Luka 15

Fare sḭ ge tame ge ne ba̰, ge a ne ɓo na ne

(Mat 18:12-14)

1Naa ge tyare kaŋ ma ne naa ge ke sone ma pet a mbo ya na ta ndwara za̰ na. 2Farisi ma ne naa ge njaŋgeya ma, a ɗage or wak go: «Ndu mbe no ame naa ge ke sone ma kwaɗa, zam kaŋ da ne nama me.» 3Jeso ke nama fare sḭ mbe no: 4«A wuɗi ne aŋ buwal zi, kadɗa na da ne tame ma kis, kadɗa ge ɗu ban ya, yá̰ ge wara lamaɗo para lamaɗo ma ful zi, mbo ɓyare ge ɗu ge ne ba̰ mbe pe diŋ ɓol na ya to’a? 5Swaga ge ne ɓol na, dol na na ka̰l pal ne laar saal, 6swaga ge ne gwan’a yadiŋ, tol na kondore ma, ne na naa ge gulum pala ma, jan nama go: ‹Ke me laar saal poseya ne mbi, ago mbi ɓol mbi tame ge ne ba̰ ja.› 7Go no, mbi jan aŋ, ne ndu ge sone ɗu ne hase pe, laar saal mbo kat waɗeya digi zi ya waɗe ge naa ge wara lamaɗo para lamaɗo ge dosol ma ge a ne gwan ɓyare haseya iya to ma.»

Fare sḭ ge sile ge ne ba̰ ge a ne ɓo na ne

8«Ko a gwale ge daage ge ne sile wol, kadɗa a̰me ɗu ban ya, mbo e ɗuli digi, gisi zok pul uzi, ɓyare na lilit, diŋ ɓol na to ne ɗaa? 9Swaga ge ne ɓol na, tol na koŋkale ma ne na naa ge gulum pala ma ya, jan nama go: ‹Ke me laar saal poseya ne mbi, ago mbi ɓol mbi sile ge ne ba̰ ya go.› 10Go no me, mbi jan aŋ, ne ndu ge sone ɗu ne hase pe, maleka ge Dok ne ma da ne laar saal.»

Vya ge ne ba̰ na kaŋ joo ge ne gwa̰ ya na bá ta

11Na sḛ gwan jan go: «Ndu a̰me ka ne vya ma azi. 12Ge jyale jan na bá go: ‹Báá, ho̰ mbi mbi kaŋ joo ndwara.› Na sḛ var nama na kaŋ kwaɗa ma. 13Go̰r dam ma kwaɗa lwak, vya ge jyale mbe kote na kaŋ ma digi pet, mbo suwal ge kaal, vḛne na kaŋ ma ge bataraŋ zi. 14Swaga ge ne a na kaŋ ma banna uzi pet, baktar det suwal mbe go, na sḛ ɓol woɗegeya. 15Mbo ɓyan tene ndu a̰me ge suwal mbe tok go, na sḛ teme na mbo ful zi mbo koy na kosoŋ ma. 16Ka ke ene go na huri na laar ne dèl ge kosoŋ ma ne, amma ndu a̰me ge hon na kat to. 17Swaga ge na haŋgal ne e ya se, jan go: ‹Mbi bá dore ma ne diŋ ya gyana ga ge a ne ya̰ kaŋzam pe uzi, kyamal ba ka hun mbi ne go go no ɗaa! 18Mbi gwan mbi bá ta ya, mbi ba mbo jan na go: Báá, mbi ke sone Dok ndwara se, ne mo ndwara se me, 19mbi be mbyat ge a gwan tol mbi mo vya to, ke ne mbi dimma ne mo dore a̰me go.›

20Swaga ge ne ɗage mbo ya na bá ta. Gale ne kaal ya, na bá kwa na, na duur tin na, ndage so na ndwara zi ya, mbo dol tene na ko̰l zi, bur na na sḛ zi. 21Na vya jan na go: ‹Báá, mbi ke sone Dok ndwara se, ne mo ndwara se me. Mbi be gwan mbyat ge a tol mbi mo vya to.› 22Amma na bá jan na dore ma go: ‹Abe me ba̰r ga̰l ge siŋli ma ya avun cap, ka̰ me na na ta, pá me kyaɗa na tok zi, pa me tyarko na koo zi me. 23Wa̰ me nday vya ge sḛ so̰l ya ɗu, hṵ me na se, za me nee na, ke me nee laar saal, 24ago mbi vya mbe no su su, se no da ne ndwara, na sḛ ba̰ ban, se no mbi ɓol na ya go. A ɗage ke laar saal.›

25Swaga mbe go, na vya ge ga̰l ne gaaso ya. Swaga gwanna ya go, yan’a gwa ne yàl, za̰ kaŋ haleya ma ne kaŋ ndalla ma. 26Tol dore a̰me ndwara hale fare ge ne ke ne diŋ pe. 27Dore mbe jan na go: ‹A mo ná vya gwa̰ ya ne, mo bá hṵ nday vya ge sḛ so̰l no, ne na ne gwa̰ ya be fare a̰me ɓol na to pe.› 28Na laar vḛne, kuri go na wat ya diŋ to. Na bá wat ya na ndwara zum, ndwara iyal na laar. 29Amma gwan ne na bá janna go: ‹Ndi, del ma̰ no gyana ge mbi ne ke mo temel, mbi be kuri mo wak dam ɗu to, mo be hon mbi gii vya ɗu go i ne mbi kondore ma ke vḛso to. 30Amma swaga ge mo vya mbe no ne gwa̰ ya, na ge ne vḛne mo kaŋ ma kaya ma ta, mo hṵ na nday vya ge sḛ so̰l no’a!› 31Na bá jan na go: ‹Mbi vya, mo ya go poseya ne mbi ɗaɗak, mbi kaŋ ma, a mo ne ma ne. 32Amma a kwaɗa go nee ke vḛso ne laar saal, ne da pe mo ná vya mbe no su su, se no da ne ndwara, ba̰ ban, se no mbi ɓol na ya go›.»

Currently Selected:

Luka 15: FGN2013

Highlight

Copy