Lukase 15
15
Adsiujunik pingasunik: Saugamik tamarsimajomik, kênaujamiglo tamaijaumajomik, ernermiglo assiosimajomik.
1Pimaklertit idluitulijullo tikipât, tussaromavlugo.
2Farisêerille aglangniglo ilisimajut avamudlarput oᴋarlutik: Oma ajortulit ilaliorpait nerreᴋatigilugillo.
3Adsiujomigle mattominga oᴋautivait, oᴋarlunelo:
4Kia ilapse sauganik piliub 100 inik, taipkoa ilangat tamaiguniuk, 99 it ᴋemangniangilagît inuᴋangitomut, tamartorlo ᴋeneriartorniangilauk nennerᴋârnagô?
5Nenniguniuglo tuimikpâ ᴋuviasuklune.
6Tikileramelo, ilane silalinelo ᴋaiᴋovait, oᴋautivlugit: ᴋuviasuᴋatigisinga, saugara tamalauktok nennigapko.
7Oᴋaupapse: Taimâktauk ᴋilangme ᴋuviasutaugivok idlui tulijok atausek ᴋaᴋialertok, 99 nit idluartunit ᴋaᴋialeriaᴋangitunit.
8Arnablônêt kia tallimaujortunik kênaujaliub, tâpkoa ilangat assiojiguniuk, nennergoamik ikitsiniangilâᴋ iglo sanerdlugo, katsungaitomiglo ᴋenerajangilaûk nennerᴋârnagô?
9Nenniguniuglo, ilannârijane silalinelo arnat ᴋaiᴋovait, oᴋautivlugit: ᴋuviasuᴋatigisinga, kênaujara assiojilauktara nennigapko.
10Oᴋaupapse: Taimâktauk, idluitulijok ᴋaᴋialerangat, Gûdib Engelingita ᴋuviasûtigivât.
11Oᴋarporlo: Anguteᴋalaukpok maggûngnik ernilingmik.
12Nukardliublo atâtane oᴋautivâ: Atâtak, perᴋutingnit pijaksakka pilakka. Perᴋutine tâva avikpait tâpkungnunga.
13Uvlullo ikitut nângmatta, nukardliub perᴋutine tamaita katilerpait, nunamullo ungasiktomut aularpok; tagvanelo perᴋutine nungupait Kuksalaitomik inôseᴋarlune.
14Perᴋutine tamaita nungulaungmagit ᴋângnartoksoak pigialerpok nuname taipsomane ilûnâne, tâmnalo ajoksalerpok.
15Nunablo taipsoma inungita illanganut tikipok; tâpsoma kivgarilerdlugo aulartipâ perorsêvingminut, kuingêngit mianerilugit.
16Aᴋeartoromagalloarporlo kuingêngit nerᴋiksanginik, tunitjivionanelo tâpkoninga.
17Tagva issumamigut erᴋailerpok oᴋarlunelo: Unuktunik atâtaga ikajorteᴋarpok nerᴋiksamik ajoksangitunik, uvangale ᴋângmut perlilerpunga.
18Parngnaileromavunga, atâtamnullo aijomavlunga oᴋautivlugolo: Atâtak, idluitulilaukpunga Gûdemut ᴋilangmêtomut ilingnullo,
19Kingorngane ernernik taijaunermik nelopᴋotivunga; ikajortivît ilangatitut ilingatilaunga.
20Aulalerporlo atâtaminullo tikilune. Sullele ungasiktomêtilugo, atâtangata takovâ, nâpkuarivlugolo, aᴋpangerdlunelo ᴋongasingagut erᴋipâ kuniklâlo.
21Erningatale oᴋautivâ: Atâtak, idluitulilaukpunga Gûdemut ᴋilangmêtomut ilingnullo; mattoma kingorngane ernernik taijaunermik nelopᴋotivunga.
22Atâtangale kivgaminut oᴋarpok: Annorâk pinnarnarnerpâk ᴋaisiuk, atitisiuglo, aggangillo ᴋeterdlermingmik pitatsersigik, atitilugolo itigâlungnik.
23Nocharmigloᴋoinijomik ᴋaitsigitse toᴋotsiluselo, nerrilutalo ᴋuviasukta!
24Ernera tâmna toᴋolauralloardlune ama ômarmingmat; assiosimalauralloarpok, nagvârtauvorlo. ᴋuviasulerpullo tâva.
25Erningale angajuklek perorsêvingmêpok; iglolo ᴋaglileramiuk, katimajut imgertoᴋatigêt tussarpait.
26Kivgallo ilangat ᴋaiᴋovâ, aperivlugolo sunaumangât.
27Tâpsoma oᴋautivâ: Nukat tikipok, atâtallo nocharmikᴋoinijomik toᴋotauᴋojivok, ernine ᴋanoengitok ama pigamiuk.
28Angajua tagva anûlerpok iteromananelo. Tagva atâtanga anivok innalâllo.
29Atâtanele kiovâ oᴋautivlugo: Jârinik unuktunik kivgartulaukpagit, perᴋojatillo ilûnaita nâlelaukpakka; saugamiglo angutsoarmik ᴋaitsilaungimarikpotit uvamnut, ᴋuviasuᴋovlunga ilannârijakka ilagivlugit.
30Ernîlle tâmna tikingmat, perᴋutiminik nungutsijok arnarniarnermut, nocharmik ᴋoinijomik toᴋotauᴋojivotit tâmna pivlugo.
31Atâtangatale oᴋautivâ: Ernîk, najutsainarparma, perᴋutikkalo tamaita pigivatit;
32Serrilutillo ᴋuviasuktuksaugalloarpotit; nukat una toᴋungalauktok ama ômarmingmat; assiosimalauktorlo nagvârtaumingmat.
Currently Selected:
Lukase 15: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
