Génesis 39
39
José Potifaran nuwejai pachisa timau
1Ismaelita shuar aina Josén sumakar juki Egiptonam ejémun Potifar sumakuiti. Potifarka faraónkan jeen waitirin kuitamin ainan apuri ajakuiti. 2Turasha Yuus Josénka kuitamu asa, apu jeen pujakaisha pegkernum yaigkuiti. 3Tura Yuus yayámu asa José pegkeran takámun nina apuri nekawaiti. Tura Josénka Yuusapi yayáwa, tusa tinaiti. 4-5Tura asa Josén wait anentak, wina jearui iruna ju kuitamin atá tusa apumtikawaiti. Josén Yuus anea asa, Potifaran pegkernum yayák jeen irunun, tura ajanmaya ainancha nukap amajtusuiti. 6José ashi kuitamu asamtai, Potifarka ima yutanak enentaimtujakuiti. Joséka pegkeri ajakuiti. 7Iman asamtai chikich tsawantin Potifaran nuwe Josén wakera asa chicharuk: Ijai kanarmi, tusa tinaiti.
8Tamasha nigka nakita asa nuwan chicharuk: Wina apur ninu ainan ashi kuitamin atá tusa ikurkimayi. Tuma asa ninu ainanka pachiatsui, tusa tinaiti. 9Ju jeanmagka wina nagkataku chikichka pegkesha atsawai, wina apurka ninu ainanka, ame iista tusa ashi inaitursauwaiti. Antsu aminka nina nuwe asaakmin turutachuiti. Tuma asamtai Yuusnaka tunaunka takarmaitsujai, tusa tinaiti.
10Takaisha ijai kanarmi tusa Josénka kashi kashinig inijakuiti. Imatramsha umirujakchauwaiti. 11Chikich tsawantin shuarsha atsuinamunam José nina takatrin takastasa jea wayaawaiti. 12Tumattamaun Josén jaanchnum nuwa achik chicharuk: Ijai kanarmi, tusa tinaiti. Tama nina nakita asa tsekeakai, José jaanchrin nuwa awitak juruknaiti. 13Nuna tura jaanchin juki, 14inatai aina jeanam irunun untsuk ikaanak chicharuk: Wina aishur hebreo shuaran apujsama nu, wina taruti ijai kanarmi turutkai, nakitakun senchi untsumkajai. 15Wii senchi untsumkai tsekeak jaanchrin awiik ikuki, tusa tinaiti.
16Tura aishur tamatai inaktusmij tusa José jaanchrin ikusuiti. 17Tura aishri taamtaisha ujak: Ame hebreo shuar inartajai tusam itaam apujkimam nu, wina tarutaa waitkarakai, 18senchi untsumkamjai. Wii imatkai tsekeak jaanchrin awiik ikukmayi, tusa tinaiti.
19Tusa ujakam Potifar senchi kajekuiti. 20Tuma Josén achik apun inatairi aina achiram egketainamunam egkeatarma tusa inamrauwaiti. Turamtai jukiar egkeawaru ainawai. 21Turamtaisha Yuus Josén kuitamu asa, cárcelnum egkeamu ainan apurin wait anentrati, tusa tinaiti.
22Turamu asa, cárcelnum shuar egketaina nu ame kuitamata, tusa tinaiti. Timau asa nui irununka ashi kuitamujakuiti. 23Joséka Yuus yayámu asa pegker taká asamtai, cárcelnum egkeamu ainan apurigka pachikchauwaiti.
Currently Selected:
Génesis 39: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
