Exodus 1
1
Israêlikut Egipteneme kivgaulerput.
1Tamadja Israêlib erningita Jakub Egipteneliaᴋatingita atingit, atunit inuᴋotitik ilagivait:
2Rubene, Simeone, Levi, Juda,
3Isassare, Sebulone, Benjamin,
4Dane, Naftali, Gade, Assere.
5Inuillo ilûnnatik Jakob kinguvângit uvinikut tagva inuit 70; Josefele Egiptenemêtsarêrpok.
6Josefelo ᴋatangutingillo ilûnnatik inôᴋatigijangillo taipsomane ilûnnatik toᴋungmata,
7Israêlikut, kinguvâktâᴋatarlutik pivallialerput unuksivallialutiglo angijororpalliadlarlutiglo; nunalo nâmavât tâpkoa.
8Tagva nutâmik ataneᴋalerpok Egipteneme; tâpsoma Josefe ᴋaujimangimarikpâ.
9Oᴋarporlo inuᴋotiminut: Takovose, inuit ukkoa Israêlikut ununersaulermata sôngonersauvlutiglo uvaptingnit:
10Atê, pingitsertornermut pivalliatailitilavut; unatartoᴋartilugo ilaudlaroarmata unatarvigijiptingnut sorsugvigivlutalo nunalo ᴋemaklugo.
11Tagva kivgartorlukatitsijunik angajoᴋâᴋartipait, siorniortitaurᴋovlugit pijaksanut oᴋumainartoksoarnut, Faraolo igluliorpât iglugasangnik ᴋematuliviksaujunik: Pitomemiglo Ramsesemiglo.
12Kisiane siorniortitauvallianingat maliklugo pivalliatuinarput unuksivalliavlutiglo. Taimaimat Israêlikut sivôragilerpait.
13Tagva Egiptenemiut sugaluluartomik kivgartortipait Israêlikut,
14Siorniornadlartomiglo inôseᴋartipait oᴋumainartomik kivgartortilugit: machaleritilugit ivitâliortilugillo sunatuinarniglo pijaksaᴋartilugit perorsêvingne, sunatuinarnik sugaluluartomik kivgartoruteᴋarêralloarmata.
15Egiptenemiullo ataningat oᴋarpok ernisuksêjunut Ebrêereojunut, tâpkoa ilangat Sifaramik atelik, aipangalo Puamik atelik.
16Oᴋarlune: Arnane Ebrêereojune ernisuksêlerangapse ernivianelo takogupsiuk angutiarsuk, tagva toᴋotaksarivase, arnaukpalle inûlisiuk.
17Ernisuksêjulle Gûde sivôragivât, pinialungilallo sorlo Egiptenemiut ataningata oᴋautingmagit, angutiarsuille inûlivait.
18Tagva Egiptenemiut ataningata ernisuksêjut ᴋairᴋovait oᴋautivlugit: Sôk taimailiorᴋisê, angutiarsuit inûligapsigik?
19Ernisuksêjut Farao kiovât: Arnat Ebrêereojut arnatitut Egiptenemiutitut ingimata, nukkeᴋatsiarmatale. Ernisuksêjok tikilerᴋârtinago ernilerêrput taipkoa.
20Tamanna pivlugo Gûdib ernisuksêjut ajungitulivigivait. Inôᴋatigêllo unuksivalliavlutik unuktovaksôlerput.
21Ernisuksêjullo Gûde sivôragingmatsuk, kinguvâᴋartipait unuktunik.
22Tagva Faraub inuᴋotine tamaita perᴋovait oᴋarlune: Angutearsuit inôlertut ilûnnaita kôksoarmut eginiarpase, arnârsuille ilûnnaita inôtilugit.
Currently Selected:
Exodus 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
