Mat 28

Yesu wafuluka

(Mal 16.1-10; Luk 24.1-12; Yow 20.1-10)

1Ha mambisa ma mpuumunu, mu minkya mya bwiisi bwa kiluumbu kyatete mu lumiingu, Mariya ma ku Mangadala na Mariya makaka, bayende kweetala ku mampeembe. 2Na mono ntembukulu ya butoto yayinene yabwa. Mukwongo, mbasi Mfumu yanangukina ku yulu yasunduka. Bu yakokosolo, yanengemene tari ha luteke na wadzakala ha yulu dyo. 3Nde waba semaa bunu nseremi, na kinkuta kyaandi kyaba kyahembeke bunu midiingi. 4Bakebi ba mampeembe bu bamumono, batekete mu boomo na baba beki bunu bafwa. 5Mbasi yabaangula mbeembu, yaleele kuri bakyeetu ti: «Beenu yaa luba na boomo ko, bukuri me nyaari ti, beenu luri mu kwesaka, Yesu wubakomini. 6Nde kasiiryee hamaha ko, bukuri fulukiryee bunu bu kaba leele. Wasee lumono kibeendu ki kabeeri. 7Na mu mawasu, bayende kweleele kuri bayiki baandi ti: "Nde fulukiryeenu mu bafwa, na mono, nde wulutekisiri ku Ngalili, kukwo beenu lumumono." Mamo, me nyiluleeriri.» 8Bu basasika mu mawasu na mampeembe, ku boomo ku kiminu kyalaka, badzumuna mu kweyaabisa bayiki baandi. 9Na mono, Yesu wababwaana waleele: «Mboto yeenu!» Bu bakokosolo kuri nde, bakwaata miilu mya nde, na bamutsukumina. 10Haho, Yesu waleele kuri bo ti: «Yaa luba na boomo ko. Yendee lwe luyaabisa kuri bampaangi ba me, beende ku Ngalili, kukwo bamono me.»

Myaleele bayongolo

11Bu bari mu kweende, mono babamosi mu bakebi bayisiri kunsa bvula, bayaabisa bakuutu ba bangaanga-nzaambi momanso mayirimini. 12Bakuutu ba bangaanga-nzaambi na bakulu ba babakala bakutukina na basa mfuundu. Bu baholo mipata myafwaana, baha kuri bayongolo, 13baleele ti: «Leeleenu ti bayiki baandi biisiryee kumuyiba mu butsuku, beetu bu tubeeri tolo. 14Na mbuti Ngoforo yukiri mamama, beetu sa twayukisa [nde], beetu sa twasa kuri ti beenu luhele kubaka dyaambu.» 15Bo baholaa mipata, bayirikiri bunu bu babayikisiri. Musamu wunde watsamikina kuri Bayudayo natee mu kiluumbu kya lolo.

Yesu wamonokono kuri bantumu

(Mal 16.14-18; Luk 24.36-49; Yow 20.19-23; Biy 1.6-8)

16Bayiki bo kuumi na mosi bayende ku Ngalili, ku mulaandu waba batuma Yesu. 17Bo bamumono, bamutsukumina, ngo kasi baba na mpaka. 18Yesu bu kokosolo, waleele kuri bo ti: «Lutumu lwolunso baheeri kuri me, ku mayulu na ha butoto. 19Hango, bu lukweende, seenee makaanda momanso bayiki, mu kubabotoko mu nkuumbu ya Taata, na ya Mwaana, na ya Mpeeve Yangisi, 20mu kubayikisa kukebe momanso ma nyabee lutumana. Na mono, me nyiri kintwaari na beenu, mu biluumbu byobinso, natee ku manunu ntaangu.»

Currently Selected:

Mat 28: MW2013

Highlight

Copy