Pe eya 19
19
Ɓur zum ge Lot ne, ne burmiya ge suwal Sodom ne
1Gasamal tok, maleka mbe ma azi a det ya suwal Sodom go. Lot ne katɗa ne viya̰ wak pala ge Sodom ne zum ya. Swaga ge Lot ne kwa nama ɗe, ɗage nama ndwara zi ya ndwara kun nama, gur suwar se. 2Jan nama go: «Mbi kaɗe aŋ, mbi bageyal ma, mbo me ya aŋ mo̰r diŋ. Aŋ da ne pool ɓol mam ge usi aŋ koo ma, ne ɓol swaga dwamma me. Kwap cya̰wak vḛ, aŋ ba kun swaga mborra.» A jan na go: «To, ya̰ i, i dwam viya̰ wak pala zum go.» 3Amma Lot gwarge tene nama ta ɗiŋ a vin, a mbo na diŋ ya. Ke nama gwasal, swar nama katugum ge be jiya̰l hore ma me, a zam.
4Ndi, a gale ne be fí se to, naa ge suwal Sodom ne ma ver Lot yàl se, ne naa jabso go ɗiŋ mbo naa ga̰l, naa ge ne suwal diŋ ma mwaɗak, ndu a̰me ɗu be gá uzi to. 5A tol Lot a jan na go: «Naa ge a ne mbo ya mo ta diŋ ɗaal mbe ma ya le da ya ɗaa? Ka̰ nama ya i ta zum, i ba fí ne nama.» 6Lot wat ya nama ta zum viya̰ wak pal, dibi na viya̰ wak ya na pe go. 7Jan nama go: «Mbi ná vya ma, mbi kaɗe aŋ, ke me ya̰l mbe no to! 8Mbi da ne vya gwale ma azi ge a gale ne kwa ndu son to, ya̰ mbi gene nama ya aŋ ta zum, aŋ ba ke nama kaŋ ge aŋ laar ne ɓyare. Amma naa mbe ma no ɗe, kaage aŋ ke nama a̰me to, a mbi gwasal ma ne, a mbo ya mbi diŋ.» 9A jan na go: «Nda tene uzi ya! Mo ge vya gwasal mbe no, mo ke ya mbo ya hate i fare ne’a! Ndi gale, i ma̰ ke mo kaŋ ge waɗe ge nama ne.» A ɓyan Lot uzi ya, a mbo ya, ne da pe, bama hál viya̰ wak. 10Maleka mbe ma par bama tok, a wan Lot ya bama ta zok zi, a dibi viya̰ wak ya bama pal. 11A dame nama ge ne viya̰ wak pala zum ma ndwara fa̰ ma digi, ne naa jabso go ɗiŋ mbo naa ga̰l, a gwan kwar swaga ɓol viya̰ wak to.
12Naa mbe ma jan Lot go: «A mo wuɗi gá ne go go ne ɗaa? Ko mo tisi, ko mo vya ma, ndwara go mo sele ge ne suwal mbe diŋ ma mwaɗak. Abe nama ne suwal mbe diŋ zum. 13Ago, sun ta ge naa ne ge suwal mbe pal waɗe ya gḛ, a go no Bage ɗiŋnedin teme i ya no go, i burmi na uzi.» 14Lot wat zum, mbo jan na tisi ma, nama ge ne é na vya ge gwale ma sanna ma go, nama ɗage ne suwal mbe diŋ zum, ago Bage ɗiŋnedin ma̰ burmi suwal mbe. Amma na tisi ma ndil na dimma ne na fare biyal ne go baŋ.
15Swaga ge swaga ne ɗage syal na pala go ɗe, maleka ma terse Lot, a jan na go: «Ɗage digi, wa̰ mo gwale poseya ne mo vya ge gwale ma jwak, mbo me, ne da pe, na kaage aŋ sú ne ya̰l ge suwal mbe ne pe to.» 16Lot ke dṵṵl, amma naa mbe ma wan na tok, poseya ne na gwale ne na vya ge gwale ge azi ma me, a gene nama suwal go̰r zum ya. Ago, Bage ɗiŋnedin ka ɓyare má nama.
17Swaga ge a ne wá ne nama ne suwal diŋ ya zum ɗe, maleka ge ɗu jan Lot go: «Sya, mo má tene, kaage mo saŋge mo ndwara ndil swaga mo go̰r go to, kaage mo mḛ babur pul go to me, sya mbo le njal pe zi ya, na kaage mo ba̰ tene uzi to.» 18Lot jan nama go: «Day kat go to, Bageyal!» 19Ndi, mo dore ɓo kwa a̰se gḛ ne mo ta, mo ne má mbi ɗe, mo ke mbi kwaɗa gḛ. Ago mbi day ge má tene syaya ɗiŋ mbo le ge njal ne ya, be ge yál mbe ɓol mbi viya̰ zi to to. A ŋgat mbi ma̰ su! 20Ndi suwal jyale mbe ne ya no, a gwa ne mbi, ya̰ mbi mbo woy tene na go. Na sḛ jyale gwa, mbi kaɗe mo, ge mbi ka ne ndwara, ya̰ mbi sya mbo woy tene na ya go. 21Maleka jan na go: «A kwaɗa, mbi gwan kwar mo a̰se ta uwale. Mbi mbo vḛne suwal ge mo ne jan na fare mbe no uzi to. 22Há tene avun cap, sya mbo na ya, ago mbi gwan ke a̰me to ɗiŋ mo det ya go ɓya.» Da ne no pe, a tol suwal mbe dḭl no go Sowar#19:22 Sowar: Pe wanna go jyale, a suwal vya ge jyale ne..
23Swaga ge gyala ne ɗage her na pe ndwarra, Lot wat suwal Sowar diŋ. 24Swaga mbe go no, Bage ɗiŋnedin swar ol swala ma ne suwar ge ne ame ol, ne digi digi ya suwal Sodom ma ne Gomor pal#Mat 10:15, 11:23-24, Luk 10:12, 17:29, 2Bit 2:6, Yud 7.. 25Burmi suwal mbe ma uzi, ne naa ge ne suwal mbe ma diŋ ma mwaɗak, poseya ne kaŋ ge ne pya ne suwar pal ma pet. 26Lot gwale saŋge na ndwara ndil swaga na go̰r go, na sḛ saŋge yuwam fegem sogeya#Luk 17:32..
27Abraham ɗage digi cya̰wak vḛ, mbo swaga ge na ne mḛ Bage ɗiŋnedin ndwara se ya. 28Ndil swaga le Sodom ma ne Gomor ma ne suwal ge ne babur pul go ma pet pal ya, kwar ol swama ka ndwar ne suwar se digi dimma ne ol swama ge ol ge duwa̰ ne go.
29Swaga ge Dok ne ɗage burmi suwal ge ne babur pul go ma, na ge Lot ne ka go ɗe, Dok dwat ne Abraham, ɓu Lot ne haŋle mbe zi ya uzi no.
Pehir ge Lot ne ma
30Lot mbyare ne Sowar go, mbo kat njal pe zi ya, ne da pe, ka so kat suwal Sowar diŋ vo. A ne na vya ge gwale ma azi, a mbo kat njal pṵṵl zi. 31Dam a̰me ɗu, na vya ge gwale ge ga̰l jan na ná vya ge jyale go: «Ndi nee bá hatɗa sabar, ndu son a̰me ne swaga mbe no go ge ba mbo ɓan ne nee dimma ne naa ne ke ne suwar pal pet go to. 32Mbo ya, nee ho̰ nee bá oyo̰r jiya̰l njotɗa, nee ba ɓan ne na, go no nee ba hon na hir.»
33Ɗaal mbe no zi, nama sḛ ma hon bama bá jiya̰l njotɗa, ge ga̰l mbo dwam zok ne na bá. Swaga ge ne mbo ya fí na bá ta, ko swaga ge ne ɗage digi mborra, na bá be wan pe to bat. 34Dam ge kwap ge go, ge ga̰l jan ge jyale go: «Ndi, dana ɗaal no, i ne nee bá dwa ne, gwan hon nee na jiya̰l ma̰ ɗaal no, aŋ ne na dwam me, go no nee ba hon na hir.» 35A gwan hon bama bá jiya̰l njotɗa ɗaal mbe zi uwale, ge jyale er mbo dwam zok ne na bá. Uwale, swaga ge ne mbo ya fí na bá ta, ko swaga ge ne ɗage digi mborra, na bá be wan pe to bat.
36Lot vya ge gwale mbe ma jwak, nama bá eme nama. 37Ge ga̰l tol vya son, tol na dḭl Mowab#19:37 Mowab: Sḭ go ndage da bá zi.. Na sḛ a Mowab ma bá ne, nama ge a ne go no ɗiŋ ma̰ no. 38Ge jyale me, tol vya son, hon na dḭl go: Ben-Ammi#19:38 Ben-Ammi: Sḭ go, vya ge mbi hir ne.. Na sḛ a Ammon ma bá ne, nama ge a ne go no ɗiŋ ma̰ no.
Currently Selected:
Pe eya 19: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
