Genesis 49
49
Jakub ernine nalautaivigivait, toᴋovorlo.
1Jakuble ernine ᴋairᴋovait oᴋarlune: Katimatitse, nalojungnairtitsomagapse tikkitautigijomârtapsingnik nalliutome pijomârtome.
2Katimatitse tussarluselo, Jakub erningit; atâtase Israêle tussarsiuk!
3Rubene, igvit tagva ernera angajukleᴋ, nukkiga, anguteonimalo saᴋᴋerᴋârtanga; anginerôjoᴋ, pitsartunerôjoᴋ.
4Imertut tertipotit; pinerôjungnairtuksauvotit tagva, atâtavit inangavianut inaravit, tagvanêdlutit ivsornartinangne. Inangaviga inarvigivâ!
5Simeonelo Levilo ᴋatangutigêkpuk; saviksoâktik sakkogivakit pikablanermut.
6Kaggimiolerangamik, tarniga tagvanêrᴋolungitara; katimalerangamik, ivlernartoᴋutiga (tarne) illaurᴋolungitara; ningarlutik inuarmanik, ᴋuksalailutik tuktuvait illakungortimattikik.
7Kapianarmêk ningarningak ilungertortoᴋ, ningaumajârningak kassêtoᴋ! Aviuterᴋovakka Jakokune, siamartilugit Israêlikune.
8Igvit, Juda, igvit nakorijaksarivâtit ᴋatangutivit. Aggatit akkerartortivit tununginêtuksauvut, pâmaktervigijaksarivâtit atâtavit ᴋitorngangita.
9Loeviarauvoᴋ Juda. Sâlaᴋarᴋârlutit aglivalliavotit, ernîk. Pâmakpoᴋ, aᴋopivoᴋ loevitut, loevitut piaraᴋartotut; kia ullapilugo sappingilaûk?
10Attaniub ajaupianga Judamit pêraksaungilaᴋ, opigijautiksarlônêt ittigangita akornganit, Silo (ullapirᴋsaijoᴋ) tikkilerᴋârtinago; tâmnalo inôᴋatigêksuit nâlegaksarivât.
11Siuterᴋortojoᴋotine vaineᴋutimut pittukpâ, siuterᴋortojoᴋotimelo piaranga vaineᴋutib akkerunganut; annorâne ergortorpâ vainemut, ulliksoarnelo vaineᴋutib paungangita iptinganut.
12Ijîgik aupaluksivuk vainemut, kigutingit ᴋaᴋorsivut imumut.
13Sebulone nunaᴋartuksauvoᴋ imarbiksûb sikjangane, umiaᴋsuit kissarviane; kiglinga attavoᴋ Sidonemut.
14Isassarib siuterᴋortojoᴋ nukkeᴋatsiartoᴋ adsigivâ, aᴋopijoᴋ avalut illuane.
15Inilangaviksaᴋ ajungitoᴋ maluginamiuk, nunalo ânanauginamiuk, ᴋollêngne manivak nangmarnermut kivgangordlune akkeᴋangitoᴋ.
16Danib inuᴋotine erᴋartoraksarivait, Israêlib kinguvângititut assimititut.
17Dane ᴋuglugiangovoᴋ apᴋosinerme, ᴋuglugiarâluk pissugvingme: horse kêngmago kingmingagut, inua niverpoᴋ kataklune.
18Nâlegaᴋ, piuliklernît nerriugivara!
19Gade inôᴋatigêksuit sorsugvigijomâralloarpât, tâpsomale sorsugvigingmivlugit ᴋemâtitsomârpait.
20Asserib nerᴋiksalianga orᴋsuliovoᴋ, attanerit mamarivaktanginik tunitjijomârpoᴋ.
21Naftalib tuktu ômariktok adsigivâ; tussarominartunik oᴋauseᴋarpoᴋ.
22Josefe napârtoarsutun-ipoᴋ paungaliktut, napârtoarsutut paungaliktut puilaviub sennianêtotut; akkerungita ᴋarmaᴋ nâvât:
23Pittiksilît ullapigalloarmatsuk pittiklugolo unangmivlugolo,
24Tâpsoma pittiksinga soᴋosingilaᴋ, aggangitalo nukkingit ajulungilat, ajugaujub Jakokune ikajormago, Israêlib pairijingata, ᴋairtorijangata.
25Atâtavit Gûdinganit tamanna pivoᴋ: Tâpsoma ikajorlitit, ajugaᴋangitublo saimauserlitit pikuminartunik pângat ᴋilangmit pijunik, pikuminartuniglo kanangat ittinermit pijunik, pikuminartunik amâmamit igliamillo pijunik!
26Saimanartut atâtavit tunijangit pitsartunersauvut saimanartunit ᴋaᴋᴋat nutaungitut tunijanginit, ᴋaᴋᴋârulait aulajuitut allianarninginit. Josefib niaᴋoanut pilit, ᴋatangutingita akorngane attaniotijub kabjinganut!
27Benjaminib amaroᴋ késuktoᴋsoaᴋ adsigivâ; uvlâkut pijane nerrivait, unnukut aᴋsârnigarijane aitûtigivait.
28Tamadja Israêlib kinguvârêngit 12 ilûnatik: tamadjalo atâtangata oᴋauserijangit tâpkonunga, saimausermagit; ilûnaita attunit saimauserlugit saimauserpait.
29Perᴋovlugillo oᴋautivait: Illaliudjaujomâruma sivorlerijamnut, iluveriartorsinga sivorlima akornganut, ᴋairosungmut Efronib Hetiterib perorsêvinganêtomut,
30Perorsêviub Makpêlab ᴋairosunganut, Mamrib akkianêtomut, nuname Kânaaneme. Taimna Abrahab pisiarivâ perorsêvik illaliudlugo Efronemit Hetiteremit, iluverviksaᴋarᴋovlugo.
31Tagvunga Abraha illivât nuliangalo Sara. Tagvunga Isaaᴋ illivât nuliangalo Rebekka. Tagvunga Lea illivara.
32Perorsêvik taimna ᴋairosungalo pisiangomavuk Hetib ᴋitornganginit.
33Jakublo perᴋojane ᴋitorngaminut sorairamigit, ittigane nellavingminut pitipait anernangerdlunelo, illaliutjauvorlo sivorlerijaminut.
Currently Selected:
Genesis 49: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
