Lukase 9
9
Aposteliminik Kristûsib tiliklerninganik. Herôdesib issumanginik Jêsuse pivlugo. 5,000 it nerrititauninginik. Ilinniartut kigligiutjininginik Kristûse pivlugo. Jêsusib nalautaininganik âniaminik toᴋominiglo. Ananausititauninganik ᴋakᴋame. Aᴋêninganik Sâtanasilingmik. Ilinniartit anginersaujomautinginik. Zebedêusib ernîkita illungertorningangnik. Jêsusemik malingnerub ilingajuksauninganik ᴋanok.
1Ilinniartinele 12 it ᴋaiᴋolerpait, pitsartunermilo nâlegaunermiglo Sâtanasinut tamainut tunitjivigivait, ᴋanimasiniglo âᴋêjungnarᴋovlugit.
2Oᴋâlajartorᴋovaillo Gûdib nâlegauvinganik, âᴋêᴋovlugillo ᴋanimajunik.
3Oᴋautivaillo: Ingergarluse sumik neksartuksaungilase, ajaupiamiglônêt, ikpiârsungmiglônêt, ᴋakᴋôjaniglônêt, kênaujaniglônêt; maggûngniktauk annorâᴋartoᴋartuksaungilak.
4Iglomut iterupse, tagvanêtitse aularᴋârase tagvangat.
5Ilangitalo ilalioromangipase, anititse tagvangat iglugasaksoarnit, itikapselo saningit katerarsigik nalojungnairutiksanginut (erᴋartortaujutiksanginullo).
6Aularput tagva, iglugasaktigut ingergarlutik oᴋautsiniglo tussarnertunik oᴋâlavut, ᴋanimajullo âᴋikpait ilûnâne.
7Herôdesele, nunab illainangane ataniojok, Jêsusib piniarninginik tussaumalerpok, issumamigullo issumajâlerpok, ilangita Johannese toᴋungajunit makisimajoᴋ oᴋautigingmatsuk.
8Ilangille oᴋarput: Elîase takotipok; ilangille: Nalautaijotoᴋavinît illangat makisimavok.
9Herôdeselo oᴋarpok: Johannese niaᴋoêrtautilaukpara; taimnale kinauvâ, tussaumajara taimaitomîk? Taimâk pivlugo takojomadlarivâ.
10Apostelillo utermigamik tâpsomunga oᴋautigivait tatamnartitatik. Ingminullo pitilugit aularpok inuᴋangitomut, iglugasait Betsaidamik atilit erᴋânut.
11Inuille tamattominga malugosukamik, malikpât; ᴋaiᴋolugillo oᴋautivait Gûdib nâlegauvianik, âᴋiktaujariaᴋartullo âᴋikpait. Uvluklilermalle,
12Tagva 12 it tikipât oᴋautivlugo: Inuit makkoa aularlit, niuvervingnut avaliptingnut iglugasangnullo, siniktarviksarsiorᴋovlugit nerᴋiksarsiniarlutiglo; tamâne unuᴋajuitomênapta.
13Oᴋautivaille: Ilipse nerᴋiksamik tunitjivigisigik. Oᴋarput: Tallimainarnik ᴋakᴋôjaᴋarpogut, mingeriangniglo maggûngnik; inugasaksuit ukkua nerᴋiksanginik pisiniariartorlungikupta.
14Inuit 5,000 eongmatta. Ilinniartiminullo oᴋarpok: Ingilit tunulerêktidlutik, ingmiᴋôrdlutik 50 it, amatauk 50 it.
15Taimailiorput tagva ilûnatiglo ikterput.
16Tagva taipkoa ᴋakᴋôjat tallimat, mingeriâglo tiguvait, ᴋilangmullo ârlorpok, ᴋujalivlunelo avgorpait ilinniartiminut tunivlugit, manijerᴋovlugit inungnut.
17Ilûnatiglo nerrivut, kâgungnairlutiglo, amiakullo katersorpait, amârgaujat 7 it tattalugit.
18Kissîmeolerdlune tuksiarame, ilinniartingitalo kissimik najormatsuk; aperivait oᴋarlune: Inuit kinaunasugivângâ?
19Kiovât oᴋarlutik: Ilangita Johanneseonasugivâtit baptiterijok; ilangitale Eliaseonasugivâtit; ilangitatauk nelautaijut inutoᴋavinît illangat makkisimanasugivât.
20Oᴋautivaille: Ilipsele kinaunasugivisingâ? Tagva Pêtrusib kiovâ, oᴋarlune: Gûdib Kristûsegivâtit.
21Inerterpaille perᴋojivlunelo, oᴋautjerᴋonagit kimik tamattominga.
22Oᴋarporlo: Inûb Erninga âniatitaujariaᴋarpok sulle unuktunik, angajoᴋânullo ajoᴋertuijoksoarnullo aglangniglo ilisimajunut ajaktortaujariaᴋarpok, toᴋotauvlunelo, uvlullo pingajuangne makitsomârivok.
23Ilûnaitale oᴋautivait: Uvamnik maligomajoᴋarpat, issumaminik inôjomaniarane, saningajoliksaminiglo uvlut tamaita nangmarle, maliklungalo.
24Inôserminik ivlersijomajub, assiojijomârpâ, inôserminigle assiojijub pivlunga, piulijomârpâ.
25Inûblo suksarivaûk, silaksoak ilûnât piksarsiarigalloaruniuk, ingminiglo assiogune, ingminiglônêt asserorunê?
26Uvamnigle oᴋausimniglo kangusuktok, tâmna Inûb Erningatatauk kangugijomârpâ, tikikune ânanaunermine, Atâtamelo Engelillo ajungitut (ânanauningine).
27Âhamarik, oᴋautivapsele: Nangertut ovane ilangita toᴋo ôngniangilât, Gûdib nâlegauvianik takoᴋaratik.
28Tamattoma oᴋâlanerme kingorngagut, uvlut sitamaujortolermatta, Pêtruse Johanneselo Jakôbuselo ingminut pitilugit, ᴋakᴋamut tuksiariartorpok.
29Tuksiartilugolo kênangata tautua ablatsaulerpok, annorângalo ᴋaᴋorsidlarlune ᴋeblariktoᴋsôlerpok.
30Ahâglo, angutik maggûk oᴋaᴋatigivâk, tâpkua Môsese Elîaselo.
31Ananâvaksôvlutik sakᴋertuk, oᴋâlalutiglo naggaserninganik nâmaksitiksanganik Jerusaleme.
32Pêtrusele illagijâgiglo uerngarnermut sinilerput. Tuppakamigle, ᴋaumaninga takovât, angutiglo tâpkoa maggûk sanianêtuk.
33Tâpkoalo ᴋemangmakko, Pêtruse Jêsusemut oᴋarpok: Ajoᴋertuijok, tamanêtsainarominarpok; pingasunik igloliorta, ilingnut atautsemik, Môsesemullo atautsemik, Elîasemullo atautsemik. Oᴋautsinele ᴋaujimangilait.
34Taimâk oᴋartilugo, nuvujak ᴋaivok, uliklugillo; ᴋoaᴋsârpullo, nuvujab ulingmagit.
35Nippelo nuvujamit pivok, oᴋarlune: Tagga Ernera nagliktara, tâmna nâleksiuk.
36Nippelo tussaramitsuk, Jêsuse kissiat takovât. Angigutjilerpullo, oᴋaratik takojamingnik uvlune taipkonane.
37Uvlub aipangane, ᴋakᴋamit atersârmatta, inugasaksuit pagrearpait.
38Ahâglo, angut inuit akornganit niplialerpok oᴋarlune: Ajoᴋertuijok ᴋenuvigivagit, ernera takunâlauruk, ernetuarigapko.
39Ahâk, anernerub (ajortub) tigulerangago, tuavidlune niplialerpok, aulajârtidlalerangago ᴋapoalidlarpakpok; aulajârtidlalauramiuglo, kêta ᴋemalerpakpâ.
40Ilinniartitillo ᴋenuvigilaukpakka, anititauᴋovlugo, ajorpâlle.
41Tagva Jêsusib kiovâ oᴋarlune: Tata! Ukkua okpingitut mumiksimajullo kinguvângoᴋatigêt, ᴋanok sivitutigijomik najoriaᴋarpapsê, ᴋenuêvigijariaᴋarluselô? Ernît ᴋailauruk.
42Tikilermagolo, Sâtanasib aulajârtidlarlugo aksorotidlarpâ. Jêsusible anernek ivsornartok inerterpâ; soruserlo pijungnaitinamiuk, atâtanganut tunivâ.
43Ilûnatiglo Gûdib pitsartudlarninga kakilârutigivât. Ilûnatigle tataminiarmatta ilûnainik piniarninginik, ilinniartiminut oᴋarpok:
44Oᴋautsit ukkua siutipsingnut tussarsigik, Inûb Erninga pititaujariaᴋarmat inuit agganginut.
45Oᴋautsille ukkua nalojungnaingilait, nalovlugillo tukkisingilait, apersorlugolo ileragivât oᴋautsinik tamakkoninga.
46Issumalerpullo nalitik anginerongmangât.
47Jêsusible ômatingita issumangit ᴋaujileramigit, nutakᴋamik tigusivok, nangertilugolo saniminut.
48Oᴋautivlugit: Ominga nutakᴋamik illaliortub atimne, ilaliorivânga; uvamniglo ilaliortub, ilaliorivâ uvamnik tiliklertok. Ilipsingnele ilûnapsingne mingnerojok angijôjomârpok.
49Tagva Johannesib kiovâ oᴋarlunelo: Ajoᴋertuijok, angutemik takolaukpogut, atterne Sâtanasinik anititsijomik; inerterpavulle, illagiluta malingimatit.
50Jêsusiblo oᴋautivâ: Inerterasiuk; uvaptingnik akkerartungitub illagingmatigut.
51ᴋongmuartitauviksangale neliutilermat, kajusimalerpok Jerusalemut aijomavlune.
52Sivorliksanelo tilivait. Tâpkoa Samâriamiut iglugasanginut siniktarviksarsioriarpât.
53Taipkoale siniktarᴋojomangilât, Jerusalemut ingergalermat.
54Ilinniartîkitale Jakôbusib Johannesiblo tamanna tussaramikko, oᴋarpuk: Nâlegak, pijomaguvit, oᴋaromavoguk sorlo Eliase, ikomamik ᴋilangmit kataktoᴋarᴋovlugo, nungutauᴋovlugit.
55Jêsusible ᴋeviardlugik inerterpak, oᴋarlune: Anernerub ᴋanoetûb ᴋitorngaringmatik, ᴋaujimangilatîk?
56Inûb Erninga tikisimangilak inuit tarningit asseroromavlugit, piulijomavlugille.
57Iglugasaille assinginut aivut. Ingergavlutik ilangata oᴋautivâ: Maligomavagit aiviksarnut.
58Jêsusiblo oᴋautivâ: Terrianiat sitteᴋarput, tingmitjallo ᴋilaub atânêtut ubloᴋarivut; Inûble Erninga peᴋangilarlônêt niaᴋorme inangaviksanganik.
59Assianullo oᴋarpok: Malinga. Tâpsomale kiovâ: Nâlegak, aiᴋâlaulanga, atâtaga iluveriartorlugo.
60Jêsusible oᴋautivâ: Toᴋungajut toᴋojiatik iluveriartorlitigik: igville Gûdib nâlegauvinganik oᴋariartorit.
61Assiatauk oᴋarivok: Nâlegak maligomavagit; sivorlermigle perᴋunga, iglomioᴋatikka sorairutiksamik oᴋautijartorlugit.
62Jêsusible oᴋautivâ: Aggangminut tigusijok sanajaksaminik, ᴋeviarlunelo, tâmna idluangilak Gûdib nâlegauvinganut.
Currently Selected:
Lukase 9: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
