Génesis 17
17
Sirkunsishon komo señal di aliansa
1Tempu Abram tabatin 99 aña, SEÑOR a aparesé n'e i a bis'é: ‘Ami ta Dios Todopoderoso; sòru pa semper bo obedesé Mi i biba un bida perfekto den mi bista. 2Lo Mi sera un aliansa ku bo: lo Mi sòru pa bo desendientenan bira numeroso.’ 3E ora ei Abram a bùig te na suela. Dios a sigui bis'é: 4‘Esaki ta e aliansa ku Mi ta sera ku bo: lo bo ta tata di hopi nashon, 5i lo bo no yama Abram mas. For di awor bo nòmber lo ta Abraham,#17:5 Na hebreo Abraham i e palabra ku ta nifiká tata di hopi nashon tin un zonido ku parse otro. pasobra Mi ta hasi bo tata di hopi nashon.#Romanonan 4:17-18 6Lo Mi sòru pa bo haña hopi desendiente; for di bo lo nase nashonnan i asta lo tin rei den bo desendientenan. 7Esaki ta e aliansa ku pa semper Mi ta sera ku bo i ku tur bo desendientenan benidero.#Lukas 1:55 Lo Mi ta bo Dios i Dios di bo desendientenan. 8Lo Mi duna abo i bo desendientenan henter e pais Kanaan, kaminda bo ta biba komo strañero awor akí. Lo e ta boso propiedat pa semper;#Echonan 7:5-6 i Ami lo ta boso Dios.’
9Ademas Dios a bisa Abraham: ‘I loke ta abo, atené bo na mi aliansa; abo i tur bo desendientenan den generashonnan benidero. 10Esaki ta mi aliansa ku boso i boso desendientenan: tur boso hende hòmbernan mester risibí sirkunsishon.#Sirag 44:20; Echonan 7:8; Romanonan 4:11 11Boso mester laga kòrta e kueru na parti dilanti di boso órgano seksual komo señal di e aliansa entre Ami ku boso. 12Di awe en adelante tur boso yu hòmbernan mester risibí sirkunsishon riba e di ocho dia di nan nasementu. Esei ta konta tambe pa tur esnan ku no ta bo desendiente, pero sí a nase den bo kas òf bo a kumpra serka strañero. 13Sin eksepshon nan tur mester risibí sirkunsishon. Asina mi aliansa lo keda marká den boso kueru komo un aliansa eterno. 14Pero tur hòmber ku nenga di hasié mester keda eliminá for di su pueblo pasobra el a kibra mi aliansa.’
15Dios a sigui bisa Abraham: ‘Bo esposa lo no yama Sarai mas, ma Sara.#17:15 Na hebreo Sara ta nifiká prinsesa. 16Lo Mi bendishon'é i pa medio di dje lo Mi duna bo un yu hòmber; sí, lo Mi bendishon'é i lo e bira mama di hopi nashon. Asta lo tin rei den su desendientenan.’ 17E ora ei Abraham a bùig te na suela. El a hari i pensa: ‘Un hòmber di shen aña por bira tata ainda? Sara lo por haña yu ku nobenta aña?’ 18El a bisa Dios: ‘No ta mihó Bo duna Ismael e bendishon akí?’ 19Pero Dios a kontest'é: ‘Nò! Bo kasá Sara lo duna bo un yu i lo bo yam'é Isak.#17:19 E nòmber Isak ta nifiká e ta hari. Kompará Génesis 17:17; 18:12-15; 21:3-6; 21:9. Ta kuné lo Mi sera mi aliansa komo un aliansa eterno ku lo konta pa su desendientenan tambe. 20Pa loke ta trata Ismael, Mi a skucha bo i lo Mi bendishon'é. Lo e tin hopi yu i hopi desendiente. Lo e ta tata di diesdos rei i su desendientenan lo forma un nashon grandi. 21Pero mi aliansa lo Mi sera ku bo yu Isak, e yu ku Sara lo haña otro aña den e mesun tempu akí.’
22Ora Dios a kaba di papia ku Abraham, El a bai lag'é. 23E dia ei mes Abraham a hasi sirkunsishon ku su yu Ismael, ku tur e hòmbernan ku a nase den su kas i ku esnan ku el a kumpra. El a hasi manera Dios a orden'é. 24-25Abraham tabatin nobentinuebe aña i su yu Ismael diestres, dia nan a risibí sirkunsishon. 26Abraham i su yu Ismael a risibí sirkunsishon riba e mesun dia, 27huntu ku tur e hòmbernan ku tabata pertenesé na su kas, sea ku nan a nase na su kas òf ku el a kumpra nan.
Currently Selected:
Génesis 17: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
