Pe eya 42
42
Yakub teme na vya ma mbo do̰y suwal Masar ya
1Swaga ge Yakub ne za̰ go, swara ya suwal Masar ya ɗe, jan na vya ma go: «Kyaɗa aŋ ba ka ndil ta go ɗaa?» 2Jan go: «Mbi za̰ go, swara ya suwal Masar go. Mbo me mbo yat me nee swara ne yá go, go no nee ba kat ne ndwara, nee ba su to.»
3Yusuf bá vya ma naa wol a kan ta mbo suwal Masar mbo yat swara. 4Amma Yakub be ya̰ Bayami ge Yusuf ná vya mborra ne nama to, ago ka janna go, Swagal ma̰ hat det na pal. 5Israyela vya ma det ya suwal Masar go yat swara, poseya ne naa ge ne mbo ya ge may ma me, ago baktar dé suwal Kanan pal pet.
Yusuf ka sare na bá vya ma ndwara
6Yusuf ka ga̰l suwal pal ne, a na sḛ ka hon viya̰ yat swara uzi naa tok go ne. Yusuf bá vya ma yan’a, a det na ndwara se. 7Yusuf ndil na bá vya ma, kwar nama, ke tene nama ta dimma ne na ne kwar nama to go, ka maare nama fare janna, jan nama go: «Aŋ mbo da ne le da ya ɗaa?» A jan na go: «Ne suwal Kanan ya, ndwara ɓyare kaŋzam yatɗa.» 8Yusuf kwar na bá vya ma yaɗat, amma nama sḛ ma kwar na to. 9Yusuf dwat ne kiya̰r ge ne ka jan na nama pal ma, jan nama go: Aŋ naa ge ndil swaga ma ne, aŋ mbo ya go go ndwara her suwal swaga ge woɗegeya ma aŋ ndwara zi. 10A jan na go: «I bageyal, a go to, mo dore ma mbo ya yat kaŋzam baŋ. 11I no mwaɗak, i bá ge ɗu vya ma ne, i naa ge hatal ma ne, mo dore ma naa ge ndil swaga ma ne to.» 12Na sḛ jan nama go: «Aŋ ke hale baŋ, aŋ mbo ya her suwal swaga ge woɗegeya ma aŋ ndwara zi.» 13A jan na go: «I mo dore ma, i naa wol para azi, bá ge ɗu ge vya ma suwal Kanan go, ago ge tok dab gá ya i bá ta ya, ge ɗu ne go to.» 14Yusuf jan nama go: «Te be fare ge mbi ne jya̰ aŋ ne to’a, aŋ naa ge ndil swaga ma ne! 15Mbi hale aŋ fare mbe pe. Mbi guni tene ne dḭl ge Faraon ne, kadɗa aŋ bá vya ge tok dab mbe mbo ja to, aŋ ne pool wat zum ne go go to bat. 16Teme me ndu ne aŋ buwal zi, na mbo ɓyare aŋ bá vya mbe ya, aŋ ge may ma me ɗe, aŋ gá daŋgay zi. Go no, mbi ba kwar pe go aŋ fare janna mbe na fareba ɓa de. Kadɗa to, mbi guni tene ne dḭl ge Faraon ne, aŋ naa ge ndil swaga ma ne.» 17Kan nama mwaɗak daŋgay zi ɗiŋ dam ataa. 18Dam ge ataa go, Yusuf jan nama go: «Ke me no, aŋ ba kat ne ndwara. Mbi sya Dok vo! 19Kadɗa aŋ naa ge ɗeŋger ma ne ɗe, ndu ɗu ne aŋ buwal zi na gá daŋgay zi, aŋ ge may ma me, mbo me ne kaŋzam mbo hon aŋ yàl ma ne kyamal pe. 20Gene me mbi aŋ bá vya ge tok dab ya, go no mbi ba kwar go aŋ fare ge aŋ ne jya̰ mbi a fareba, aŋ ba su to.» A ke mbe go no. 21A jan ta go: «A fareba, nee ke nee bá vya sone, swaga ge ne ka fyal tene nee ta, nee be kwa na a̰se to. Sone mbe gwan ja nee pal.» 22Ruben jan nama go: «Mbi te be jan aŋ go aŋ ke vya mbe sone to to’a! Amma aŋ be za̰ mbi to. Se no, nee ame potɗa ge na siya ne.» 23Nama sḛ ma be wan pe go, Yusuf za̰ bama ya go to, ago a ka zwagre nama wak zwagre. 24Na sḛ abe tene ne nama ta uzi ya nde, fyal. Go̰r go, gwan’a nama ta, jan nama fare, wan Simeyon ne nama buwal zi, dol na daŋgay zi nama ndwara go.
Gwanna ge Yakub vya ma ne mbo Kanan
25Yusuf hon wak go, a wi nama galam ma ne gḛme, a gwa̰ ne bware ge ndu ge daage ne na galam zi, a ho̰ nama kaŋzam ne viya̰ pe. A ke ne nama go mbe tem. 26Nama sḛ ma yage bama gḛme ma kwara ma pal, a ɗage mborra. 27Swaga dwamma go, a̰me ɗu ne nama buwal zi hage na galam wak ndwara hon na kwara kaŋzam, kwa na bware ne na galam wak digi. 28Na sḛ jan na bá vya ma go: «A gwan ne mbi bware ja, ndi, ne mbi galam zi no.» Swaga mbe go, nama dulwak kun ɓat. A ɗage ndat bagre, a ka jan ta go: «Dok te ke nee ma kaŋ go ɗaa?» 29Swaga ge a ne dé ya bama bá Yakub ta, suwal Kanan go, a wan na fare ge ne ɓó bama pe mwaɗak. A jan na go: 30«Bage ne ka ga̰l suwal pal, ka gace i fare janna gace, ndi i dimma ne naa ge ne mbo ya ndil suwal ma go. 31I jya̰ na go: ‹I naa ge ɗeŋger ma ne, i be naa ge ndil suwal ma ne to. 32I wol para azi bá ge ɗu ge vya ma, a̰me ɗu ne go to, ge jyale dab gá ya i bá ta suwal Kanan ya›. 33Bage ne ka ne suwal pal jya̰ i no go: ‹Ge go mbi kwa go aŋ naa ge ɗeŋger ma ne ɗe, ya̰ me aŋ bá vya a̰me se ɗu mbi ta, abe me kaŋzam mbo hon aŋ yàl ma ne kyamal pe. Gwa̰ me. 34Gene me mbi aŋ bá vya ge tok dab ya. Go no, mbi ba kwa go, aŋ naa ge ndil swaga ma ne to, aŋ naa ge ɗeŋger ma ne. Go no mbi ba hon aŋ aŋ bá vya, aŋ ba ga saŋge aŋ tok suwal go.›»
35Swaga ge a ne ka̰ bama swara ma ne galam zi se ɗe, ndu ge daage ɓol na bware ne na galam zi. Nama sḛ ma poseya ne bama bá, a kwa bware mbe ma, vo wan nama. 36Nama bá Yakub jan nama go: «Aŋ ɓyare á mbi vya ma pe! Se no Yusuf ne go to, Simeyon gá ya ya, aŋ ɓyare gwan wan Bayami iya! Yál mbe ma no mwaɗak a ya mbi pal.» 37Ruben jan na bá go: «Kadɗa mbi gwan ne mo Bayami ja to, hṵ mbi vya son ma jwak. Ho̰ na mbi tok go, mbi mbo gwan ne mo na ya.» 38Yakub jan go: «Mbi vya mbo ne aŋ to. Na ná vya su go, na sḛ gá mbi ne ɗu kikit. Kadɗa swagal a̰me ɓol na ya aŋ swaga mborra go, aŋ mbo é mbi wat taal zi ne kḭḭmi.»
Currently Selected:
Pe eya 42: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
