Éxodo 9

Wätakuna pesti qeshyawan wanuyanqan

1Tsënam Moisésta Teyta Dios nirqan: <<Ëwëkur Faraónta ninki: <Hebreo nunakunapa#9.1 Hebreo nunakunaqa Israel nunakunam karqan. Tsëmi Moiséspis Hebreo nuna karqan. Teyta Diosninmi kënö nin: Kuyanqä hebreo nunakunata jaqikï adoramaq ëwayänanpaq. 2Ëwayänanta mana munar yapë michaptikiqa 3jinantin Egiptumanmi pesti qeshyata kachamushaq. Tsëwanmi wanuyanqa cawallukuna, ashnukuna, camëllukuna, wäkakuna, üshakuna y chiwakunapis. 4Egipto nunakunapa wätankuna pesti qeshyawan wanuyaptinpis Israel nunakunapa wätankunaqa manam jukpis wanuyanqatsu> >>.

5Tsënö nirirmi Teyta Dios nirqan: <<Warëtämi tsë ninqäta rurashaq>>.

6Ninqannölla waränin junaq ruraptinmi Egipto nunakunapa wätankuna wanuyarqan. Israel nunakunapaqa manam jukpis wanuyarqantsu. 7Tsëmi Faraónqa kacharqan Israel nunakunapa wätankunata rikäyänanpaq. Rikapakuq ëwar manam jukllëllatapis tariyarqantsu wanushqata. Tsënö këkaptinpis Faraónqa yapëmi chukru shonqu tikrakurir munarqantsu Israel nunakuna ëwayänanta.

Nunakunatawan wätakunata chupu ushanqan

8Tsënam Moiséstawan Aarónta Teyta Dios nirqan: <<Jornupita uchpata aptakurkur ëwayanki Faraón kaqman. Faraónpa nöpanchöna uchpata Moisés raraman jitatsun. 9Tsë uchpatam polvutanö vientu apanqa llapan Egiptupa. Tsëpitam chupu yurimunqa Egipto nunakunachö y wätankunachöpis>>.

10 Teyta Dios ninqannömi Moiséswan Aarónqa jornupita uchpata aptarkur Faraónman ëwayarqan. Tsëchömi Moisés uchpata raraman jitëkurqan. Tsëmi nunakunatapis wätakunatapis chupu usharirqan.#Apoc. 16.2. 11Wakin nunakunatanölla brüjukunatapis chupu ushaptinmi Moiséspa lädunman brüjukuna ëwayarqannatsu.

12 Teyta Diosmi Faraónpa shonqunta mas chukruyätsirqan. Tsëmi Faraónqa Moiséswan Aarón ninqanta cäsurqantsu. Tsënöqa karqan Moisésta Teyta Dios ninqannöllam.

Runtu tamya kanqan

13Tsëpitanam Moisésta Teyta Dios nirqan: <<Warë qoyalla Faraón kaqman ëwëkur ninki: <Hebreo nunakunapa Teyta Diosninmi kënö nin: Adoramaq ëwayänanpaq kuyanqä nunakunata jaqiri. 14Mana jaqiptikiqa kananyaq castiganqäpitapis mas peormi castigashqëki. Tsënöllam castigashaq mandakur yanapashuqnikikunata y Egiptuchö täraq nunakunatapis. Tsënöpam käyinki noqalla kë patsachö poderyuq Dios kanqäta. 15Munarninqa yänam qamtapis y jinantin Egipto nunakunatapis feyu qeshyawan ushakäratsïmanna karqan. 16Tsënö kaptinpis mëtsëchöpis täraq nunakuna poderyuq kashqäta musyayänanpaqmi ushakätsirquqtsu.#Rom. 9.17.

17<< <Mana käyirmi kuyashqä nunakunata michëkanki adorayämaq ëwayänanta. 18Tsëmi warë junaq kë hörapita runtuta tamyatsimushaq. Tsënö tamyaqa Egipto nación kashqanpita kananyaq manam imëpis kashqatsu. 19Kananqa wätëkikunata wayi rurinman juklla wichqayë. Wayipita jaqchö këkaqkunataqa llapantam wätatapis nunatapis runtu tamya wanutsinqa> >>.

20Moisés tsënö niptinmi Faraónpa wakin mandakur yanapaqninkunaqa Teyta Dios ninqanta cäsukur sirwiqninkunata y wätankunata wayi rurinman yëkatsiyarqan. 21Wakinkunanam Teyta Dios ninqanta mana cäsurnin waqtallachö jaqiriyarqan.

22Tsënam Moisésta Teyta Dios nirqan: <<Runtu tamya tamyamunanpaq makikita ciëluman pallarï. Tsë runtum chanqa Egiptuchö llapan nunakunaman, wätakunaman y chakrachö këkaq mikïkunamanpis>>.

23Nishqannö ciëluman Moisés tukrunta#9.23 Wakin nunakunaqa shukshunta niyanmi. pallariptinmi Teyta Dios räyutsimurqan y runtutapis tamyatsimurqan jinantin Egiptuman. 24Tsënam runtupis räyupis mana pärëta tamyakïkurqan.#Apoc. 8.7; 16.21. Tsënö tamyaqa manam imëpis Egiptuchö karqantsu. 25Tsë runtum nunakunatapis wätakunatapis jinantin Egiptuchö wanutsirqan. Chakrachö mikïkunatapis pasëpam usharirqan. Montikunatapis jinantin Egiptuchö qalapächullatam jaqirirqan. 26Tsënö këkaptinpis Israel nunakuna täräyanqan Gosén partimanqa manam runtu tamya charqantsu.

27Tsëmi Moiséstawan Aarónta qayëkatsir Faraón nirqan: <<Noqa y Egipto nunakunam jutsayuq këkäyä Teyta Dios kënö castigayämänanpaq. 28Teyta Diosta mañakuyë räyutapis y runtutapis päratsinanpaq. Kananqa Teyta Diosta adoraq ëwayänëkita manam michäyaqnatsu>>.

29Tsënö niptinmi Moisésqa nirqan: <<Kë markapita yarqunä höram makïta ciëluman pallarirkur Teyta Diosta mañakushaq. Tsëmi runtupis räyupis pärarinqa. Tsënöpam musyanki kë patsapis Teyta Diospa munëninchö kanqanta. 30Tsënö këkaptinpis musyämi qampis y mandakur yanapayäshuqnikikunapis Teyta Diosta mana mantsakuyanqëkita>>.

31Tsë runtu tamyawanmi espïgarëkaq cebädapis y wëtarëkaq lïnupis chipyëpa ushakäyarqan. 32Trïgutawan centënataqa qepa murï kaptinmi ushakätsirqantsu.

33Markapita yarqurirnam makinta pallarkur Teyta Diosta Moisés mañakurqan. Tsëmi tsë höra runtu tamyapis y räyupis pärarirqan. 34Tamyapis, runtupis, räyupis pärariptinnam Faraón y mandakur yanapaqninkunapis shonqunkunata chukruyätsiyarqan. 35Tsëmi Israel nunakuna Teyta Diosta adoraq ëwayänanta Faraón munarqannatsu. Tsënöqa karqan Moisésta Teyta Dios ninqannöllam.

Currently Selected:

Éxodo 9: qwhB

Highlight

Copy