Marc 5

Jésu rɔ ndilge ke majelé kêm dingem karé’t

1Jésu se njékuwe-girnge gangi ba awi kêm ɓeekon ke Gérasa. 2Loo ke Jésu à rise ke nang kêm bato’t ɓai ɓaa, ke loon’t nè kuwe, dingem karé ke ndil ke majelé tò kêmn’t unde loo pitring tee dè ɓada dar’n deĵ. 3Doo nè ra ɓee dè ɓada. Nè né è se sul géa, doo karé bè asekum tel tɔ’n ndan lé ta. 4Dɔ-dɔ dé tɔ’n se sul a, d’ile kanglang njann’t a tɔ. Nè è gang sul ɗáp-ɗáp a, tête kanglang jap-jap a tɔ. Doo karé bè géa asekum kuwe’n tɔ’n njanm-njanm lé. 5Se ndɔge malang, kada a, ndɔɔ a, è ra ɓee dè ɓada a, dè mbalge’t a tɔ. E ur kɔl a, tuje ra’n patat-patat se gaje mbalge a tɔ. 6Loo ke è an Jésu heb ɓai kuwe ɓaa, è tɔ ngɔde ree ɔse keje’n nonn’t. 7E tam tà se ndu’n ke bòi ede nè:

– Ké usi ri ram’t wa? I Jésu Ngonn Nube ke Njèndi sêm danran’t. M’ndêti se ri Nube le kade i ra se’m ndáng lé.

8E tam tà nè nga titeke bè tede kunn ke Jésu unn ndu’n ade ndil ke majelé ede nè:

– I ndil ke majelé, unde loo i tee kêm dingem’t nè nga kɔke.

9Jésu deje dingem nè nga ede nè:

– Ké ri è nan wa?

E ile’n dè’t ede nè:

– Ri’m nè «kos njérɔge», tede jè bule ngain.

10Dingem ke ndilge ke majelé tò kêmn’t nga kate Jésu kàt-kàt le kade rɔ de kêm ɓeekon ke Gérasa nga kɔke lé.

11Kos kɔsnyonge ndai ngɔr kade mbal’t à usei nyan. 12Ndilge ke majelé kati Jésu kàt-kàt edi nè:

– Inye jé ade j’aw jè tò kêm kos kɔsnyonge’t nè nga.

13Jésu inye loo ade de. Ndilge ke majelé undei loo teei kêm dingem’t nè nga, awi kêm kos kɔsnyonge’t ɓungei nan dè mbal’t dɔ jɔréi dann ba’t weii kabak. Kos kɔsnyonge nè nga asi aru dɔg loo jooge bè. 14Loo ke njé ngonm dege an-in nyan ke tee nè bè ɓaa, in-in se ngɔde awi se tà nè nga asi loo nák-nák kêm ɓee-bò’t se ngann ɓeege. Dooge teei som-som le kawi kan-in nyan ke tee nè nga se kum de. 15Loo ke dooge reei ra Jésu’t ɓaa, ei teri dingem ke kété kos ndilge ke majelé undei loo teei kêmn’t nga. Kum’n tel tête rɔk ade tule kubuge rann’t ndii’n maje pêt-pêt. Ɓel unde dooge ndàt gang de. 16Njé ke an-in nyan ke tee dè dingem ke kété ndilge ke majelé undei loo teei kêmn’t a, se nyan ke tee dè kos kɔsnyonge’t a tɔ se kum de nga, ɔri ser’n adi dooge ke rang ooi. 17Dooge malang unni gir ndêti Jésu le kade inye ɓeekon le de aw loo ke rang’t. 18Loo ke Jésu à al kêm ngonn bato’t ɓaa, dingem ke kété ndilge ke majelé tooi kêmn’t nga deje’n ede nè:

– Kɔkrɔ karè, ade m’aw sei kuwe.

19Jésu inye loo ade doo nè nga aw se’n lé, nè è ede’n ede nè:

– Ɔte aw ra njé ke lei’t, ɔrgir kêmkanm se nyan malang ke Nube ra sei ade ooi.

20Loo ke dingem nè ɔte aw ɓaa, unn gir kɔr ser nyan malang ke Jésu ra se’n ase’n loo nák-nák kêm ɓeekon ke ri’n nè Décapole. Kàde dooge malang gete get-get dè tà ke ooi tà dingem’t nè nga.

Jésu ɔr ratur ra dinye karé’t a, ade ngonn le Jairus ke dinye tɔse ndel in a tɔ

(An-in Matt 9.18-26; Luc 8.40-56 tɔ)

21Loo ke Jésu in gide ba’t nú tel ree se ngonn bato ɓaa, kosdoo-bulege ɔsi nja nan rann’t neĵ-neĵ. E nda tà kong ba’t. 22Dingem karé bè ri’n nè Jairus. E ngar dè kei kebe nan karé dann madennge’t aw ra Jésu’t. Loo ke è an’n ɓaa, è ɔse keje’n nang nonn’t. 23E ndête Jésu ɓɔk-ɓɔk ede nè:

– Ngar, ngonn’m ke dinye tò tà yo’t. M’deji le kade i ree ile jii dènn’t aje’n ade’m, m inye’n ade wei lé.

24Jésu in aw se Jairus. Kosdooge ngain ndolèi goo’n awi rusi nan rann’t njàng-njàng. 25Dinye karé ke mese tal rann’t ase lo dɔg-gidé-joo nda dann kosdooge’t nè nga tɔ. 26E gui ra njékugege’t bule ade ra’n tur’n se ndáng karè. Taɓai è tuju nyan kingege le’n malang anje kade ratur le’n ɔr dènn’t, nè lot bè á ratur le’n nè nga aw kum’n ke kété-kété. 27Dinye nè oo ser nyanra Jésu ɓaa, è kɔi dann doobulege tɔde go Jésu’t aw ɔde tà kubu ke rann’t lêm. 28Dinye nè tam kêmn’t ede nè: «Ke nè á m’aw m’ɔde tà kubuge ke ra Jésu’t lêm ɓaa, ratur à ɔr dèm’t karè.» 29Loo ke è ɔde tà kubuge ke ra Jésu’t lêm ɓaa, ke loon’t nè kuwe mese ke tal rann’t gang ɗás. E ger kêmn’t titeke ratur le’n nga ɔr dènn’t ɓá ta. 30Ke loon’t nè kuwe, Jésu ger kêmn’t titeke tɔgmong kaje dooge tee rann’t ndêin. E tel tur kum’n ke ra doobulege’t deje de ede nè:

– Ké nan ɔde tà kubu ke ram’t nè wa?

31Njékuwe-girnge deji nin edi nè:

– Kosdooge ke njin nan rai’t njàng-njàng nè nga an de lé á i deje doo ke njè kɔde rai taɓai wa?

32Jésu an kosdooge ɗêrêr-ɗêrêr le ger dinye ke njè kɔde ra’n nè nga. 33Ɓel ra dinye nè nga ade ndebe nginn-nginn, tede è ger nyan ke è ra nè nga se kêm’n mbak. E ree ɔse keje’n nang non Jésu’t ɔrgir nyan malang ke tee dènn’t nga se ngang’n-ngang’n ade oo. 34Nè Jésu ede dinye nè nga ede nè:

– Yaa, ratur lei ɔr dèi’t ɓá tede kêmi ke unde dèm’t. Aw se kêmlom, ratur nè nga à tel rai gugu ndan lé ta.

35Loo ke tà nè nain tà Jésu’t ɓai ɓaa, dooge in-in kêm kei le Jairus ngar dè kei kebe nan, reei edi nin edi nè:

– Ngonni ke dinye nga wei ɓá ta. Ké ri taɓai á ɔge’n njèndó dooge nyan taa kebe wa?

36Nè Jésu unn mbi’n dè tà’t nè nga, è ede Jairus ngar dè kei kebe nan ede nè:

– I ɓel lé, unde kêmi dè’m man’t kuwe karé bere.

37Jésu inye loo ade doo karé ke rang dann’n lé, nè ade Pierre se Jacques se ngokon’n Jean danni nin awi se’n. 38Loo ke ei reei teei kêm geng’t le ngar dè kei kebe nan ɓaa, Jésu an dooge ndai à noin se wuwi jik-jik. 39Jésu ur go de’t deje de ede nè:

– Ké bain á i noin se wuwi jik-jik bè wa? Ngomande nga wei lé ɓai nè tò ɓi karè.

40Dé ngon kum de dè Jésu’t. Jésu ade dé rɔ dooge nata ɓaa, ɔr bɔ se kon ngonn ke dinye nè nga a, se njékuwe-girnge ke mute a tɔ ade awi se’n. Jésu aw kêm kei ke ngonn ke dinye nè nga tò tutu. 41E uwe ji’n ede’n ede nè:

– Talita kum, tel se tà kɔje jéi ɓaa, è «Ngomande, i tɔse ndel in dɔ.»

42Ke loon’t nè kuwe ngomande nè nga ɔse nang in njiye. Ngonn ke dinye nè nga ɓal koje’n è dɔg-gidé-joo. Dooge malang ke ndai tu nyan ke tee’t nè nga, ɓel ra de ngain. 43Jésu unn ndu’n ade de le kade d’ɔr sertà nè nga d’ade doo ke rang karé bè géa oo lé. Nè è unn ndu’n ade de le kade d’ade ngomande nè nyan use.

Currently Selected:

Marc 5: GUL04

Highlight

Copy