Genesis 50
50
Jako iluvertauvoᴋ. Josefe toᴋovoᴋ.
1Tagva Josefib, atâtame kênanganut pûlune, ᴋeajutigivâ kuniklâlo.
2Josefiblo kivgane âniasiortit perᴋovait, atâtane mingoartaurᴋovlugo. Tagva âniasiortit Israêle mingoarpât.
3Uvlut 40 tâpsomunga nâvlugit, uvlut taimak unuktigijut nâjariaᴋarmatta mingoartaugiamut. Egiptenemiullo uvlunik 70nik ᴋeavât.
4Uvlullo taipkoa ᴋeaviojut sorairmatta, Josefib Faraub inuᴋotingit oᴋarvigivait, oᴋarlune: Saimaneᴋsiguma illipsingne, tagva Farao oᴋarvigisiuk oᴋautivlugo:
5Atâtama angertipânga, oᴋarlune: Takovarma toᴋolertunga; iluviksamnut nuname Kânaaneme pijarêrtamnut illijaksarivarma. Taimaimat takpaungarlangatôᴋ atâtaga illijartorlugo; utteromârpunga.
6Faraub oᴋautivâ: Takpaungartuinarit atâtat illijartorlugo, sorlo angertingmatit.
7Tagva Josefe takpaungarpoᴋ, atâtane illijartoromavlugo. Faraublo kivgangit ilûnatik illagivlugo takpaungarput, angajoᴋaujut iglungane, angajoᴋaujullo ilûnatik nuname Egipteneme,
8Taimaktauᴋ Josefib inuᴋotingit ilûnatik, ᴋatangutingillo, atâtangatalo inuᴋotingit; ᴋitorngatik kissêta, saugaᴋotitiglo, tuktuvaᴋotitiglo, ᴋemakpait nunamut Gosenemut.
9Amma ᴋemuksertut ablângajullo horsine illagivlugo takpaungarput; ingergaᴋatigêksuit.
10Katjugvik Atat Jordanib akkianêtoᴋ tikkinamitsuk, angijomik ilungertortomiglo ogguarput tagvane; atâtane pivlugo ogguarneᴋ atorpâ uvlut 7 nâvlugit.
11Nunable inungita Kânaanemiut ogguarneᴋ katjugvingme Atatime takogamitsuk, oᴋarput: Egiptenemiut ilungertorlutik tagvane ogguarput. Tamanna pivlugo nuna tamanna Jordanib akkianêtoᴋ taijauvoᴋ Egiptenemiut ogguarvinganik.
12Erningitalo taimailiorvigivât, sorlo perᴋungmagit.
13Ikârlugolo nunamut Kânaanemut illijartorpât perorsêviub Makpêlab ᴋairosunganut, Abrahab pisiarijanganut (perorsêvik illaliudlugo) iluverviksaurᴋovlugo Efronemit Hetiteremit, Mamrib akkianêtomut.
14Atâtanelo illijarêramiuk, Josefe Egiptenemut utterpoᴋ, tâmnalo, ᴋatangutingillo, ilûnatiglo illagivlugo takpaungarsimajut, atâtanga iluveriartorlugo.
15Josefible ᴋatangutingit, atâtamik toᴋunga issumajârutigivlugo, oᴋarput: Kapianarmêk, Josefib mâna omiginajarpattigut akkiniarlutalo idluitunik tamainik piniartaptingnik tâpsomunga!
16Taimaimat Josefe oᴋautjaurᴋovât: Toᴋolerᴋârane atâtat perᴋojivoᴋ oᴋarlune:
17Imâk oᴋariaᴋarniarpose Josefemut: Katangutivit piungituliningit idluituliningillo issumagijungnailaungmikit, idluitulivigingmatit illa. Taimaimat mâna issumagijungnailaukittôᴋ atâtavit Gûdingata kivgangita idluituliningit! Josefele ᴋeavoᴋ, taimak oᴋarvigingmatsuk.
18Katangutingitalo pâmaktervigijartorpât, oᴋarlutik: Tagga, illingnut kivgaulerpogut.
19Josefible oᴋautivait: Sivôraniarase! uvanga Gûdeogalloarᴋingâ?
20Illipse issumaᴋalauralloarpose, idluitulivigijomavlunga, Gûdele ajungitomik issumaᴋarpoᴋ taimailioromavlune, sorlo mâna saᴋᴋijâdlarmat, inôᴋatigêksuit inûlivlugit.
21Taimaimat sivôraniarase mâna! Uvanga patangaititsomavapse ᴋitorngaselo. Manigorpaillo kiblingnartunik oᴋauseᴋarvigivlugit.
22Taimak Josefe Egipteneme nunaᴋarpoᴋ, tâmnalo atâtangatalo inuᴋotingit; inôvorlo Josefe jârinik 110nik.
23Efraimiblo kinguvârêngningita pingajungit Josefib takovait; taimaktauᴋ Maggerib, Manassib erningata, erningit inôlerput Josefib sângane.
24Josefiblo ᴋatangutine oᴋautivait: Toᴋolerpunga; Gûdiblo nalipsaromârpâse, nunamit mattomangat paungartiluse nunamut angerutigijaminut Abrahamut Isaamullo Jakomullo.
25Josefiblo Israêlikut angertipait, oᴋarlune: Gûdib nalipsaromârpâse, tagva saunikka tamângat takpaungartitsomârpase.
26Tagva Josefe toᴋovoᴋ 110nik jâreᴋarlune. Mingoarpâlo iklervingmut illivlugo Egipteneme.
Currently Selected:
Genesis 50: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
