Genesis 47
47
Jakokut nunaᴋarput Goseneme.
1Josefiblo Farao ᴋaujititsartorpâ oᴋarlune: Atâtagalo ᴋatangutikkalo saugaᴋutingillo tuktuvaᴋotingillo perᴋutingillo ilûnatik tikkiutivut nunamit Kânaanemit; ahâglo, Gosenemêput.
2Katangutiminillo tamainit tallimat tiguvait pitilugit Faraub sânganut.
3Faraublo ᴋatangutingit aperivait: Sumik inôgutiksarsijuteᴋarᴋisê? Kiovât: Kivgatit saukanik mianersijôvut uvagullo sivorlivullo.
4Oᴋarivullo Faraomut: Tikkisimavogut tujormiangoniardluta nuname, kivgaᴋotivit saugaᴋotingit nerrinasugviksaᴋarungnairmatta, kângnartoᴋsoaᴋ sugaluluarmat nuname Kânaaneme. Taimaimat kivgatit mâna Goseneme nunaᴋarᴋolaukittôᴋ!
5Faraublo Josefe oᴋautivâ, oᴋarlune: Atâtallo ᴋatangutitillo tikkiutingmatta illingnut,
6Egiptene ilûnane attuinauvoᴋ illingnut; nunab illangane ânanaunerpâme nunaᴋartikit atâtallo ᴋatangutitillo, illa, Goseneme nunaᴋarlit. Kaujikuvillo, akorngane piloriktunik anguteᴋarmat, nergjuteᴋotimnik kamajingortikit!
7Josefiblo atâtane Jako itertipâ, Faraub sânganut pitilugo. Jakublo Farao saimauserpâ.
8Faraublo Jako aperivâ: Jârit inôvigijatit ᴋapsiovât?
9Jakub Farao kiovâ: Jârit tujormiangovigijakka tagva 130: ikiput ajularmiglo jârit inôvigijakka, inorlugit jârit sivorlima inôvigijangit tujormiangovigijangit.
10Jakublo Farao saimauserpâ, tâpsomangallo anivoᴋ.
11Josefiblo atâtane ᴋatangutinelo nunaᴋartipait nunaᴋuteᴋartilugit Egipteneme, nunab illangane ânanaunerpâme, Ramesesib nunangane, Faraub perᴋojanga maliklugo.
12Josefiblo atâtane ᴋatangutinelo atâtamelo inuᴋotingit tamaita nerᴋiksanik pitatserpait soruseᴋarningit maliklugit.
13Nerᴋiksaᴋarungnairporlo nuname ilûnâne; kângnartoᴋsoaᴋ sugaluluarmat, Egiptenemelo Kânaanemelo perlerput kângmut.
14Josefiblo kênaujat tamaita Egiptenemêtut Kânaanemêtullo, ᴋaᴋᴋôjaksat pisiat akkingit, katitipait, Josefiblo kênaujat Faraub iglunganut pitipait.
15Kênaujallo nungungmatta Egipteneme Kânaanemelo Egiptenemiut ilûnatik Josefe tikkipât oᴋarlutik: Nerᴋiksaptingnik tunitjivigitigut! Sôᴋ takkungne perlertuksauvitâ, kênaujat nungunermatta?
16Josefib oᴋautivait: Nergjuteᴋotise ᴋaisigik, tagva nerᴋiksanik, nergjuteᴋotipse akkiksanginik, tunitjivigijomavapse, kênaujat nungunermatta.
17Tagva nergjuteᴋotitik tikkiutivait Josefemut; horsillo saukallo, tuktuvaillo siuterᴋortojullo, akkilerlugit Josefib nerᴋiksanik tunitjivigivait. Taimaglo nerᴋiksanik pitatserpait jâreme tamattomane, nergjuteᴋotingit tamaita akkilerlugit.
18Jâre tamanna nângmat, jârib aipangane amma tikkinivut tâpsomunga, oᴋautivlugo: Attanivut angigutijomangilavut, kênaujat nungungmatta, nergjuteᴋotillo pisiangongmatta attaniptingnut, amiakoᴋangilaᴋ attaniptingnut, timiptingnik perorsêviptingniglo kissênik.
19Sôᴋ takkungne perlertuksauvitâ perorsêvivullo asserortuksauvlutik? Pisinialaurit uvaptingnik perorsêviptingniglo, nerᴋiksanik akkilerluta, tagva kivgauniarpogut Faraomut uvagullo perorsêvivullo. Karngasûtiniktauᴋ tunitjivigilaungmitigut, inôrᴋovluta toᴋolerᴋonatalo perorsêvivullo asserulerᴋonagit!
20Tagva Josefib Egiptenemiut perorsêvingit tamaita pisiarivait Faraomut, Egiptenemiut ilûnatik perorsêvitik niorvgutigingmagit, kângnartoᴋsoaᴋ sugaluluarmat tâpkonunga. Taimaglo Faraub nuna perᴋutigilerpâ.
21Inuillo nûtipait iglugasaksoarnut Egiptenemiut nunangita issuklianit issukliata aipânut.
22Ajoᴋertuijulle perorsêvingit kissêta pisiaringilait, ajoᴋertuijunut piksaᴋarmat Faraomit, nerᴋiksaᴋarpullo taipkonunga ilingajomik, Faraub tunivaktanginik. Tamanna pivlugo perorsêvitik niorvgutigilungilait.
23Josefiblo inuit oᴋautivait: Okoᴋsê, uvlome illipsingnik perorsêvipsingniglo pisivunga Faraomut. Tagga, karngasûtiksat piksase, perorsêvît karngasoivigisigik.
24Imailingajuksauvorlo katersortaujomârtut pivlugit: (tallimaulivlugit) Tallimangit atausît tunijaksarivase Faraomut, tellimangille sittamat illipse piksarivase: karngasûtiksat perorsêvingnut, nerᴋiksase inuᴋotipselo ᴋitorngapselo nerᴋiksangit.
25Oᴋarput: Inûlivaptigut illa! Saimaneᴋsituinarta attanipta sângane, tagva kivgauniarpogut Faraomut.
26Josefiblo Egiptenemiut ilusiksaᴋartipait perorsêvît pivlugit uvloᴋ tamanna tikkidlugo, tellimangit tunivlugit Faraomut. Ajoᴋertuijut perorsêvingit kissêta pinagit, tâpkoa Faraub perᴋutigingilait.
27Israêlikullo nunaᴋalerput Egipteneme nuname Goseneme. Tamanna nunaᴋutigivlugo kinguvâktârᴋattarput unuksivalliavlutik.
28Jakolo Egipteneme inôvoᴋ jârinik 17nik; jârillo inôvigijangit tagva 147.
29Israêlible toᴋoviksanga ᴋaglilermat, ernine Josefe ᴋairᴋovâ oᴋautivlugolo: Saimaneᴋsiguma illingne, tagva aggatit sibviamnut illilaukit, (nallonaijaivlutit) nelâgut nagligigamga; iluverniarnangatôᴋ Egipteneme!
30Sivorlikka iluverᴋaᴋatigijomavakka, Egiptenemillo âtaksarivarma, taipkoa iluvinganut illivlunga. Oᴋautivâ: Taimailioromavunga sorlo oᴋaravit.
31Oᴋarivorlo: Angimarigviginga! Angimarigvigivâlo. Israêlelo inangavingmine egarpoᴋ akkitiminut.
Currently Selected:
Genesis 47: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
