Luca 5

Tepe ahâ wasu'u

Mateu 4.18-22; Marcu 1.16-20

1Tawamhã Zezusi hã te nhamra, isõ'u zaihâ na, Zenezaré na isõ'u nhisi ãma, 'Re ihâimana u'âsi mono te te dama sadawa wasu'u da. Da'ahâ uptabi na ma tô itẽme hã dasito, da te wapari za'ra da hã. 2Tawamhã uba're maparane ma tô sabu zahuré, isõ'u zaihâ na isa'wari hã. Tepe na romhuri'wa norĩ hã ma tô iwana wairé. Abazipara, te oto tawamhã upsõ za'ra. 3Tawamhã Zezusi ma tô ãzé, uba're wa, Simahã te 're. Tawamhã uba're wa, sébré wamhã, te Simahã ma tinha, suru na te te iré sa'ré da, supara'ré nhiti. Tawamhã uba're wa, te oto nhamra, te te dama rowasu'u da.

4Tawamhã te te dama rowasu'u pari wamhã, te Simahã ma tinha, ãne:

— Uba're hã asiré sari, â 'rehâ u, abazipara hã asiré norĩ me, tepe zô asiwi sãmra aba da.

5Tahawa, ma tô Sima hã asa tãma siwasu'u, ãne:

— Mara bâre, wa tô wei wa te sô sãmra. Tane nherẽ, wa te 'mai'âri za'ra õ di. Tepe õ di. Tane nherẽ, i'ruzéb zarina wa za wasiwi me ni.

6Tahawa, abazipara, ma tô â wa'wa u sô siwi time. Tawamhã tebe hã ahâ na ma tô waibu za'ra, abazipara na. Tahawa, te aré te te sina sinarĩ, abazipara hã. 7Tawamhã tisiré tepe mrami'wa norĩ zô ma tô pahamrimi zahuré, uba're ihâiba amo hã te te itẽme sari zahuré da, te te ãma pawaptob za'ra da. Tahawa, te itẽme sari zahuré. Tawamhã uba're wa, ma tô sãmra za'ra, aibâ norĩ hã. Tebe hã uba're si'uiwa na hã 'masisi zahuré di. Tebe hã ahâ uptabi wa, te aré sina 'mazasi zahuré, uba're hã. 8-10Tebe ahâ na te te awaibui wamhã, ma tô ãma titob'uzu za'ra. Tiagu norĩ zama, ma tô ãma titob'uzu zahuré, Zuwãhã me. Ta norĩ hã Zebedehe 'ra zahuré. Isiré tepe na, te te 're romhuri zahuré, Simahã siré hã. Tawamhã hi'rãtitõ, ma aime Zezusihi papara, Sima Pedru hã, tebe ahâ na te te 'madâ'â wa. Ãne te Zezusihi ma tinha:

— Ĩ'rata asãmra õ di za. Te za oto aimo, ĩnhiti. Wa hã ĩwasétére di.

Tawamhã Zezusi te asa tãma tinha, ãne:

— Asina aipahi õ di za. Tepe na 're iromhuri mono ne, te za oto ĩma 're ida'awaibui wẽ mo.

11Tawamhã uba're, ma tô sani za'ra, rob'ré u. Uburé ma tô marĩ hã rẽme za'ra, tinhimiromhuri za'ra zé hã, Zezusihi siré oto 're nomro mono da.

Aibâ i'wa're ré hã, Zezusi te te ipesezé wasu'u

Mateu 8.1-4; Marcu 1.40-45

12Tawamhã Zezusi hã te nhamra, 'ri nho'õmo ãma. Tame te aibâ hã 're sãmra, i'wa're ré hã. Uburé ihâiba na i'wa're ãma iwairébé mono hã. Tawamhã Zezusi te te sõpẽtẽ wamhã, hi'rãtitõ ma aime, Zezusihi papara. Ti'ai u, ma tô duré ti'ubu na ropto. Tawamhã Zezusihi ma, te tinha, ãne:

— Apito, ĩma aiwaihu'u pese di, asimipese waihu'u pese na hã. Tahawa, te za ĩpe, asima ĩwẽ wamhã.

13Tawamhã tinhib'rada hã ma tô wahutu Zezusi hã, te te ãma upi da. Te te upi wamhã, te tãma tinha, ãne:

— Wa tô ĩsima aiwẽ tô, te aipese da. Tâibâ za oto aihâzé hã.

Tawamhã awa'awi ma i'wa're hã tãma aimani za'ra. 14Tawamhã Zezusi ma tô sina sadawa uwati, te te dama sina wasu'u tõ da. Te tãma tinha, ãne:

— 'Re ihâimana u'âsi mono ma, da'ãma romhuri'wai u, te za aimo, aihâiba wẽ zô te te aihâiba 'madâ'â da. Taha parip si, te za tãma asõpru, 'Re ihâimana u'âsi mono ma, Mozésihi nhimiroti zarina, dama aipibu pese zéb da, aipesezém na hã.

15Tane nherẽ, ma tô Zezusihi wasu'u hã wapari za'ra ni, daro mono bâ. Tahawa, ma tô da'ahâ na itẽme 're dasihutu, da te 're wapari za'ra mono da. Duré te te 're da'apese mono da, ma tô itẽme 're dasihutu. 16Tane nherẽ, Zezusi hã ma tô dawi 're ne, a'ubuni u, 're mreme mono da hã, Timama ma.

Aibâ ihi'ré hã, Zezusi te te ipesezé wasu'u

Mateu 9.1-8; Marcu 2.1-12

17Tawamhã apâ datẽme wisi wamhã, te nimahã bâtâ na dama rowasu'u, Zezusi hã. Te te dama rowasu'u ré, te i'rata ai'ubumro, farizeu norĩ hã. Rowahutu'wa norĩ me, te i'rata ai'ubumro, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Ta norĩ hã ma tô itẽme sito Galiléa hawi, duré Zudéa hawi, duré Zeruzalẽ hawi. Tawamhã 'Re ihâimana u'âsi mono tiwaihu'u pe hã, te te tãma isõmri na, ma tô da'apese, Zezusi hã. 18Tawamhã aibâ norĩ hã, ihi'ré hã ma tô siwi ti'â, isimiwaptâ wa. Ma tô sima wẽ za'ra, 'ri para u te te siwi 'mazébré da, Zezusihi nho're te te siwi hiri da. 19Tazahã da'ahâ wamhã, te te siwi 'mazébré waihu'u õ di. Tawamhã 'ri nhisi hawi, ma tô tãma 'ri 're pu'u za'ra, te te siwi 'mazébré da. Tawamhã dawa'wa ma tô siwi tihi, Zezusihi nho're, isa'warizéb ré. 20Zezusi hã simiwaihu'u pese wa, ma tô ãma saze za'ra. Tahawa, ma tô siwi ti'â, te te pese da. Zezusi ma tô sina waihu'u siro, te te ãma isaze za'ra zém na. Tahawa, te ihi'ré ma tinha, ãne:

— Ĩsiwadi, aiwasédé hã 're i'ab'manharĩ wasété mono zé hã te ai'ãma 're ab'madâ'â mono õ di za oto.

21Tawamhã rowahutu'wa norĩ hã te farizeu norĩ me tãma nharĩ za'ra, tipẽ'ẽ na, ãne:

— E niha ma tô bété õ hã tãma tinha, imorĩ'õ ma. 'Re ihâimana u'âsi mono ma, wẽ õ di, aibâ ma, te te inharĩzé hã. Dawasédé hã da te 're i'manharĩ wasété za'ra mono zé hã, ni'wa hã te te dama 're apari waihu'u mono õ di. 'Re ihâimana u'âsi mono ma si, waihu'u pese di, dawasédé hã te te dama 're i'apari mono da hã.

22Tawamhã Zezusi ma tô sina waihu'u za'ra, isimirosa'rata za'ra hã. Tahawa, te tãma nharĩ za'ra, ãne:

— E marĩ da, te ãne ĩ'ãma irosa'rata za'ra wa'wa. 23-24Wa hã dawasédé hã te dama 're i'apari waihu'u pese mono na, e niha te za iwaihu'u za'ra wa'wa, sena na ĩwaihu'u za'ra wa'aba da hã. Aibâ ma, wa tô tinha, ãne: “Aiwasédé hã 're i'ab'manharĩ wasété mono zé hã, te ai'ãma 're ab'madâ'â mono õ di za oto.” Ãne hã ĩmreme si wamhã, aima pibu prã za'ra wa'aba di tô. Ã hã imorĩ'õ hã wahutu da, duré oto morĩ da, te tãma nharĩ wapsi, te za iwaihu'u za'ra wa'wa, ĩwaihu'u pese na sena na ĩwaihu'u za'ra wa'aba da oto. Ti'ai ãma Dasiré Ipoto ma hã waihu'u pese di, dawasédé te te dama 're i'apari mono da hã, 'Re ihâimana u'âsi mono zadawa para. Ãne na asiwi ĩwaihu'u za'ra wa'aba da, wa za ihi'ré ma tinha, wahutu da.

Tawamhã ihi'ré ma, te oto tinha, ãne:

— Ma'ãpé, aiwahutu. Asa'warizé hã âri, asõrõwa u aimorĩ da oto.

25Tawamhã awa'awi ma tô aibâ hã wahudu, danho'a. Tiza'warizé, ma tô siré ti'â. Tinhorõwa u, te oto mo. Morĩ sina, te ãma tiwata, 'Re ihâimana u'âsi mono ãma. 26Tawamhã uburé ma tô ãma tatob'uzu za'ra ni. 'Re ihâimana u'âsi mono ãma, te duré ãhã wamhã tawata za'ra ni. Ãne te dasima nharĩ za'ra ni:

— Aibâ te te ipesezé hã, wẽ uptabi di. Ãhã na, wa tô wasiwi 'madâ'â za'ra ni.

Levihi wasu'u

Mateu 9.9-13; Marcu 2.13-17

27Tawamhã rob u, ma tô watobro, Zezusi hã. Watobro wamhã, ma aibâ hã 'madâ, danhib'apito ma, dawi rob'uiprazé arĩ ubumroi'wa hã, Levi na isisi hã. Isimiromhurizéb ãma sãmra ré, ma tô 'madâ. Tame te da te tãma 're sõmri za'ra rob'uiprazé hã, i'ubumrozéb ãma, danhib'apito nhimiwada'uri zarina. Tawamhã Zezusi hã ma tô ãne 'mahâ:

— We aimorĩ, ĩsiré 're aimorĩ da oto.

28Tawamhã ma wahudu. Tinhimiromhurizé, ma tô tirẽ, Zezusihi siré 're morĩ da oto. 29Tawamhã Zezusi te te sawi da, ma tô tinhorõwa ãma dasa hã dama 'manha, sa'ẽtẽ na. Zezusihi siré, te za dasa hã huri ni. Tahawa, rob'uiprazé arĩ ubumroi'wa norĩ hã te i'rata ai'ubumro, isiré saihuri da, da'ahâ na. Ni'wam norĩ zama, te isiré tisa tihu. 30Tawamhã saihuri da, si'ubumroi ré, ma tô 'madâ'â za'ra farizeu norĩ hã, rowahutu'wa norĩ me. Tahawa, te ãne tãma nharĩ za'ra, Zezusihi siré 're inomro mono norĩ ma:

— E niha bâ, te bété dawazari asaihuri 'wa, rob'uiprazé arĩ ubumroi'wa norĩ siré, dawasété na 're idanomro mono norĩ siré zama.

31Tahawa, te Zezusi hã tãma nharĩ za'ra, ãne:

— Hâzé ãna 're inomro mono norĩ hã, dawede'wa zô 're sõpré mono õ di, te te 're wede za'ra mono da. Ihâzé ré norĩ si te za sô 're sõpré, te te 're pese za'ra mono da. 32Tane duré wa hã, dawẽ na 're idanomro mono norĩ zô, ĩsitẽme 're ĩhârâ mono da, we ĩmorĩ õ di. Dawasété na 're idanomro mono norĩ zô si, 're ĩhârâ mono da, wa wei mo, dawasédé hã da te 're rẽme pese za'ra mono da, 're danomro wẽ mono da oto.

33Tawamhã ni'wam norĩ hã te Zezusihi ma nharĩ za'ra, ãne:

— Zuwã Batistaha siré 're inomro mono norĩ hã nimahã bâtâ na si, te sai ãna 're si'ubumro, 'Re ihâimana u'âsi mono ma, te te 're romhuri za'ra mono da, farizeu norĩ zadawa 'madâ'â pese 'wa norĩ zama. Ãnei õ di, asiré 're inomro mono norĩ hã. Te 're saihuri u'âsi, asiré. Te duré asiré te te 're âhuri.

34Tahawa, te Zezusi hã asa tãma nharĩ za'ra, ãne:

— Aibâ hã imrozéb u, sô ihârâ za'ra norĩ hã sihutu wamhã, e te za dasa hã tiwi sawi za'ra ni, saihuri ãna si'ubumro da, ta norĩ hã. Mare di. Aibâ imro da hã, i'rata sãmra za'ra ré, te za tô isiré tisa tihu, to sina. 35Niwapsi te za bâdâ hã iwa waptãrã, aibâ imro da hã isiwadi norĩ wa'wa hawi, da te tiwi i'âri za'ra zéb da hã. Tawapsi te za tô sai ãna 're si'ubumro, robzei ãna.

36Tawamhã te duré ãma romnhimiré'é, ãne:

— Zazahâ ihâiwẽ hã e te za sizâri ni, ihâ'ratare hã da te ãma hâiwa'aba da. Mare di. Ãne wamhã, te za aiwamna, ihâiwẽ hã. Duré ihâtém na da te hâiwa'aba wamhã, aiwab õ di, ihâ hã. Hâi wẽ hâ õ di. 37Tane duré uwa 'rãi wa'u isé hã 're wa'ui ware mono õ ré, da te 're séme waihu'u mono õ di, romhâ 'manharĩ 'ratare 'remhã. Wa'ui ware õ ré, da te 're séme mono nherẽ, oto wa'ui ware wamhã, te za romhâ 'manharĩ 'ratare hã sina wazu. Tawamhã uwa 'rãi wa'u isé hã te za asa'wa. Romhâ 'manharĩ hã te za duré hâihaiwamna. 38Itép si'uiwa 'rem na si te za rob'rãi wa'u isé tébre hã da te iwa 're 'masisi za'ra. 39Uwa 'rãi wa'u isé i'ratare hã da te 're âhuri mono pari, e te za da te dasima 're wẽ za'ra, uwa 'rãi wa'u isé ité hã. Mare di. Ãté ité hã da te dasima 're wẽ za'ra mono õ di za. Te za dasima da te 're nharĩ za'ra: “Iwa'u 'ratare si, wẽ uptabi di.” Ãne te za dasima da te 're nharĩ za'ra.

Currently Selected:

Luca 5: xavBP

Highlight

Copy