Génesis 16
16
Hagar i su yu Ismael
1Sarai, kasá di Abram, tabatin un kriá, un muhé for di Egipto yamá Hagar. Pasobra Sarai mes no por a haña yu ku Abram, 2el a bis'é: ‘Tende, SEÑOR no ta laga mi haña yu. Drumi antó ku mi katibu Hagar; tal bes e por haña un yu pa mi.’ Abram a bai di akuerdo ku Sarai. 3Sarai, Abram su kasá, a duna Abram Hagar komo muhé. E tempu ei Abram tabatin dies aña bibá na Kanaan kaba. 4Abram a tene relashon ku Hagar i Hagar a sali na estado. Ora Hagar a ripará ku e tabata na estado, el a kuminsá trata Sarai ku menospresio. 5Sarai a bisa Abram e ora ei: ‘Mi ta sinti mi mashá ofendí i ta bo ta esun responsabel! Mi mes a laga bo tene relashon ku mi kriá i awor ku el a ripará ku e ta na estado e ta mira mi ku menospresio. Laga SEÑOR husga ta ken ta kulpabel, abo òf ami.’ 6Abram a kontesta Sarai: ‘Hagar ta bo katibu, hasi kuné manera bo ta haña ta bon.’ E ora ei Sarai a humiliá Hagar di tal manera ku el a hui bai.
7Angel di SEÑOR a topa Hagar den desierto na un bròn di awa riba e kaminda pa bai Sur. 8El a puntr'é: ‘Hagar, katibu di Sarai, di unda bo ta bini i unda bo ta bai?’ Hagar a kontestá: ‘Ta pa mi shon Sarai mi ta hui.’ 9Angel di SEÑOR a bis'é: ‘Bai bèk serka bo shon i obedes'é den tur kos.’ 10Ademas Angel a bis'é: ‘Lo Mi hasi bo desendientenan asina numeroso ku ningun hende no por konta nan. 11Bo ta na estado i lo bo duna lus na un yu hòmber; yam'é Ismael,#16:11 Na hebreo Ismael ta nifiká Dios ta skucha. pasobra SEÑOR a skucha ora nan a humiliá bo. 12Bo yu lo ta brutu manera un buriku di mondi; lo e ta na guera ku tur hende i tur hende lo ta na guera kuné. Lo e biba separá di su parientenan.’ 13E ora ei Hagar a duna SEÑOR ku a papia kuné e nòmber El-Roi, Dios ku ta mira pa mi. Pasobra Hagar a pensa: ‘Di bèrdè mi a mira e Dios ku ta perkurá pa mi!’ 14P'esei e pos tambe yama Pos Lahai-Roi: Pos di e Dios bibu ku ta perkurá pa mi. E pos akí ta keda entre Kadesh i Bèrèd.
15Poko tempu despues Hagar a duna lus na e yu hòmber di Abram#Galatanan 4:22 i Abram a yam'é Ismael. 16Dia Ismael a nase Abram tabatin 86 aña.
Currently Selected:
Génesis 16: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
