Pe eya 20
20
Abraham ma ne Abimelek
1Abraham ɗage ne na swaga katɗa go, ndwara mbo le mbii ya. Mbo kat na pe ge suwal Kades ma ne suwal Chur buwal zi. Go̰r go gwan ɗage mbo kat ge suwal Gerar ya. 2Abraham ka jan ne na gwale Sara go na na ná vya ge gwale ne. Abimelek gan ge suwal Gerar ne, ame na kat yàl. 3Ɗaal zi, Dok dyan tene Abimelek tá kiya̰r zi, jan na go: «Mo hun tene ya go ne gwale ge mo ne ame na no pe, ago a gwale ge ndu ne ne.» 4Abimelek gale ne be ɓanna ne na to, jan go: «Bageyal, mo da ne pool burmi pehir ge dosol uzi ɗaa? 5Abraham sḛ jya̰ mbi ne go na na ná vya ge gwale ne, gwale vḭ mbi no me go na na ná vya ge son ne. Ne mbi dulwak zi ya, mbi ke na fareba pal, mbi be ke a̰me ge sone to.» 6Kiya̰r mbe zi, Dok jan na go: «Mbi kwa kwa go, ne mo dulwak zi ya, mo ke na fareba pal, mbi sḛ, mbi tele mo no me, na kaage mo ke sone mbi ndwara se to. Da ne pe no, mbi tele mo no go mo tá gwale mbe to. 7Se no, gwa̰ ne gwale mbe hon na obe, na sḛ anabi ne, ba kaɗe ne mo pe, mo ba kat ne ndwara. Amma kadɗa, mo gwan ne na to, kwa go aŋ ne mo naa ma pet, aŋ mbo sú ŋgat.»
8Abimelek ɗage digi cya̰wak vḛ, tol na naa ga̰l ge temel ma ya mwaɗak, wan nama fare mbe ma pe mwaɗak, vo wan nama ge be to. 9Uwale, Abimelek tol Abraham ya, jan na go: «Mo te ke i da go ɗaa? Mbi te ke mo ma ya̰l ge mo ba ɓyare zwal yál ge ɓaŋlaŋ ya i ne mbi naa ma, ne mbi muluk pal ɗaa? Mo ke mbi kaŋ ge ndu ne mbya ke na kon na to. 10A ma fare e mo ke kaŋ hir mbe no ne ɗaa?» 11Abraham jan na go: «Mbi dwa go, naa ge sya Dok vo ma ne swaga mbe no go to, a mbo hat hun mbi ne mbi gwale pe. 12Uwale, a fareba, na sḛ mbi bá vya ne, i ne na bá ɗu, a i ná ma hini hini ne, a go no, saŋge mbi gwale no. 13Swaga ge Dok ne tó mbi ya zum anna ne mbi bá suwal ya go day, mbi jya̰ na go, swaga ge daage ge i ne mbo go pet, na kwa mbi a̰se, na jya̰ go, mbi na ná vya ne.» 14Abimelek abe gii ma, ne nday ma, ne dore ma, ne kale ma, hon Abraham, gwan ne na gwale Sara me. 15Abimelek jan na go: «Ndi mbi suwal ne mo ndwara zḛ no, ká swaga ge daage ge mo laar ne ɓyare go.» 16Jan Sara go: «Ndi, mbi ho̰ mo ná vya gursu saal dubu ɗu. No, a kaŋ ge ne ŋgay go mo naji ge mo naa ma ndwara go ne pet.» 17Abraham kaɗe Dok, Dok zon Abimelek ma ne na gwale, ne na kale ma, a gwan tol vya ma. 18Ago Bage ɗiŋnedin ba̰ naa zaab ge ne Abimelek diŋ ma pet gisil ne Sara ge Abraham gwale pe.
Currently Selected:
Pe eya 20: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
