Génesis 43
43
Benjamín Egiptonam jukimu
1-2Ashi nugkanam tsuka senchi tepea asamtai, Egipto nugkanmayan nita trigo sumakmau amuwakai, Jacob uchiri ainan chicharuk: Ataksha trigo sumakrum utitarma, tusa tinaiti.
3Takai Judá ayak: Apu ina chichartamuk: Yatsum ekeu juki itachkurmeka juigka taawairpa, tusa turammaji. 4Tinu asamtai ame Benjamín akupeakminka trigo sumaktasar wetatji. 5Apu ina chichartamuk: Yatsum ekeu itaachkurmeka juigka taawairpa tusa turammaji. Ame yatsur akupat nakitakminka wechattaji, tusa tinaiti.
6Takai Israel chicharuk: ¿Urukamtai nu apusha, ina yachi chikitcha aruttramji tusarmesha ujakmarme? Nu atum tiirum nui winaka pegkerchau enentaimtikrarme, tusa tinaiti. 7Takai nita chichainak: Isha ujamainchau ayatar ina patai ainan pachis, apasha pujawak, atumi yachi chikitcha pujawak tusa ininmakrin, tura atumi yachi itaatarma tusa turamtinka nekachu asar, ujakmaji tusa tiaruiti.
8Tusa Judá nina aparin Israelan chicharuk: Yatsurka wijai akupkata. Turachkuminka amijai, ashi ina uchiri ainajaimak tsukai jinaattaji. 9Yatsurnaka wii kuitamattajai. Antsu wii ataksha jui itachmataigka ame pegkerchau chicharam atajai, tusa tinaiti. 10Ame ju surima pujachkuminka ika yutai sumakar jimaraa tamain jainaji, tusa tinaiti.
11Takai Israel nitan chicharuk: Chikich turumainka atsawai, ina nugkenia árak pegker kugkuin bálsamo tutai, miel, perfume, mirra, nueces, tura almendra aina nu jukirum apu susatarma. 12Yutai sumaktin kuit jukitarma. Tura atum akikmakmaurmin kajinmatki awaigki egkeachmashi nusha ejétirum susatarma. 13Yamaika Benjamín jukirum apu pujamunam wetaarma. 14Yuus ashi senchirtina nu atumin wait anentrati tusa apun pegkernum enentaimtikrati. Turamtai atumi yachin emetamtai, ikuki tamarum nunasha awagturmakmatai, ju yatsum Benjamínnasha emettsuk akupkamtai iruuntsarum taatarma. Uchirtinchau juakti timau akunka uchirtinchau juaktajai, tusa tinaiti.
15Takai Jacobon uchiri aina, apu aantra susatin ainan, kuitan, tura Benjamínnasha jukiar Egiptonam jeawaruiti.
José nina jeen yachi ainan jukimu
16Tumawarmatai José iikma Benjamínkan wainak, nina jeen takaun chicharuk: Ju shuar aina juka wina jearui yaruakta. Turam vaca pegker iisam maam inarkam umikta, etsa tutupin jasmatai nitajai iruuntran yuatjai, tusa tinaiti.
17Tama inataisha José timaunka imatrusag umiak shuar ainan yaruakuiti. 18Turasha sapijmaina asar nitak chichainak: Inka kuitan kasamkaru, tusa ina tagkuri ainajai yarurmak nina inatairi amajtamkattsa jutikramaji, tusar tuina.
19Tuina asar jeagka waitsuk José inatairin aujainak: 20-22Apu, ika nuik taar trigo sumakar, wakettsar jinta kanartinnum jear ina sacori atiar iiyajkamar, trigo sumakur akikmakmauka kuit imanisag egketu wainkamji. Nunasha yatsuk egkeaya nuka nekatsji, tuma asar awaigkimi tusar itaji. Tura trigo sumaktincha itaji, tusar tuina.
23Tuinakai inatai chichaak: Tusarum sapijmairpa. Atumin, tura atumin apari Yuusriya nu, atumi sacormin egkeayi. Atum yutai sumakrum akikmakmaunka wii jukimiajai tusa Simeónkan cárcelnum egketun jiiki nita matsatmaunam itawaiti. 24Tura José jeen utsaa naween nijakarti tusa entsan shikik susaruiti. Tura burrori ainancha ayurtukuiti. 25Etsa tutupin jasmatai José nitajai yurumkan yuatnun nekaawaru asar, nita itaamurin Josén susartasa nakaa iruuntuina. 26Tuma irunai José nina jeen jeawaiti. Tumamtai nita itaamuri ainan susar tsuntsumruawaruiti. 27Turasha José nitan iniak: ¿Atumi patai ainasha matsammaka? Atum wina ujatkurum ina aparigka unchiti turutmarum nusha yamaikisha pujawak, tusa tinaiti.
28Takai nita chichainak: Ee, ina aparigka pegker pujumayi tusar tsuntsumruawaruiti. 29Tumainakai José ashi iistajkama nina nukuri jurermaun Benjamínkan wainkauwaiti. Tura chichaak: ¿Atum wina ujatkurum ina yachi ekeu pujumai turutmarum nu jukait? tusa tinaiti. Tusa Benjamínkan chicharuk: Uchiru, Yuus pegkernum yainmakti, tusa tinaiti.
30Tusa útmain nekapeak kanutairin wári wayaa shir aneak útnaiti. 31Tuma entsan juki yapin nijar jiinki inatairin chicharuk: “Yurumak mesanam ekentrata”, tusa tinaiti. 32Tama inataisha José yuatnun, tura José yachi ainanka chikich mesanam eketainak, egiptonmaya ainancha turusag ekettraruiti. Nunaka hebreo ainaka, egiptonmaya ainajai iruunturar yuchau asarmatai turawaiti. 33José nina yachi ainan emkaunam nagkama eke ekenkauwa inagnamun Benjamínkan ekettsauwaiti. Turamu asar ¿urukamtaig jutikramaj? tusar inaina. 34Tura José nina mesarin yutai ekentramun nina yachi ainan susaruiti. Turak Benjamínkan ima nukap susauwaiti. José nina yachi ainajai yua, tura umar shir aneasuiti.
Currently Selected:
Génesis 43: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
