Éxodo 7

Moiséspa tukrun culebraman tikranqan

1Tsënö niptinnam Moisésta Teyta Dios nirqan: <<Shumaq wiyamë. Qamtam churarquq Faraónpa nöpanchö noqapa rantï kanëkipaq. Wawqiki Aarónnam willakuqniki kar Faraónta parlapanqa. 2Qammi Aarónta willanki llapan ninqäkunata. Pënam Faraónwan parlanqa Israel nunakuna nacionninpita ewkuyaptin jaqinanpaq. 3Tsënö parlapaptinpis Faraónpa shonqunta chukruyätsiptïmi jukllaqa jaqiyäshunkitsu. Mana jaqiyäshuptikinam espantëpaq castïgukunawan Egipto nunakunata jipatsishaq.#Hech. 7.36. 4Jipëkätsiptïpis Faraónqa manam cäsushunkitsu. Tsëmi Egipto nunakunata masraq jipatsir kuyanqä Israel nunakunata tröpa tröpa jorqamushaq. 5Israel nunakunata tsënö jorquptïmi Egipto nunakuna käyikuyanqa poderyuq Teyta Dios kashqäta>>.

6 Teyta Dios ninqannöllam Moisés y Aarón Faraónwan parlaq ëwayarqan. 7Faraónwan parlayanqan witsanqa Moisés këkarqan puwaq chunka (80) watayuqmi y Aarónnam këkarqan puwaq chunka kima (83) watayuq.

8Tsëpitanam Moiséstawan Aarónta Teyta Dios nirqan: 9<<Faraón ima milagrutapis ruranëkipaq nishuptikiqa Aarónta ninki tukrunta#7.9 Wakin nunakunaqa shukshunta niyanmi. Faraónpa nöpanman jitëkunanpaq. Jitëkuptinmi culebraman tikrarinqa>>.

10Tsënö niptinmi Moiséswan Aarón ëwar Teyta Dios ninqannölla Faraónpa nöpanchö llapantapis rurayarqan. Tsëmi Faraónpa y yanapaqninkunapa nöpanchö tukrunta pampaman Aarón jitëkuptin culebraman tikrarirqan. 11Tsënam Faraónpis qayatsirqan yachaqkunatawan brüjukunata. Pëkunapis Aarón rurashqannöllam rurayarqan. 12Tsëmi tukrunkunata pampaman jitëkuyaptin culebraman tikrariyarqan. Aarónpa tukrunnam pëkunapa tukrunkunata mikukurkurqan. 13Tsëta rikëkarpis Teyta Dios ninqannöllam Faraónqa chukru shonqu tikrarir Moiséstawan Aarónta cäsurqantsu.

Yaku yawarman tikranqan

14Tsënam Moisésta Teyta Dios nirqan: <<Faraónqa chukru shonqum këkan. Tsëmi Israel nunakuna ewkuyänanta dejarita munantsu. 15Waränin qoyana mayuman ëwë Faraón armakuq#7.15a Wakin nunakunaqa bañakuq niyanmi. ëwaqta shuyaq. Tsëman ëwar apanki culebraman tikraq tukrïkita#7.15b Wakin nunakunaqa shukshïkita niyanmi.. 16Faraónwan tinkurmi ninki: <Hebreo nunakunapa#7.16 Hebreo nunakunaqa Israel nunakunam karqan. Tsëmi Moiséspis Hebreo nuna karqan. Teyta Diosninmi kachamashqa willanaqpaq: <<Kuyanqan nunakunatash jaqirinki chusyaq jirkaman ëwëkur pëta adorayänanpaq>>.

<< <Teyta Dios tsënö nimanqanta nikaptiqpis kananyaq manam cäsumarqunkitsu. 17Kananmi musyanki Teyta Dios pï kanqantapis. Teyta Dios nimanqannömi kë aptarëkanqä tukruwan mayuta wiluptï yawarman tikrarinqa.#Apoc. 8.8; 16.4. 18Tsënam mayuchö këkaq pescädukunapis wanurnin ushakäyanqa. Alläpa asyaptinmi Egipto nunakunapis tsë yakuta melanar upuyanqatsu> >>.

19Jina kënömi Moisésta Teyta Dios nirqan: <<Aarónta ninki tukrunta aptarkur mayukuna, sekyakuna qochakuna y pukyukuna jananpa makyaränanpaq. Tsënöpam llapan yakukuna yawarman tikranqa. Rumipita y qerupita rurashqa yaku winaräkunankunachöpis yawarllanam kanqa>>.

20 Teyta Dios ninqannöllam Moisés y Aarón llapanta rurayarqan. Tsëmi Faraónpa y yanapaqninkunapa nöpanchö Aarónqa mayuta tukrunwan wilïkurqan. Tsënam tsë höra yakukuna tikrarqan yawarman. 21Tsëmi mayuchö kaq pescädukuna wanuyarqan y mayupis alläpam asyarqan. Tsënö asyaptinmi Egipto nunakuna tsë yakuta upuyarqannatsu. Egiptuchöqa llapan yakupis yawarllanam kakurqan.

22Tsënöllam Egiptuchö täraq brüjukunapis yakuta yawarman tikratsiyarqan. Tsëta rikarmi Teyta Dios ninqannölla Moisés y Aarón niyanqanta Faraón cäsurqantsu. 23Tsëmi imatapis mana cäsushpa Faraónqa kutikurqan palaciunman. 24Mayu yaku mana upïpaq kaptinnam Egipto nunakuna mayu kuchunkunachö pözukunata uchkuyarqan tsëpita tsuya yakuta upuyänanpaq.

Atska ratsakkuna yurinqan

25Mayuta wilutsinqanpita qanchis junaqtam

Currently Selected:

Éxodo 7: qwhB

Highlight

Copy