Luka 14

Zonna ge ndu ge moy ne dam ɗigliya go

1Dam ɗigliya a̰me ɗu, Jeso mbo Farisi ma ga̰l a̰me diŋ ya mbo zam kaŋ. A dol ndwara na pal ndilla. 2Ndi, ndu a̰me ge sḛ ɗageya mumu ne mḛya na ndwara zḛ. 3Jeso hé fare, jan naa ge ne kwa eya ma tyatyat ma ne Farisi ma go: «Mbya go a zo̰ ndu ge moy dam ɗigliya go, ko a zo̰ na to ɗaa?» 4A zane kirib. Jeso wan ndu ge moy, zon na, ya̰ na mborra. 5Jan nama go: «A wuɗi ne aŋ buwal zi, kadɗa na vya, ko na nday detɗa tub se dam ɗigliya go, ba ya̰ be ge wan na ya digi to ɗaa?» 6A ɓol fare a̰me ge gwan jan na to.

Tá me swaga katɗa ge zḛ ge to

7Jeso ke naa ge a ne tó nama ya swaga zam kaŋzam go fare sḭ a̰me, ne da pe kwa go nama tál ne go swaga katɗa ge zḛ ge, jan nama go: 8«Swaga ge a ne tol mo mbo vḛso sanna go, kaage mo mbo kat swaga ge zḛ ge go to. A ta tó ndu ge ne waɗe mo ya go kyala, 9na kaage bage ne tó aŋ ya, mbo ya jan mo go: ‹Ya̰ na mo swaga katɗa›, ago mo ɗage ma̰ da ne saaso, gwan mbo kat hṵsi se ya. 10Amma swaga ge a ne tol mo ya, mbo kat go̰r ya, go no, swaga ge bage ne tó mo ya ne mbo ja kwa mo, ma̰ jan mo go: ‹Kondore, mbo ya zḛ go#Frs 25:6-7..› Go no mbo kat hormo ne mo pe ge naa ge aŋ ne nama ne ka ne kaŋzam wak go zamma ma ta pet. 11Ago ndu ge daage pet ge ne mbo hé na pala ya digi, a mbo gwan ne na pala se, bage ne gwan ne na pala ya se, a mbo hé na pala digi.»

Tolla ge naa ge a̰se ma ne ya swaga vḛso go

12Gwan jan bage ne tó na ya go: «Swaga ge mo ne tol naa ya zam kaŋzam cya̰wak ko gasamal, kaage mo tol mo kondore ma, ko mo ná vya ma, ko mo sele ma, ko mo naa ge gulum pala ge gan ma ɗeŋgo to, ne da pe, na kaage nama sḛ ma tó mo me ɗo, a gwa̰ ne mo kaŋ ma byalam go to. 13Amma swaga ge mo ne tol naa ya zam kaŋ, tó naa ge a̰se ma, ne giɗi ma, ne looɗol ma, ne ɓaal ma, 14go no, mo mbo kat ne laar saal, ne da pe nama a̰me ge gwan ne mo byalam go to. Ago mo mbo ɓol potɗa ge mo ne dam tanna ge naa ge dosol ma ne go.»

Fare sḭ ge kaŋzam ge muluk ge digi ya ne

15Swaga ge ndu a̰me ge a ne nama ne ka kaŋzam wak go ne za̰ fare mbe no, jan na go: «Ndu ge ne mbo katɗa kaŋzam wak go muluk ge Dok ne zi ya da ne laar saal!» 16Jeso jan na go: «Ndu a̰me ke kaŋzam gḛ, tol naa ya gḛ me. 17Swaga ge ler zam kaŋ ne mbya, teme na dore na mbo tol naa ge a ne tó nama ma ya: ‹Mbo me ya, ago kaŋ ma ne go nṵsiya!› 18Nama sḛ ma pet a ɗage kan bama pala ne fare janna ge ɗu ge pe. Ge zḛ ge jan na go: ‹Mbi yá gaaso gale yat no, a ŋgat go mbi mbo ndil na. mbi kaɗe mo, pore mbi nde.› 19Ge may jan go: ‹Mbi ya nday ma kakap anuwa̰y yat no, mbi ɓyare mbo kugi nama. Mbi kaɗe mo, pore mbi nde.› 20Ge may jan go: ‹Mbi sa̰ gwale gale san no, mbi day ge mbo ya to.› 21Swaga ge ne gwa̰ ya, wan na bageyal fare ge a ne gwa̰ ne na janna ma pe pet. Na bageyal laar hot, jan na dore go: ‹Mbo buwal pe ma go, ne viya̰ ga̰l ma go avun cap, abe naa ge a̰se ma, ne naa ge giɗi ma, ne ɓaal ma, ne naa ge looɗol ma ya.› 22Dore mbe gwan’a jan na go: ‹Bageyal, mbi ke wak honna ge mo ne pal, swaga gwan gá ya go.› 23Bageyal gwan jan dore mbe go: ‹Gwa̰ viya̰ ma ya, ne gaaso ma wak ya, e naa wat ya zi ne pool, ne da pe mbi zok na wi.› 24Mbi jan aŋ: Ne naa ge mbi ne tó nama ma buwal zi, ndu a̰me ɗu mbo tare mbi kaŋzam mbe to bat.»

Viya̰ ge ndu kat ndu ge ame hateya ge Jeso ne

(Mat 10:37-38)

25Naa ɓase a ka mbo Jeso pe go, saŋge tene se, jan nama go: 26«Kadɗa ndu a̰me mbo ya mbi ta, na sḛ sen na bá, na ná, na gwale, na vya ma, na ná vya ge son, na ná vya ge gwale, ko ne na sḛ to, ne pool ge kat mbi ndu ge ame hateya to bat. 27Ndu ge daage pet ge ne hé na uwara kaŋgre, kare mbi pe ya to, ne pool ge kat mbi ndu ge ame hateya to bat. 28A wuɗi ne aŋ buwal zi, kadɗa na ɓyare sin zok, ba kat se gale ɓya, ba isi kaŋ ge na ne ɓyare banna ma, ne kwa go na da ne kaŋ ma ndwara mbyat na gale ɓya, 29ne da pe na kaage na dó zok pe ɗo, na a na to to. Ne da pe, na kaage naa ge ne kale ma kwa na ɗo, nama có ta ne na janna go: 30‹Ndu mbe dó zok pe, na pool ge day á na to!› 31Ko a ma gan, kadɗa na ɓyare mbo det na kon pore, ba gale kat se ɓya ɗo, ba ndil go na naa dudubu wol ma mbya mbyat mbo det na kon ge ne naa dudubu wara azi ma ɓa de? 32Kadɗa na pool be mbyat to, swaga ge na kon gale ne kaal ya, teme naa na ndwara zi ya ndwara ɓyare viya̰ ge bama ne na ka halas. 33Go no me, ndu ge daage pet ge ne aŋ buwal zi, kadɗa na kuri na kaŋ ma ya uzi pet to, mbyat ge kat mbi ndu ge ame hateya to bat.»

Kadɗa yuwam ban na camam ya, na hamba da ɗaa

(Mat 5:13, Mar 9:50)

34«Yuwam kaŋ ge kwaɗa ne, amma kadɗa yuwam ban na camam ya, a gwan hat na camam ma̰ da ne da ɗaa? 35Be gwan gá a̰me pe to, ne suwar pe, ko ne zám pe, amma a kan na zum uzi ya. Bage ne togor ge za̰ya, ya̰ na za̰.»

Currently Selected:

Luka 14: FGN2013

Highlight

Copy