Pe eya 43
43
Gwanna ge Yakub vya ma ne mbo suwal Masar
1Baktar mbe ka suwal pal gḛ ge be to. 2Swaga ge a ne á swara ge a ne gene na ne suwal Masar ya ɗe, Yakub jan na vya ma go nama gwa̰ mbo yat bama swara ya nde. 3Yuda jan na go: «Ndu mbe jya̰ i fare ndaar kaka go, kadɗa i mbo ne i bá vya ya ya to, i ne pool ge kwa na ndwara to. 4Kadɗa mo vin’a ya̰ i bá vya mborra ne i, i da ne pool mbo yat kaŋzam ya. 5Amma kadɗa mo ya̰ na mborra ne i to, i ne pool mborra to. Ago, ndu mbe jya̰ i go, kadɗa aŋ bá vya mbo ja poseya ne aŋ to, aŋ ne pool ge kwa mbi ndwara to bat.» 6Israyela jan go: «Aŋ te ke mbi yál go kyaɗa ɗaa? Aŋ te jya̰ ndu mbe gyana go aŋ da ne bá vya a̰me ne go ta ɗu ɗaa?» 7Nama sḛ ma jan na go: «Ndu mbe ele i fare fefeɗek, i ne i yàl ma pal. Ele i go: ‹Aŋ bá ya go ne ndwara ɗaa? Aŋ ná vya a̰me ɗu gá ya ya ɗaa?› I gwa̰ ne na vinna na fare eleya ma pal. I be kwa go, na ba jan i go, i mbo ne na i bá vya ya to.»
8Yuda jan na bá Israyela go: «Ya̰ Bayami mborra ne mbi. I ɗage mborra, go no, i, ɓanna ne mo sḛ, ne nee yàl ma, nee ba kat ne ndwara, nee ba su to. 9Ndi mbi, mo ɓyare na fare pe mbi tok go. Kadɗa mbi gwan ne mo na ja to, kadɗa mbi gwan ne na ja honna mo tok pul zi to, mbi mbo gá mo ta ndu ge ya̰l ne ndwara. 10I pala te wa̰ to ɗe, i ne gwanna ya ge ndwara azi.» 11Nama bá Israyela jan nama go: «Kadɗa go ɗe, ke me no: Abe me kaŋ ge siŋli ge nee suwal ne ma aŋ galam ma zi, aŋ ba mbo hon ndu mbe. Num ge hur tuli ma nde, ne daaram nde, ne mboy ge hur tuli ma nde, ne mir nde, ne kaŋ sulla ge fogor ma nde, ne uwara amande ma nde me. 12Abe me bware ge ɗogle aŋ tok go, gwa̰ me ne bware ge a ne pá na ya aŋ galam ma zi, tamekyala, a vyale vyale. 13Wa̰ me aŋ bá vya, gwa̰ me mbo ndu mbe ta ya. 14Dok ge pool pet na ho̰ ndu mbe dulwak ge kwa aŋ a̰se, na ya̰ aŋ bá vya Simeyon ma ne Bayami gwanna ya ne aŋ. Mbi me, kadɗa mbi vya ma ban ban, nama ba̰.»
15A abe bobo ma, ne bware ge ɗogle pal, a wan Bayami me, a ɗage, mbo suwal Masar ya, a mbo Yusuf ndwara se ya.
Ɓol ta ge Yusuf ma ne na bá vya ma ne ge ndwara azi
16Swaga ge Yusuf ne kwa Bayami poseya ne nama ɗe, jan ga̰l ge ne na yàl pal go: «Abe naa mbe ma mbo yadiŋ, hṵ kavaar a̰me ɗu se, ke kaŋzam, ago naa mbe ma zam kaŋzam ma̰ gyala pala da ne mbi.» 17Ndu mbe ke dimma ne Yusuf ne jya̰ na go, mbo ne nama Yusuf diŋ ya. 18Swaga ge a ne mbo ne nama Yusuf diŋ ya ɗe, vo wan nama, a ka jan go: «A ke nee da ne bware ge dḛ zaŋgal a ne pá nama nee galam ma zi pe. A mbo ne nee ya go go, ne da pe, bama ba ɓol viya̰ ge ke nee yál, ne abe nee kwara ma, nee ba ga nama mo̰r me.» 19Ge viya̰ wak pal swaga wat diŋ go a ndar ta ya bage ge ne Yusuf yàl pal ta, a jan na fare. 20A jan na go: «I kaɗe mo ɗe, i bageyal! I mbo dḛ ja zaŋgal ɗu yat kaŋzam. 21Swaga ge i ne dé ya swaga dwamma go, i hage i galam ma wak, ndu ge daage ɓó na bware ne na wak no jyan na galam zi, i gwa̰ ne nama ya go i tok go. 22Uwale, i abe bware ge ɗogle ya go i tok go, ndwara yat kaŋzam. I be kwa ndu ge ne pá i bware ma i galam ma zi to.» 23Na sḛ jan nama go: «E me aŋ haŋgal se, sya me vo to! A Dok ge aŋ ne, Dok ge aŋ bá ne ho̰ aŋ bware aŋ galam ma zi ne, aŋ bware ma dé ya mbi ta.»
Na sḛ mbo ne Simeyon ya nama ta. 24Ndu mbe mbo ne nama Yusuf diŋ ya, hon nama mam, a usi bama koo ma uzi, uwale hon kwara ma zám me. 25A nṵsi ta ne bama bobo ma jobre mborra ge Yusuf ne ya gyala pala. Ago a za̰ go bama zam kaŋ ma̰ go go.
26Swaga ge Yusuf ne ya̰ ya yadiŋ ɗe, a hon na bobo ge bama ne gene nama ya bama tok go ma, a det na ndwara se. 27Ele nama go: «Aŋ kwaɗa ko’a?» Gwan ele nama go: «Aŋ bá sabar ge aŋ ne jya̰ mbi na fare ya ya kwaɗa ko’a? Gale ya go ne ndwara bà?» 28A jan na go: «Mo dore i bá ya go kwaɗa baŋ, gale ya go ne ndwara.» Nama sḛ ma gwan gur bama koo ma na ndwara se. 29Yusuf kan na ndwara, kwa na ná vya Bayami, ele nama go: «A aŋ bá vya ge tok dab, ge aŋ ne jya̰ mbi na fare mbe ne’a?» Gwan jan go: «Mbi vya, Dok na so mo ko̰r!» 30Yusuf kun na fare digi, ne jo̰ na sḛ tḭ tin ne na ná vya pe ɗe, ka ɓyare zimi fyaso, wat na zok zi, par na wak fyaso. 31Amma swaga ge ne usi na ndwara uzi ɗe, gwan wat ya zum, wan tene, jan go: «Va me kaŋzam ya se.» 32A var ge Yusuf ne hini, na bá vya ma ne ndwara hini, Masar ma ge a ne zam kaŋ ne Yusuf ma ne ndwara hini. Ago Masar ma zam kaŋ dagre ne Ibriniya ma to, ne da pe, a seŋgre kakatak go nama zá kaŋzam ne nama. 33Yusuf bá vya ma kat na ndwara zi, ne ga̰l pe go, ne vya pul soy go mbo vya ge tok dab ya. A ka ndil ta ndwara, a ka ke ajab. 34Yusuf e a va kaŋ ge ne na ndwara zi hon nama, amma a var Bayami kaŋ ndwara anuwa̰y pal waɗe na bá vya ma, a njot dagre ne na, a fere.
Currently Selected:
Pe eya 43: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
