E Roma ãma danhib'apito uptabi ma, wa za rob'uiprazé hã wa te tãma 're arĩ za'ra, isimiwada'urizéb zarina. E 'Re ihâimana u'âsi mono ma, wẽ di. E tãma wẽ õ di. Ãne niha na marĩ na isimiroti hã ãma.

23Tazahã ma tô sina waihu'u, Zezusi hã. Tinhimirowasu'u na te te tãma ãma upa za'ra da newa, ma tô ãne siwi sadanharĩ za'ra. Tahawa, te tãma nharĩ za'ra, ãne aibâ norĩ ma:

24— Rob'uiprazé isapotore hã we ĩma 'maiwẽ wa'aba, te 'madâ'â da. E 'wai hâibarĩ, rob'uiprazé isapotore na hã. E 'wa sisi ui'éré duré, ãma hã.

Tawamhã ma asa ãma sada'âbâ za'ra, ãne:

— Roma ãma danhib'apito hâibarĩ ã hã, duré taha nhisi ui'éré, ã hã.

25Tawamhã Zezusi hã te duré asa tãma nharĩ za'ra:

— Roma ãma danhib'apito ma, te za isimiwada'uri zarina rob'uiprazé hã tãma 're i'arĩ za'ra wa'aba mo apâ, ite wa. Tane duré, 'Re ihâimana u'âsi mono ma, te za marĩ hã isimiwada'uri zarina tãma 're isõmri za'ra wa'aba mo apâ, ite wa.

26Tinhimirowasu'u na te te tãma ãma upa za'ra da newa, ma tô danho'a siwi sadanha, aibâ norĩ hã. Tazahã, tinhimirowasu'u na te te tãma ãma upa za'ra õ di, Zezusi hã. Isimirowasu'u hã, wẽ uptabi di. Wẽ uptabi wa, ma ãma titob'uzu za'ra, aibâ norĩ hã. Tahawa, te ari'iwi tihâimana za'ra oto.

Zezusi hã, da te isadanharĩzé wasu'u, dahâiwa'utuzém na

Mateu 22.23-33; Marcu 12.18-27

27-28Tawamhã ma we aibâ norĩ hã itẽme aimasa, Zezusihi u. Aibâ norĩ hã, saduseu. Ta norĩ hã 're dadâ'â za'ra mono wamhã, ab're hawi apâ 're idahâiwa'utu za'ra mono õ na, te te dama 're iroti za'ra mono. Zezusihi u simasa wamhã, ma tô tãma rob'rãzarõtõ za'ra, ãne:

— Rowahutu'wa, wahi'rada Mozési hã ma tô ãne dama roti: “Aibâ imro ré hã 'ra õ ré, dâ'â wamhã, tizédé'aba mro na, te za timro isisãnawã hã, ai'uté hã te te 'maipoto da, iwa isédé'aba 'ra ne, 're morĩ da.”

29— Aibâ hã isisãnawã si hã te 're hâimana za'ra, 7 na ihâiba za'ra hã. Tawamhã ipoto'rada hã ma tô timro oto. Tazahã, 'ra õ ré, ma tô dârâ, aibâ hã. 30Tahawa, ma tô isõsi hã duré ãma timro, tizédé'aba mro na. Tane nherẽ, ma duré dârâ, 'ra õ ré. 31Tahawa, ma tô duré taha nhosi hã ãma timro. Tane nherẽ, ma duré dârâ, 'ra õ ré. Ãne siparabâsi, ma tô aré sisõwa're're nasi ãma timro za'ra. Tawamhã ma tô oto uburé sisarina ai'utõ, 'ra õ ré. 32Tawamhã pi'õ zama ma tô oto dârâ, timro norĩ zarina. 33Imro 7 na ihâiba za'ra wamhã, e 'wai mro za bété pi'õ hã, ab're hawi apâ te te 're da'ahâiwa'utu mono wamhã, 'Re ihâimana u'âsi mono hã.

34Tahawa, te Zezusi hã asa tãma rowasu'u za'ra, ãne:

— Ti'ab ré si, te za dasina 're damro za'ra. 35Hâiwa ãma hã, dasina 're damro za'ra mono õ di za oto. Niwapsi, te za ab're hawi ahâiwa'utu, 'Re ihâimana u'âsi mono hã te te 're i'awẽsãmri mono norĩ hã, hâiwa ãma i'rata 're si'ubumroi u'âsi mono da. 36'Re ihâimana u'âsi mono ma romhuri'wa norĩ ne, te za dâ'â ãna 're hâimana u'âsi za'ra, dâ'â waihu'u ãna. 'Re ihâimana u'âsi mono 'ra, te za 're dahâimana za'ra, ab're hawi za te te da'ahâiwa'utu wamhã. 37-38Mozési hã ma tô dama waihu'u, ab're hawi 'Re ihâimana u'âsi mono te te 're ida'ahâiwa'utu mono zém na hã. Wede zapore iro'o na, te te dama ãma rob'ui'éré wamhã, ma tô 'Re ihâimana u'âsi mono dama wasu'u, tihi'rata norĩ nhib'apito na. Abra'ãhã nhib'apito, te, u, 're hâimana, 'Re ihâimana u'âsi mono hã. Duré Izaquihi nhib'apito, te, u, 're hâimana. Duré Zacoho nhib'apito te, u, 're hâimana. Ãne te dama rowasu'u, Mozési hã. 'Re idahâimana u'âsi za'ra mono nhib'apito, te 're mo, 'Re ihâimana u'âsi mono hã. Dahâiba hâ nhib'apito, 're morĩ õ di. Aihĩni te isõ'a 're dahâimana za'ra. 'Re idadâ'â za'ra mono norĩ zama, te isõ'a 're hâimana za'ra. Ãne, Mozési te te dama irowasu'uzéb zarina, wa tô waihu'u za'ra ni.

39Tawamhã te rowahutu'wa norĩ hã Zezusihi ma nharĩ za'ra, ãne:

— Asimirowasu'u hã wẽ di, rowahutu'wa.

40Tahawa, ma tô roti wẽ na sõwada za'ra, saduseu norĩ hã. Tahawa, marĩ na te te siwi sadanharĩ waihu'u õ di oto, te te sina mreme wazéb za'ra wa, ta norĩ hã.

Danho'reptui'wa na, Zezusi te te ida'azadanharĩzé wasu'u

Mateu 22.41-46; Marcu 12.35-37

41Tawamhã Zezusi hã te da'azadanha, ãne:

— Danho'reptui'wa da, 'Re ihâimana u'âsi mono te te ipisudu hã Dawihi nhihudu te za, u, 're mo. E marĩ wa, te isihudu na wasu'u za'ra ni. 42-43Apito Dawi hã ma tô tinhib'apito na danho'reptui'wa hã sisi, tinho're na. Ãne, Dawihi nho're na rob'ui'éré hã:

“'Re ihâimana u'âsi mono, ma tô Ĩnhib'apito ma, tinha: ‘Ĩ'rata te za 're asãmra mo, ĩnhimire niwĩ dama aipire na ĩsiré 're aihâimana u'âsi mono da. Wa hã wa za te tãma 're nharĩ za'ra, asitob'ru norĩ ma, aima 're sib'uwa za'ra mono da.’ ”

44Dawi hã tinhib'apito na te te sisi nherẽ, e niha te za isihudu si 're hâimana, Danho'reptui'wa da, 'Re ihâimana u'âsi mono te te ipisudu hã.

Zezusi te te dama iroti mono zé wasu'u, rowahutu'wa norĩ ne, 're dahâimana za'ra mono tõ da

Mateu 23.1-36; Marcu 12.38-40

45Tawamhã uburé, da te wapari za'ra ré, te Zezusi hã tinha, tisiré 're inomro mono norĩ ma, ãne:

46— Ma'ãpé, rowahutu'wa norĩ hã waihu'u za'ra wa'aba, ihâimanazém na hã. Ta norĩ hã uza pa ré, 're nomro mono da si, tãma iwẽ za'ra hã. Duré 'ri nhi'riti wa, da te dasina 're i'ubumroi mono zéb ãma dama pire wa, da te 're wazéb za'ra mono da, ma tô te te sima 're wẽ za'ra. Duré dama ipire norĩ simasisizém na 're isi'ubumroi mono da si, tãma iwẽ za'ra hã, rowahutuzéb ãma duré 'ri para dasiré 're idasaihuri mono zéb ãma hã. 47Rowahutu'wa zahã, te za pi'õi mrotõ norĩ wi, isibro hã te te tiwi 're uprosi za'ra. Tane nherẽ, te ta norĩ hã danho'a 'Re ihâimana u'âsi mono ma, 're mreme zusi hâ, 're hâimana wẽ uptabi za'ra mono newa. Tahawa, te te dama 're i'arob'manharĩ mono zém nhipai u, te za 'Re ihâimana u'âsi mono hã te te tãma 're rob'manharĩ za'ẽtẽ za'ra.

Currently Selected:

Luca 20: xavBP

Highlight

Copy