Lukase 7
7
Jêsusib âᴋêninganik sorsuktuksat angajoᴋângata kivganganik. Inôsuktub Nainemiub tupaktitauninganik. Johannesib tiliklerninganik ilinniartiminik Jêsusemut. Jêsusib mingoartauninganik arnamut ajortulijomut.
1Oᴋâlaninele inuit sângine nâgamigit, Kapernaumut aivok.
2Sorsuktuksallo angajoᴋângita ilangata kivganga erdligijanga ᴋanimavok toᴋokasâklune.
3Tâmnale Jêsusemik tussaumalerame, Jûdit angajoᴋângit (Jêsusemik) tuksiariartorᴋovait, kivganganik âᴋêjartorᴋovlugo.
4Ipkoale Jêsuse tikinamitsuk, katsungaidlutik tuksiarvigivât, oᴋarlutik: Tâmna pijariaᴋarpok taimailiorvigivlugo.
5Inuᴋativut naglingmagit, katimavivullo sanalaungmago.
6Jêsusiblo tagvunga ilagivait. Iglungale ᴋaglilermatsuk, sorsuktuksat angajoᴋângata ilannârijame ilangit (Jêsusemut) oᴋariartorᴋovait: Nâlegak, tagvungarasuarnak, nalopᴋotivunga ilingnik itertitsinermik iglumnut.
7Taimâk pivlugolo nalopᴋotivunga ilingnut ᴋainermik; oᴋarille oᴋautsemik atautsemik, tagva kivgara pijungnainiarpok.
8Uvangatauk inôvunga atanilik, kivgaᴋarlarmalo sorsuktuksanik; ilanganullo oᴋaruma: Ailerit, aivok tâva; assianullo: ᴋait, ᴋaivok tâva; kivgamnullo: Sanalauruk una, sanavâ tâva.
9Jêsusible tamanna tussaramiuk, tataminiarivâ, ᴋeviarlunelo inuit maliktine oᴋautivait: Oᴋaupapse, taimâk angitigijomik okpernermik nagvâlaungilanga Israêlitine.
10Tililauktangillo iglunganut tikinamik, kivgak ᴋanimalauktok pijungnairtok naipipât.
11Mattoma kingorngagut iglugasangnut Nainemik atilingnut aivok; ilinniartingitalo unuktut, inugasaksuillo illagivât.
12Iglugasaille itervingat tikilermago ahâk, Toᴋungajomik anititsivut akigarlugo; anânangatalo tâmna ernetuarivâ, uigarniolarmelo; inugasaksuillo ilagivât iglugasangnit.
13Nâlekablo takogamiuk, ilapsugidlarpâ, oᴋautivlugolo: ᴋeanak!
14Kanilerdlugolo iklervik aktorpâ, akigartullo nokᴋarput. Jêsuselo oᴋarpok: Nukapiak, oᴋaupagit, makitit!
15Toᴋungajorlo makipok, oᴋalilarmelo. Anânanganullo tunivâ.
16Ilûnatiglo erᴋsilerput, Gûdelo nakoridlarpât, oᴋarlutik: Nalautaijoksûb tikipâtigut, Gûdiblo inuᴋotine nelipsarpait.
17Oᴋautsillo tamakkoa tâpsominga tussaumajaulerput Jûdêame ilûnâne, nunanelo avalingine ilûnaine.
18Tamakkoa tamaita Johannesemut ilinniartingita unipkautigivait. Maggûngniglo ilinniartiminit ᴋaiᴋojivok,
19Taipkoalo Jêsusemut tilivak, aperijauᴋovlugo: Tâmnauvêt tikituksak, assingniglônêt nerriugijaksaᴋarpitâ?
20Angutîgle taipkoa Jêsuse tikinamikko, oᴋarpuk: Johannesib baptiterijub tilivâtiguk ilingnut, aperijauᴋovlutit: Tâmnauvêt tikituksak, assingniglônêt nerriugijaksaᴋarpitâ?
21Stundemele taipsomane ᴋanimajut âniajullo unuktut âkikpait, anernerillo idluitut anitipait, tautungitullo unuktut tautuktidlugit.
22Jêsusiblo kiovak oᴋautivlugik: Johannese ama oᴋautijartortikko takojaptingnik tussartaptingniglo: Tautungitut tautulerput, tusiaktut pisulerput, kaladlartullo kalagunairput, tussângitullo tussalerput, toᴋungajut makiput, aklujullo oᴋautjauvut oᴋautsinik tussarnertunik;
23Piloridlarporlo sinaungajuteᴋalungitoᴋ uvamnik.
24Johannesible tilijâgik utermannik, Jêsuse oᴋalerpok inungnut Johannesemik, oᴋarlune: Inuᴋangitomut suna takojartorpisiûk? Iviksoak anorib aulatanga sunatuinarnût?
25Sunalônêt takojartorpisiûk? Inuk annorâtsiariktok takojomavisiûk? Ahâk, annorâtsiariktut ikligijatiglo maliklugit inôniartut, atanersuit iglunginêsôngovut.
26Sunalônêt aniluse takojartorpisiûk? Nalautaijok takojomavisiûk? Ilâ, oᴋautivapse, nalautaijomit anginersaujok.
27Tâmnauvok aglait oᴋautigijangat: Ahâk, Engeliga kênavît sivorngagut tilivara, apᴋotiksarnik sivunerne âᴋiksoijuksak.
28Oᴋautivapsele, arnanit erniangomajut akorngane Nalautaijoᴋangimat Johannesemit baptiterijomit anginersaujomik; mingnerle Gûdib nâlegauvingane, anginersauvok tâpsomangat.
29Inuillo nâlektingita ilûnatik pimaklertillo Gûde nakoridlarpât, baptitauᴋolutiglo Johannesib baptijutânut.
30Farisêerille aglangniglo illisimajut Gûdib perᴋojininga nachogivât ingmingnut, baptitaujomanatiglo tâpsomunga.
31Nâlegarle oᴋarpok: Inuit ukkua kimut adsiutitaksarivakkâ? Kimiglônêt adseᴋarᴋât?
32Sorutsit adsigivait, iglut akorngane iksivajut ingmingnullo nipliuteᴋattartut oᴋarlutik: Nipjausijarviglaukpapse, oᴋigêseromangitoselo; kiksarnartomiglo oᴋautilauralloarpapse, ᴋeajomangitoselo.
33Johannese baptiterijok tikitok, ᴋakᴋôjaktoranelo vainemiglo imingimat; Sâtanaseᴋartomik oᴋarpose.
34Inûb Erninga tikisimavok, nerrilarmelo imilarmelo, tagva oᴋarpose: Ahâk, inuk una nerritojoksoak, vainemiglo imertojoksoak, pimaklertit idluitulijullo ilannârijingat.
35Gûdible illisimaninga idluarijaujariaᴋarpok ᴋitorngaminut.
36Farisêerille illangata innapâ nerreᴋatiᴋumavlugo. Farisêeriblo iglunganut iterpok nerrimârvingmullo ingipok.
37Ahâglo, tagvane iglogasaksoarnêtoᴋarpok arnamik ajortulijoksôlauktomik. Tâpsoma, Jêsusemik Farisêerib iglungane nerrimârvingmut ingitomik tussarame, publaujak mingoarutemik (tipitsiariktomik) imalik tikiutivâ,
38Itigangitalo tunuanut pivok, ᴋealarmelo, ᴋugviminullo itigangit mitsuktilerpait, allartilaitalo nujaminut, itigangillo kunikpait, mingoarlugillo tipitsiariktomut.
39Farisêerible nerrijartorᴋojingata tamanna takogamiuk, ilumigut issumalerpok oᴋarlunelo: Una nelautaijôgune, arnak una aktortine ᴋaujimanajaralloarpâ, ajortulijoksôngmat.
40Jêsusiblo kiovâ oᴋautivlugo: Simon, oᴋausiksaᴋarpunga ilingnut. Taimnale oᴋarpok: Ajoᴋertuijok, oᴋarit.
41Akkiliksarviojoᴋalaukpok akkiliksalingnut Maggûngnut, aipanganut kênaujanik 500 nik, aipanganullo kênaujanik 50 nik.
42Akkiksaᴋalungimanigle, akkilêrᴋojungnairpak. Ate, oᴋarit, taipkua neliakita nagliginersariniarpaûk?
43Simonib kiovâ oᴋarlune: Issumavunga, ununersanik akkilêrᴋojungnaitangat. Jêsusible kiovâ: Idluartomik erᴋartuivotit.
44Arnamullo sâdlune, Simonemut oᴋarpok: Arnak una takoviûk? Iglungnut itertunga imermik itikama ubvautiksanganik tunitjivigilaungilarma: ômale itigakka ᴋausertipait ᴋugviminut, allartilaitalo nujaminut.
45Igvit kunilaungilarma; ômale iterame, sorairane itigakka kunikpait.
46Igvit niaᴋora napârtub orᴋsuanik mingoanginivat, ômale itigakka mingoalaukpait tippitsiariktomik.
47Tamanna pivlugo oᴋaupagit: Ajortunit unuktunit issumagijaujungnaineᴋarpok, angijomik naglilaurame; ikitunille issumagijaujungnaineᴋartok mikijomik naglikpok.
48Arnamullo oᴋarpok: Ajornitit issumagijaujungnairput.
49Tagva nerreᴋatingit ilumikut oᴋalerput: Kina una, ajortunittauk issumangnarungnaititsijôk?
50Arnamulle oᴋarpok: Okpernivît ikajulaukpâtit; ullapirsauteᴋarlutit aularit!
Currently Selected:
Lukase 7: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
