Exodus 8
8
Narrâjit, kiktoriat, niviuvait.
1Nalegarlo tagva oᴋarpok Mosesemut: Faraomut oᴋariartorit: Imâk Nâlegak oᴋarpok: Inuᴋotikka aularᴋokit, kivgartorvigijaksaringmanga!
2Aularᴋolugille ᴋunudlaruvit, ahâk, tagva nunagijat ilûnât pidlarniarpara narrâjitigut.
3Kôksoak narrâjinik nâmaniarpok, ᴋaᴋivlutiglo iglungnut tikiniarput sinigvingnullo inangavingnullo, kivgavillo iglunginut, inuᴋotivillo akornganut, igavingnullo niaᴋôjaksaliorvingnullo.
4Ilingnullo inuᴋotingnullo kivgarnullo tamainut narrâjit tikiniarput.
5Nâlegarlo oᴋarpok Mosesemut: Arone oᴋautileruk: Ajaupiak tigumiarlugo aggaktit isaktikit kôt kôgvillo tasillo ᴋollâtigut, narrâjit timuarᴋovlugit Egiptenemiut nunanganut.
6Aroniblo aggane isaktingmagit Egiptenib imangita ᴋollâtigut, narrâjit timuarput Egiptenemiut nunangat nâmavlugo.
7Aglangniglo ilisimajut taimailiorivuttauk angakonermingnut, narrâjit timuartilugit Egiptenemiut nunanganut.
8Tagva Faraub Mosese Aronelo ᴋairᴋovak, oᴋautivlugik: Tuksiutitinga Nâlekab sângane, narrâjinik pêjairᴋovlugo uvamnit inuᴋotimnillo, tagva inuit aularᴋojomavakka, Nâlekamut tunerguserᴋovlugit.
9Moseselo oᴋarpok Faraomut: Nertôtilerit pivlunga (oᴋarvigivlunga), ᴋanga tuksiutijaksarimangâpkit kivgatillo inuᴋotitillo, narrâjit ilingnit iglungnillo pêjartaurᴋovlugit; kisiane kôksoarmêtuksauvut sulle.
10Oᴋarpok: ᴋaupat. Kiovorlo: Sorlo oᴋaravit (taimainiarpok), tukisilerᴋovlutit Nâlegak Gûdivut naleᴋangimat.
11Tagva narrâjit ilingnit iglungnillo kivgarnillo inuᴋotingnillo pêrniarput, kisiane kôksoarmêtuksauvut sulle.
12Tagva Mosese Aronelo anivuk Faraomit. Mosesiblo Nâlegak tuksiarvigivâ narrâjit pitjutigivlugit pititangit Faraomut.
13Nâlegarlo piniarpok, sorlo Mosese oᴋarmat; narrâjillo toᴋolerput iglune, iglut akornganelo, perorsêvingnelo.
14Katersorpaillo tamânelo ikkânelo katitilugit, nunalo tippeludlarpok.
15Faraole tukisigame pagvisartaujungnainerminik, ômatine mangaitipâ tusarnagik, sorlo Nâlegak oᴋarmat.
16Nalegak oᴋarpok tagva Mosesemut: Aronemut oᴋarit: Ajaupiaᴋotit isautivlugo nunab saningit anaukit kiktoriangorᴋovlugit Egiptenemiut nunangane ilûnâne.
17Taimailiorpuglo. Aroniblo ajaupiaᴋotine isautivlugo nunab saningit anaungmagit, kiktoriat pilerput inungnut nergjutinullo; nunab saningit ilûnnamatsiatik kiktoriangorput Egiptenemiut nunangane ilûnâne.
18Aglangniglo ilisimajut taimailiorasuaralloarputtauk angakonermingnut kiktoriat sakᴋertitsomavlugit, sapperpulle. Kiktoriallo inungnêput nergjutinelo.
19Tagva aglangnik ilisimajut oᴋarput Faraomut: Tamadja Gûdib aggangit! Farauble ômatinga mangaitilerpok tusaromangilaillo, sorlo Nâlegak oᴋarmat.
20Nalegarlo oᴋarpok Mosesemut: Uvlârorlutit nangeriartorit Faraub sânganut (ahâk, kôngmut ainiarpok) oᴋautivlugo: Imâk Nâlegak oᴋarpok: inuᴋotikka aularᴋokit, kivgartorvigijaksaringmanga!
21Aularᴋojomangikungnele inuᴋotikka, ahâk, niviuvait tikkerᴋojomavakka ilingnut kivgarnullo inuᴋotingnullo iglungnullo, Egiptenemiut iglungit niviuvanik tatalugit nunalo nunagijangat.
22Uvlormelo taipsomane Gosenib nunanga, inuᴋotima nunagijangat, ingmikôrniarpara niviuvaᴋartailivlugo, tukisilerᴋovlutit uvanga Nâlegaugama nuname.
23Adsigêngititsomavakkalo inuᴋotikka inuᴋotitillo; ᴋaupat nalunaikutaksamik taimâk pijoᴋarniarpok.
24Nâlegarlo taimailiorpok, niviuvaksuillo tikilerput Faraub iglunganut kivgangitalo iglunginut, Egiptenemiullo nunangane ilûnâne nuna sujuktaulerpok niviuvanut.
25Tagva Faraub Mosese Aronelo ᴋairᴋolugik oᴋautivak: Tamâne nunaptingne Gûdipsingnut tunerguseriartoritse!
26Mosesib kiovâ: Taimailiorupta piotsangilak, Egiptenemiut maᴋojugijanginik tunerguserajarapta Nâlekamut Gûdiptingnut; illâ, Egiptenemiut maᴋojugijanginik tunerguserupta takoane, millorajangilâtigût ujarᴋanut?
27Uvlut pingasut ingergavigivlugit ingergajomavogut inuᴋangitomut, Nâlekamut Gûdiptingnut tunerguseriartorluta, sorlo perᴋungmatigut.
28Farao tagva oᴋarpok: Aularᴋojomavapse, Nâlekamut Gûdipsingnut tunerguseriartorᴋovluse inuᴋangitomut, kisiane ungasiktomut pitailijuksauvose. Tuksiutisingatôk!
29Mosese oᴋarpok: Ahâk, anilerêruma ilingnit, Nâlegak tuksiarvigijomavara, niviuvait ᴋaupat pêrᴋovlugit Faraomit kivganginillo inuᴋotinginillo; kisiane Farao uiveriklerungnairmile, inuit tunerguseriartortailijungnairlugit Nâlekamut.
30Moseselo anigame Faraomit, Nâlegak tuksiarvigivâ.
31Nâlegarlo piniarpok Mosesib oᴋausingit maliklugit, niviuvaillo pêrpait Faraomit kivganginillo inuᴋotinginillo; atautsemiglônêt amiakoᴋangilat.
32Farauble ômatine mangaitipâ tamattomanetauk inuillo aularᴋongilait.
Currently Selected:
Exodus 8: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
