Lukase 16
16
Adsiujomik pimaklertomik idluangitomik. Jêsusib oᴋâlaninganik Farisêerinut. Angumik akluitomik Lazarusemiglo aklujomik.
1Ilinniartineletauk oᴋautivait: Akluitomik anguteᴋalaukpok pimajeᴋartomik perᴋutiminik; tâmna unneᴋsiornerlûtigivât tâpsomunga perᴋutinginik nungutsijok.
2Angajoᴋângatalo ᴋaiᴋovâ oᴋautivlugo: Tussartara ilingnik ᴋanok ilingavâ? Pimajatit katiniakit nalonaililugillo; mattoma kingorngane pimaklerungnaituksaugavit perᴋutimnik.
3Pimaklertok ilumigut oᴋalerpok: ᴋanok piniartuksauvêk? Angajoᴋâma pimaklerᴋojungnairmanga; poagrejaromangilanga, ᴋenunermiglo kangusukpunga.
4Suliaksamnik nalungikalloarpunga, ilaliortauᴋovlunga iglunginut, pimaklerᴋojaujungnairuma.
5Tagva angajoᴋâminut akkiliksaᴋartut tamaita kingorlerêktilugit ᴋaiᴋovait, sivorlerlo aperivâ: ᴋapsinîk akkiliksaᴋarᴋêt angajoᴋâmnût?
6Oᴋarpok: Orᴋsoktalingnik ᴋattaujanik 100 inik. Oᴋautivâlo: Akkiliksaᴋautitit tigukit, ingidlutillo aglaksârit 50 nik.
7Ama aipanganut oᴋarpok: ᴋapsinik akkiliksaᴋarᴋêt? Oᴋarpok: Sanaugaksamik ôktut 100 ertorlugo. Oᴋautivâlo: Akkiliksaᴋautitit tigukit aglaklutillo: 80 ertorlugo.
8Angajoᴋâblo pimaklertok tâmna idluitok nertorpâ, silatujotut piniarmat. Mattoma silaksûb ᴋitorngangit ilusimingnik silatunersaungmatta ᴋaumajub ᴋitornganginit.
9Oᴋaupapselo: Ilannâksarsiniaritse nunab pinginut idluangitunut, ajoksarupse ilaliortauᴋovluse iglunginut nâksaungitunut.
10Mikijomik nelâgôrtok, nelâgôrivok angijomik, mikijomiglo piniarnerluktok, angijomiktauk piniarnerlukᴋivok.
11Nunab pinginik idluangitunik nalâgôngikupse, kia pimaklerᴋojomavâsê pijarialingmîk?
12Pigingitapsingniglo nalâgôngikupse, kia tunitjivigijomârpâse nangminiksapsingnîk?
13Angajoᴋângnut maggûngnut Kivgartortoᴋarungnangilak; aipâ ômigilârpâlônêt, aipâ nagligilugo; ubvalo aipâ ungagilârpâ, aipanga nachogilugo. Gûdelo nunab pingillo atautsikut kivgartorungnangilase.
14Tamakkoa tamaita Farisêerit pijomatudlartut tussaramigit, mitautigivât.
15Oᴋautivaillo: Ajungitôjomagalloarpose inuit sângane Gûdible ômatise ilitarivait; inungnut nertortaujomajut Gûdib maᴋojugivait.
16Perᴋojat nalautaijullo nalautsivut Johannese tikidlugo: mattomalo kingorngane Gûdib nâlegauvia oᴋautaulerpok oᴋautsinut tussarnertunut, ilûnatiglo ᴋerdlâᴋaratik iterniarput.
17ᴋilak nunalo nungunersauniarpuk, tittaub atautsib perᴋojanêtub pêrninganit.
18Nuliaminik avitsijub, assianiglo nulianiklune, nuliarêngnek asserorpâ; avitamiglo nulianiktub nuliarêngnek asserorivâ.
19Akluitomigle anguteᴋalaukpok, annorârpaktomik aupaloriktunik sâtuniglo pivianartovaksoarnik; uvlullo tamaita inûnatsoridlarlune ᴋuviasukpok.
20Aklujoᴋarivorlo tagvane, Lazarusemik atelingmik; tâmna itervingata kiglingane nalavok, ilûnâne ajuadlartok.
21Nerrititaujomavorlo karnganerlukunik akluitub nerrimârvianit kataktunik; ᴋingmille aluktoriartorpait ajuangit.
22Aklujorlo toᴋungmat, Engelit âpât Abrahab sânganut. Akluitorle toᴋogivok, iluvertauvorlo.
23Ânianartoksoarme kappianartovingmêdlune uitalerpok, Abrahalo takovâ ᴋaningitomit, Lazaruselo sarliartanga.
24ᴋaigarsulerpok oᴋarlune: Atâtak Abraha, nâpkiginga, Lazaruselo tiliuk, tikime nuvua imermut misuᴋârlugo, oᴋara nigliterliuk; mattomunga ikomaksoarmut âniadlarama.
25Abrahable oᴋautivâ: Ernîk, erᴋaumagit, inôtilutit ajungijutitit pilaurangne: Lazarusele kappiaktoadlalauktok mâna manigortauvok, igville âniatitauvotit.
26Tamannalo tappidlugo akunaptingne itersaksoaᴋarpok; tamângat ilipsingnut ikâromajut saperput, taimâktauk uvaptingnut ikâromajut ilipsingnit saperivut.
27Tagva oᴋarpok: Tamanna pivlugo tuksiarvigivagit, atâtaᴋ, tâpsominga tiliklerᴋovlutit atâtama iglunganut.
28Sulle ᴋatanguteᴋarama tallimanik; kigligiutserᴋovlugo tâpkonunga, ânianartovingmut tamattomunga perᴋonagittauk.
29Abrahab oᴋautivâ: Môsesib nalautaijullo aglanginik peᴋaramik; ipkoa nâlakligit!
30Oᴋautivâle: Aukak, atâtak Abraha, toᴋungajulle ilangata tikipagit, ᴋaᴋialerajarput.
31Oᴋautivâ: Môsese nalautaijullo nâlengikunigit, okperajanginivuttauk, toᴋungajunit makitoᴋarpat.
Currently Selected:
Lukase 16: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
