Exodus 2
2
Mosesemik.
1Taipsomane angutib Levikut ilangata nuliarileriartorpâ Levib paningita ilangat.
2Arnarlo tâmna singailerpok ernermiglo ernivok. Sorusitsiangojorlo takogamiuk, ijeriartorpâ takᴋit pingasut nâvlugit.
3Sivitunersamigle ijerlugo sapperamiuk, iklerviarsuk ibviogak tiguvâ tâpsomunga; mingoarlugolo kutsomullo târmullo, nutarârsuglo tagvunga ilivlugo pitipâ iviksuit akornganut kôb sinânut.
4Najangale ᴋanigalâgungnairlune ᴋikarpok, nautsertorlune ᴋanok ilinganiarmangât.
5Tagva Faraub paninga atersarpok ubvaromavlune kôngme, uigasuᴋotingillo pisulerput kôb sinâgut. Iklerviarsugle iviksuit akornganêtok takogamiuk, kivgarne arnak tilivâ aijaurᴋovlugo.
6Mattueramiuk, nutarârsuk takovâ, sunaubvalo, angutearsuk ᴋeajok. Nagligilerpâ tagva oᴋarlunelo: Tagga, nutarârsuit Ebrêereojut ilangat.
7Najangale oᴋarpok Faraub paninganut: Arnat Ebrêereojut amâmaktitsijut ilangat ᴋairᴋojartoraksarivigô, nutarârsungmik ilingnut amâmaktitserᴋovlugo?
8Faraub paningata oᴋautivâ: Atê! Uigasublo nutarârsub anânanga ᴋairᴋojartorpâ.
9Faraublo paninga oᴋarpok tâpsomunga: Nutarârsuk una naksaruk, uvamnut amâmaktiniarlugo, akkilerniarapkit. Arnab nutarârsuk naksarpâ amâmaktilâlo.
10Soruserle aglisimangmat, âpâ Faraub paninganut, tâpsomalo ernerilerpâ atserarpâlo Mosesemik, oᴋarame: Kôngmit ᴋaᴋitara.
11Pijoᴋarporlo taipsomane: Mosese inumariolerame, anivok ᴋatangutiminut, siorniornartunik suliaᴋarningit takoniarlugit; takolerpâlo angut Egiptenemiok anaulerniktok angumik Ebrêereojomik, ᴋatangutime ilanganik.
12Ilûnnânelo takojaksarsioralloarlune inuksinginame, Egiptenemiok taimna toᴋopâ sauvâlo siorᴋanut.
13Uvlub aipangane amma anigame, angutik Ebrêereojuk pâjuk takovak, oᴋarporlo pikaluktomut: Sôk inôᴋatit anaulerpiûk?
14Tâmnale oᴋarpok: Kia angajoᴋângortipâtît idluarsaijungortilutillo uvaptingnut? Uvangatauk toᴋotsomavingâ, sorlo Egiptenemiok toᴋogangne? Tagva Mosese erᴋsilerpok, oᴋarlune: Sunaubva, tusaumajaulerᴋunga.
15Faraublo tamanna tusaramiuk, Mosese toᴋonasuarpâ. Mosesele ᴋemâlerpok Faraomit, nuna Midia unnersiorvigivlugo, imektarviublo saniane ᴋikarpok.
16Ajoᴋertuijorle Midiamêtok paniᴋarpok 7nenik; tâpkoa ᴋallujartorput imerᴋautillo imertorpait, atâtamik saugaᴋutingit imertitsomavlugit.
17Tagva mianersijut tikilerput, tagvangat ajaklugit. Mosesele nikovipok, ikajorlugillo saugaᴋutingit imertipait.
18Atâtamingnut Reguelemut tikingmata, oᴋarpok: Sugapse uvlome tikisaraidlarᴋisê?
19Kiovât: Angutib Egiptenemiub piulivâtigut mianersijut agganginit, ᴋallûtivlutalo aglât, saukallo imertilugit.
20Tagva oᴋarpok paniminut: Nanêᴋâ taimna? Sôk angut taimna ᴋemakpisiûk? ᴋairᴋolersiuk nerriᴋataujuksaungmat.
21Mosesiblo angut tâmna angervigivâ tagvanêtsomavlune. Tâpsomalo Mosese tunitjivigivâ paniminik Ziporamik.
22Tâmna ernermik ernivok, Mosesiblo Gersomemik atserarpâ, oᴋarame: Tujormiangolerpunga nuname takorngartamne.
23Uvlut unuktut taipkoa anigortilugit, Egiptenemiut ataningat toᴋolerpok. Israêlikullo anersaumidlarput kivgartorᴋojaunitik pivlugit, nipliadlarpullo; nipliadlarningillo kivgartorᴋojauningit pivlugit Gûdib sânganut pivut.
24Gûdiblo ârosungningit tusâvait, angersimaninelo Abrahamut Isaamullo Jakomullo erᴋarpâ.
25Gûdiblo Israêlikut takonârpait isumagivlugillo.
Currently Selected:
Exodus 2: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
