Genesis 44
44
Josefib ᴋatangutine ôktorpait.
1Tagva pimaklertoᴋotine perᴋovâ oᴋautilâlo: Angutit tâpkoa pôngit nerᴋiksanik tattakit ajungitanginik, ilûnatiglo attunit kênaujangit ᴋalliutivlugit pônginut.
2Ermguseralo, ermguseᴋ silbereojoᴋ, nukardlerpâb pônganut ᴋalliutijaksarivat, kênaujallo ᴋaᴋᴋôjaksarsiniutigijangit. Taimailiorporlo, sorlo Josefib oᴋarvigingmago.
3Kaulermalle, angutit tâpkoa siuterᴋortojoᴋotingillo aularᴋovait.
4Iglugasaksoarnille anisimangmatta, ᴋanitomêtilugit sulle, Josefib pimaklertoᴋotine oᴋautivâ: Attê, tuavilutit angutit taipkoa udlakit; angukungnelo oᴋarvigijaksarivatit: Sôᴋ ajungitoᴋ ajortomut akkiniarpisiûk?
5Tâmnaungilâᴋ nâlekama imervigijanga nalautaijutigijangalo? Idluitulivose taimailiorapse.
6Angugamigillo, oᴋautsit tamakkoa oᴋautigivait taipkonunga.
7Kiovâlle: Sôᴋ angajoᴋâvut taimaitunik oᴋauseᴋarᴋâ? Taimailiorneᴋ ajornarpoᴋ kivgarnut.
8Takkuit, kênaujat pôptingne ᴋalliutisimajut nagvâraptigik, uttertipavut illingnut nunamit Kânaanemit. Sugapta nâlekavit iglunganit silberemik goldemiglônêt tigliktuksaunajarᴋitâ?
9Kivgavit nalliat mattominga nagvârviojoᴋ toᴋotaksauvoᴋ, amma uvaguttauᴋ kivgaujomavogut nâlegaptingnut.
10Oᴋautivait: Sorlo oᴋarapse taimaile. Nalliat mattominga nagvârviojoᴋ kivgaujuksauvoᴋ uvamnut, illipsele kivgauniangilase.
11Tuavilutiglo ilûnatik pôtik illivait nunamut, ilûnatiglo pôtik ᴋelarudjârpait.
12Kenerasuarporlo angajuklerpâb pônganit pigiarlune nukardlerpâb pônganut tikkidlune; ermguserlo Benjaminib pôngane nagvârtauvoᴋ.
13Tagva annorâtik alikpait, siuterᴋortojoᴋotitiglo ussilertormivlugit, ilûnatik iglugasaksoarnut utterput.
14Judalo ᴋatangutingillo iterput Josefib iglunganut tagvanêtilugo sulle, pâmakterpullo sânganut.
15Josefible oᴋautivait; Sugapse taimailiorᴋisê? Kaujimangilasê, angut uvaptun-itoᴋ nalautaijungnarmât?
16Juda oᴋarpoᴋ; Sumik oᴋartuksauvitâ attaniptingnut? Kanorlo oᴋauseᴋartuksauvitâ? Kanorlônêt idluarsitilutâ? Gûdib kivgavit idluituliningit nagvârpait. Tagga! attanimnut kivgaulerpogut uvagut tâmnalo ermgusermik nagvârviojoᴋ.
17Oᴋarporle: Taimailiorneᴋ ajornarpoᴋ uvamnut. Ermgusermik nagvârviojoᴋ tâmna kivgaujuksauvoᴋ uvamnut, illipsele ullapirᴋsauteᴋarluse paungaritse atâtapsingnut.
18Tagva Judab sângerpâ oᴋarlune: Attaneng-ai? kivgat oᴋâlagalâlauletôᴋ attanera tussartilugo, ningaumajârnîllo katsungainiaranetôᴋ kivgarnut, Faraotut igalloaravit.
19Attanerma kivgatit aperingmagit oᴋarlune: Atâtaᴋarᴋisê ᴋatanguteᴋarluselônêt?
20Kiovogut tagva attaniptingnut: Itomik atâtaᴋarpogut, inôsuktoᴋarivoᴋtauᴋ inutoᴋauningane inôlertomik; tâpsoma angajua toᴋovoᴋ, kissime amiakôvoᴋ anânaminit, atâtangatalo nagligidlarpâ.
21Tagva kivgatit oᴋautivatit; Tamaungartisiuk uvamnut, takojomagapko.
22Uvagulle oᴋarpogut attanimnut: Inôsuktub atâtane ᴋemaklugo sapperpâ; ᴋemakpago, atâtanga toᴋolerajarpoᴋ.
23Tagva oᴋarpotit kivgarnut: Nukase tamaungarᴋatigingikupsiuk, kênara takojaksaringilase.
24Tagva paungarpogut kivgarnut atâtamnut, ᴋaujitilugo attanima oᴋausinginik.
25Atâtaptalo oᴋautivâtigut; Aularmititse, nerᴋiksagalâmik pisiniutivluta.
26Kiovogulle; Attersarluta ajorpogut. Nukavut illagiguptigo kissiane attersaromavogut, angutib taipsoma kênanga takojaksaringinaptigo nukavut illaginago.
27Tagva kivgavit atâtama oᴋautivâtigut: Nelungilase nuliara maggungnik erningmat uvamnut:
28Aipâ uvamnit aularsimavoᴋ, oᴋarpungalo: Aliktorsimajoᴋ, nalonalungilaᴋ; takojungnaipara mâna tikkidlugo.
29Unatauᴋ uvamnit aularutikupsiuk ᴋanoetomullo tikkitaupat, uvanga ᴋêrtojunga kanungartinajarpapsinga toᴋungajut inninganut kiksarnermut.
30Kivgarnut atâtamnut mâna angeraruma inôsuktoᴋ illaginago, (tarningata ôma tarninga ungagidlarmago).
31Imainiarpoᴋ: Takogune, inôsuktoᴋ saᴋᴋijârungnairmat, toᴋolerajarpoᴋ, uvagullo kivgavit atâtavut kivgait ᴋêrtojoᴋ kanungartinajarpavut toᴋungajut inninganut kiksarnermut.
32Kivgait oᴋarpoᴋ atâtamnut inôsuktoᴋ akkisartoromavlugo, oᴋarlunga: Illingnut uttertingikupko, inôsera nâvlugo passijaksaujutigijomavara.
33Tamanna pivlugo kivgat attanimnut kivgauvlune tamânêle inôsuktoᴋ simerdlugo, inôsuktorle paungarle ᴋatangutine illagivlugit.
34Sugama atâtamnut paungartuksauvêk inôsuktoᴋ illaginago? Kapianartoᴋ atâtama tikkitautigijanga takojariaᴋarajarpara.
Currently Selected:
Genesis 44: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
