Mat 27

Yesu ha busu bwa Pilato

(Mal 15.1; Luk 23.1-2; Yow 18.28-32)

1Bwiisi bu bwakya, bakuutu ba bangaanga-nzaambi bobanso na bakulu ba babakala ba kaanda bakaanga mfuundu mu ntoono Yesu mpisi bamudzusa. 2Bamukaanga, bamunata na bamuyekele kuri Pilato, ngoforo.

Lufwa lwa Yuda

(Biy 1.18-19)

3Yuda waba muyekele, bu kamono ti bakesiri Yesu mukanu wa lufwa, wayiinga bitsimi, wabvutula makuumi matatu ma mimpata kuri bakuutu ba bangaanga-nzaambi na bakulu ba babakala, 4waleele ti: «Me nyayirikiri masumu mu kuyekele muutu wahele kuyaaba ntoono!» Bo baleele ti: «Diri dyaambu dya beetu ko, ngo mikutariri!» 5Nde bu katuba mipata mu Nzo-Nzaambi, wapala, wayende kwa la, na waleleme. 6Bakuutu ba bangaanga-nzaambi, bu baholo mipata mimyo, baleele ti: «Kwahele miswa mu kweetuba myo mu kikebulu, bukuri ntalu makila.» 7Bu bakaanga mfuunda, basuumba mu mipata mimyo, nseke ya mubuumbi, mu mampeembe ma banzeense. 8Mu didyo, bakooteelaa nseke yiyo, «nseke ya makila» natee mu lumalu. 9Haho, ma leeriri mubikiri Yelemiya mayende mu mana, waleele ti: «Bo baholo makuumi matatu ma mipata – ntalu yiyo, baala ba Isaheli bari baleele, mu muutu wunde wu bari bakese ntalu – 10na bo baha mipata mimyo mu nseke mubuumbi, bunu bwaheeri Mfumu lutumu kuri me.»

Pilato waha Yesu bifuuri

(Mal 15.2-5; Luk 23.3-5; Yow 18.33-38)

11Yesu bamutelemese ha busu bwa ngoforo; na ngoforo wamufuula ti: «Buri ye ngo mbyaasi Bayudayo?» Yesu waleele ti: «Ye wuleele.» 12Mu ntaangu yaba mufuundaa bakuutu ba bangaanga-nzaambi na bakulu ba babakala, nde kasii bvutula ntoono ko. 13Haho, Pilato kaleele kuri nde ti: «Buri ye wahele kuyuka myalaka mi bari mu kukufuundila?» 14Nde kasii leele ntoono ti mosi ko, mu kumuha mvutu, mu kiteesu kiri ngoforo wakimuka kwalaka.

Yesu bamukesele mukanu wa lufwa

(Mal 15.6-15; Luk 23.13-25; Yow 18.39–19.16)

15Mu mpisi munkeembu ngoforo waba na kifu kya kupalisaa boroko dimosi, bunu bwaba kutya kwa baatu. 16Haho, kwaba muutu mosi waba mu boroko, wayabakana, nkuumbu [Yesu] Baraba. 17Baatu bu baba bakutukina, Pilato wabafuula ti: «Beenu na lutiiri ti me nyilupatukila, [Yesu] Baraba hoti Yesu wubateelaa ti Kiristo?» 18Mukwongo, Pilato waba yaari ti mu musoki bamuyekiryee. 19Bu kaba kadzakala ha kibala kya mutsuundu, mukasi waandi wamuheeke mukeensu ti: «Yaa kuba musamu ko ha kakati dya ye na muutu wasuunguma wu, bukuri me mbaminyee kwalaka, lolodi mu ndosi mu ntoono nde.» 20Bakuutu ba bangaanga-nzaambi na bakuutu ba babakala basinda mampuumbu mpisi baloombo Baraba na badzusu Yesu. 21Ngoforo wabvutula, waleele kuri bo ti: «Na mu bo boolo beenu lutiiri ti me nyilupatukila?» Bo babvutula ti: «Baraba!» 22Pilato waleele kuri bo ti: «Heki me nki nyisa mu Yesu wu bakooteelaa ti Kiristo?» Bobanso baleele ti: «Kaba wakomunu ha kuruwa!» 23Ngoforo waleele ti: «Nkya mamabi kari kayirika?» Bo bahamisa kubikisa baleele ti: «Kaba wakomunu ha kuruwa.» 24Pilato kamonaa ti mufunu pe, ngo kasi kisaangila kiri mu kwisikila, waholo maampa, waswaaka myooko ha busu bwa mpuumbu, waleele ti: «Me nyiri na ntoono ko mu makila ma muutu wu. Mi lutariri beenu-meene.» 25Baatu bobanso babvutula, baleele ti: «Makila ma nde mabwa mu beetu na mu baala beetu.» 26Haho, nde kabapatukila Baraba, ngo kasi Yesu bamanaa kumulata nkwaasulu, Pilato wuyekiri mpisi kaba wakomunu ha kuruwa.

Bayongolo basiila Yesu munsiku

(Mal 15.16-20; Yow 19.2-3)

27Haho, bayongolo ba ngoforo banata Yesu munsa nzo-mutsuundu, mpuumbu yoyinso yamukutukina. 28Bu bamusyoonono binkuta, bamudziinga kiyuungu kyabeenge. 29Bayirika mpu ya manseende, bamulwiika yo ku yulu mutu na bamusiiriri dyaari ha kooko kwa lubakala. Bu bamutsukumina, bamusiila munsiku, bamuleele ti: «Mboto yaaku, mbyaasi Bayudayo!» 30Bamufulula mante, bahoriri dyaari, babekiri kumulata ha yulu mutu yaandi. 31Bamana kumusiila munsiku, bamusyoonini kiyuungu kyabeenge, babweesiri kumulwiika binkuta bya nde-meene, ha bamuneti mu kweemukomono ha kuruwa.

Yesu wakomunu ya yulu kuruwa

(Mal 15.21-32; Luk 23.26-43; Yow 19.17-27)

32Bu bapala, bamono muutu mosi, wa ku Kirene nkuumbu yaandi Simoni, bamukwiikisa mpisi kanata kuruwa dya Yesu. 33Batubuka ku kibeendu ki baleelaa ti Ngolongota, mbangukulu ti «Kibeendu kya kiteengi kya mutu.» 34Bamunwiisa malu masaanga na nsoko-nyoongo. Bu kabiimba, kasii tya kunwa ko. 35Bu bamana kumukomono ha yulu kuruwa, bakaba binkuta bya nde mu nteelu-wari, 36na bu baba badzakala, bamukebe hanaho. 37Baba basuusa ha yu-yulu dya mutu waandi, kooti dyaandi dyatinu ti: «Wumawu ngo Yesu, mbyaasi Bayudayo.» 38Hanaho, bakomono se kintwaari na nde, bangaa-bubi boolo, mosi ku lubakala na mosi ku lumoso. 39Baba lutaana haho, baba mutukaana, banyingisa mitu, 40na baleele ti: «Ye mutsaamini nzo yangisi na mutuungi yo mu biluumbu bitatu, bvuuka ye-meene, mbuti ye ngo Mwaana Nzaambi [na] sunduka ha kuruwa.» 41Bwobumosi se bakuutu ba bangaanga-nzaambi, batini ba mangisi na bakulu ba bakala baba musiilana munsiku baleele ti: 42«Nde wabvuukisiri bakaka, ngo wahele kubangisina kubvuukisa nde-meene; nde mbyaasi ya Isaheli, kasunduka mu lumalu ha kuruwa, na beetu tusa kanyi mu nde. 43Nde wasiiri nsiitu mu Nzaambi, kamukuula lumalu, mbuti tiiri; bukuri nde waleeriri ti: "Me ngo Mwaana Nzaambi."» 44Bwobumosi se bangaa-bumfuna baba komini kintwaari na nde, baba mutuka.

Mfwiilu Yesu

(Mal 15.33-41; Luk 23.44-49; Yow 19.28-30)

45Kuholosono mu kilookolo kya bisaamunu natee mu kyawa, mampimbisi mabwa mu butoto bwobunso. 46Bebele na kilookolo kyawa, Yesu wafula mu mbeembu yamakwa, waleele: «Eli, Eli, lema sabakatani?» Mbangukulu ti: «Nzaambi yaami, Nzaambi yaami, buri ye yekiri me?» 47Babamosi baba bateleme haho, bu bayukiri baleele ti: «Wuri mu kuteele Eliya!» 48Hanaho, mosi mu bo wadzumuna, waholo musasaka watsuuba mu bviinya dyansa wakaanga mu dyaari na wamunwiisa. 49Bakaka baleele: «Hemesee tumonee kari tumi Eliya kamubvuukisa!» 50Yesu wabweese kufula mu mbeembu yamakwa na wayakisa kiluunsi kyaandi. 51Na mono, nsaanda ya nzo yangisi yatyaabuka mu bibari byoolo, kuholosono ku yulu natee kunsuku, na butoto bwatembele, matari mabaarika. 52Mampeembe myadzibulu, baatu balaka bangisi baba bafwa bafuluka. 53Bu bapala mu mampeembe, ha mambisa ma mfulukulu yaandi, bakoto mu bvula dyangisi, na bamonokono kuri baatu balaka. 54Mukutu nkama bayongolo na baba kintwaari na nde mu kukebe Yesu, bu bamono ntembukulu ya butoto na mamo maba yirimini, babaka boomo bwalaka, baleele ti: «Ngwanwa, wumawu wabeeri Mwaana Nzaambi!» 55Kwaba bakyeetu balaka baba haho, baba talilaana. Bo baba kwefilaa Yesu, kuholosono ku Ngalili, bakwemusalila. 56Mu bo, kwaba Mariya ma ku Mangadala, Mariya ma nguri Yakobo bo na Yosefi na nguri baala ba Dzebedayi.

Yesu bamudziika

(Mal 15.42-47; Luk 23.50-56; Yow 19.38-42)

57Nsinsika bu yatubuka, mubakala mosi wa kisina, wa ku Arimatayi, nkuumbu yaandi Yosefi, wayisa. Nde se waba muyiki Yesu. 58Bu kakokosolo kuri Pilato, wamuloombo nyutu Yesu. Pilato waha lutumu ti bamuha yo. 59Yosefi, kamanaa kuholo nyutu wayidziinga kunsa mutulu watsyeeme. 60Nde wasuusa yo mu bulu dyamoono dya nde-meene, di kahakiri mu tari. Bu kanengemese tari dyadinene mu kuduka bulu, nde wayende. 61Mariya ma ku Mangadala na Mariya makaka baba haho badzakala ha teke bulu.

Nkebulu mampeembe ma Yesu

62Kiluumbu kyanama, kiri ha mambisa ma nyirimunu, bakuutu ba bangaanga-nzaambi na Bafarisi bakutukina ku nzo Pilato, 63baleele ti: «Mfumu, beetu tubaambuka mwooyo ti mudziimbisi wunde, ha kabee mwooyo, waleeriri ti: "Ha mambisa ma biluumbu bitatu, me sa nyafuluka." 64Hango, ha lutumu mpisi heki bakebe mampeembe natee mu biluumbu bitatu, mu kubata kuri ti bayiki baandi, bakwiisa kumuyiba, na kuleele kuri baatu ti: "Nde fulukiryee mu bafwa." Nzimbusulu yampotulu yiyo sa yibvula bubi ti na yatete.» 65Pilato wabaleele ti: «Beenu luri na babo bakebe. Yendee lukebe bunu bu luyaabiri.» 66Bo bayende, bakebe mampeembe, bakangimisa tari na batelemese bakebi.

Currently Selected:

Mat 27: MW2013

Highlight

Copy