Exodus 7
7
Imek aungorpok.
1Nalegak oᴋarpok Mosesemut: Ahâk, Faraomut Gûdetut-itipagit, Aronelo angajuit oᴋartigijaksarivat.
2Igvit perᴋojamnik tamainik ilingnut oᴋartuksauvotit, Aronible angajuvit oᴋautigijaksarivait Faraomut, Israêlikunik aularᴋojerᴋovlugo nunaminit.
3Uvangale Faraub ômmatinga sittisititsomavara, nalunaikutat tatamnartullo (piniaromajakka) unuksitilugit Egiptenemiut nunangane.
4Faraublo tusaromaniangilâtik; tagva Egiptenemiut isagomavakka, katimagajoᴋsoaᴋutikka, inuᴋotikka Israêlikut, aularutivlugit Egiptenemit sugiartauviksoatigut.
5Egiptenemiullo tukisijuksauvut uvanga Nâlegaugama, Egiptenemiut isagupkit, Israêlikullo aularutikupkit akornganit.
6Moseselo Aronelo taimailiorpuk; sorlo Nâlekab perᴋungmagik, taimâk iliorpuk.
7Moseselo 80nik jâreᴋarpok, Aronelo 83nik jâreᴋarpok, taimâk oᴋauseᴋaramik Faraomut.
8Nalegarlo oᴋarpok Mosesemut Aronemullo, oᴋarlune:
9Oᴋarvigilutik Farao oᴋarpat: Tatamnartomik takuksautitsileritik! Tagva Aronemut oᴋartuksauvotit: Ajaupiaᴋotit tiguvlugo, Faraub sânganut egileruk, ᴋuglugiangortilugo.
10Tagva Mosese Aronelo Faraomut iterpuk taimailiorlutiglo, sorlo Nâlekab perᴋungmagik. Aronible ajaupiaᴋotine egipâ Faraub kivgangitalo sânganut ᴋuglugiangortilugo.
11Tagva Faraub ilisimajut angakullo ᴋairᴋovait, tâpkoalo, Egiptenemiut ilisimajoᴋotingit aglangnik, taimailiorivut angakonermingnut.
12Nelliᴋârdlutik ajaupiaᴋotitik egipait ᴋuglugiangortilugit, kisiane Aronib ajaupiaᴋotingata ajaupiaᴋotingit êvait.
13Taimailingagalloarmat Faraub ômatinga mangaitilerpok, tusaromangilaglo, sorlo Nâlegak oᴋarmat.
14Nalegak tagva oᴋarpok Mosesemut: Faraub ômmatinga mangaipok, inuilo aularᴋovlugit ᴋunuvok.
15Ailerit Faraomut uvlâkut. Ahâk, kôngmut ainiarpok, igville nangeriartorit kôb sinânut utaᴋivlugo, ajaupiarlo ᴋuglugiangolauktok tigumiaraksarivat.
16Oᴋarvigijaksarivallo: Nâlekab Ebrêerit Gûdingata tilivânga ilingnut, oᴋautjaurᴋovlutit: Inuᴋotikka aularᴋokit, kivgartorvigijaksaringmanga inuᴋangitome. Kisiane mânna tikidlugo tusaromangilatit.
17Imâk oᴋarpok Nâlegak: Mattomunga tukisijuksauvotit, uvanga Nâlegaugama: Ahâk, ajaupiamut tigumiartamnut kôb imanga anaugupko, ablatsângorniarpok aungorlune.
18Mingeriat kôngmêtut toᴋolerniarput, kôglo tippiludlarniarpok, Egiptenemiullo maᴋojuginiarpât kôb imanga imerungnairlugo.
19Nâlegarlo oᴋarpok Mosesemut: Arone oᴋautileruk: Ajaupiaᴋotit tiguvlugo aggaktit isaktikit Egiptenib imangita ᴋollâtigut, kôngita kôgvingitalo tasingitalo tasekullungitalo ᴋollâtigut, aungortilugit; auᴋartuksauvorlo Egiptenemiut nunangane ilûnnâne, imektautine ilûnnaine ᴋejungnelo ujarangnelo.
20Tagva Mosese Aronelo taimailiorpuk, sorlo Nâlekab perᴋungmagik; ajaupiarlo silluktilugo kôb imanga anaungmago Faraub kivgangitalo sângane, tagva kôb imanga ilûnnane ablatsângorpok aungorlune.
21Mingeriallo kôngmêtut toᴋolerput; kôblo imanga tippiludlalermat, Egiptenemiut kôb imanga imerlugo ajulerpât; auᴋarporlo Egiptenemiut nunangane ilûnâne.
22Egiptenemiullo ilisimajoᴋotingit aglangnik taimailiorivuttauk angakonermingnut. Taimaimat Faraub ômatinga mangaitilerpok tusaromangilaglo, sorlo Nâlegak oᴋarmat.
23Tagva Farao uterlune angerarpok, tamannalo ômamiutaringilâlônêt.
24Egiptenemiullo ilûnnatik kôb avatâgut itersaliorput imiksamingnik imeksiorlutik, kôb imanga imerlugo ajoramitsuk.
25Uvlullo 7nit nâvut, Nâlegak anaunerᴋârtilugo kôngmik.
Currently Selected:
Exodus 7: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
