Génesis 32
32
Yakob tin miedu di topa ku Esou
1Yakob a sigui su biahe i na kaminda angel di Dios a sali kontr'é. 2Asina Yakob a mira nan el a bisa: ‘Mester ta un ehérsito di Dios.’ P'esei el a yama e lugá ei Mahanaim.#32:2 Na hebreo Mahanaim ta nifiká: dos ehérsito.
3Despues Yakob a manda algun mensahero Seír, region di Edom, kaminda su ruman Esou tabata biba. 4Nan mester a bisa Esou: ‘Bo sirbidó Yakob a manda bisa ku el a biba komo strañero serka Laban tur e tempu. 5El a haña baka, buriku, karné, kabritu i katibu. E ta manda e rospondi akí pa bo, su shon; e ta spera di gana bo kariño.’
6Ora e mensaheronan a yega bèk serka Yakob, nan a bis'é: ‘Nos a bai serka bo ruman Esou; ya el a sali ku 400 hòmber pa bin topa bo.’ 7Ora Yakob a tende e notisia akí el a spanta mashá i el a sintié den pèrtá. El a parti e hendenan ku tabata huntu kuné den dos grupo, tambe e karnénan i e kabritunan, e bakanan i e kamelnan. 8El a pensa: ‘Si Esou bin ataká e promé grupo, e otro tin chèns di skapa.’ 9Despues el a kuminsá resa: ‘SEÑOR, Dios di mi tawela Abraham i di mi tata Isak; Bo a manda mi tera di mi famianan bèk i Bo a primintí ku tur kos lo bai mi bon. 10Mi no ta meresé tur e kariño i fieldat ku Bo a demostrá mi. Mi a krusa riu Yordan ku nada mas ku mi garoti i awor mi tin dos kampamentu. 11Mi ta pidi Bo, salba mi for di man di mi ruman Esou. Mi tin miedu ku e ta bin ataká mi i kaba ku nos tur. Asta ku nos hende muhénan i nos yunan. 12Bo mes a primintí ku tur kos lo bai mi bon, ku lo Bo hasi mi desendientenan mes tantu ku e pipitanan di santu kantu di laman, ku no ta di konta.’#Génesis 22:17
13Yakob a pasa nochi na e lugá ei i for di loke el a logra haña el a skohe regalo pa su ruman Esou: 14dosshen kabritu i binti chubatu, dosshen karné i binti chubatu di karné. 15Trinta kamel ku a kaba di wèrp, ku nan yunan; kuarenta baka i dies toro; binti buriku muhé i dies buriku machu. 16Despues el a pone kada grupo di bestia bou di kuido di un di su sirbidónan i bisa: ‘Bai dilanti i tene un poko distansia entre kada grupo.’ 17El a ordená e katibu di mas dilanti: ‘Si mi ruman Esou topa bo i e puntra bo: “Ken ta bo doño; unda bo ta bai i di ken e bestianan akí ta?”, 18bo ta kontest'é: “Di bo sirbidó, di Yakob. Ta un regalo pa bo, mi shon Esou. E mes ta bini djis nos tras.” ’ 19El a duna e di dos i e di tres katibu i tur e katibunan ku tabata hiba e bestianan mesun enkargo: ‘Bisa Esou ora boso top'é: 20“Bo sirbidó Yakob ta bini djis nos tras.” ’ Yakob a pensa: Mi ta purba plakia rabia di mi ruman ku e regalonan ku mi ta manda dilanti. Ya ora nos topa otro personalmente, podisé lo e risibí mi bon. 21Asina el a manda e regalonan dilanti i e mes a keda pasa e anochi ei den kampamentu.
Yakob ta lucha ku Dios
22-23E mes anochi ei Yakob a lanta i pone su dos kasánan, su dos katibunan muhé i su diesun yunan krusa riu Yabok ku tur loke e tabatin. 24Yakob a keda e so, un hòmber a aserk'é i a lucha kuné te mainta. 25Ora e hòmber a ripará ku e no por a gana Yakob, el a dal Yakob riba su hep te saka e hep for di lugá. 26Despues e hòmber a bis'é: ‘Laga mi bai, ya di dia ta kuminsá habri.’ Yakob a kontest'é: ‘Mi no ta laga bo bai si bo no bendishoná mi.’ 27E hòmber a puntr'é: ‘Kon yama bo?’ El a rospondé: ‘Mi yama Yakob.’ 28E ora ei e hòmber a bis'é: ‘Lo bo no yama Yakob mas; pero Israel#32:28 Na hebreo Israel i e palabranan ku ta nifiká e ta lucha ku Dios òf Dios ta lucha tin un zonido ku ta parse otro. pasobra bo a lucha ku Dios i ku hende i bo a sali ganadó.’#Génesis 35:10 29Yakob a puntr'é: ‘Bisa mi awor kon yama bo!’ Ma e hòmber a kontestá: ‘Pakiko bo ta puntra mi nòmber?’ Despues el a bendishoná Yakob einan mes. 30Yakob a yama e lugá Peniel.#32:30 Na hebreo Peniel ta nifiká kara di Dios. E di: ‘Mi a para kara kara ku Dios i tòg mi a keda na bida.’#Sabiduria 10:10-12
31Solo tabata bria pa Yakob ora el a bai for di Peniel. Pa motibu di e sla na hep e tabata kana kokochá. 32P'esei te awe desendientenan di Israel no ta kome e múskulo ku tin pegá na un hep, pasobra ta ei Yakob a haña e sla.
Currently Selected:
Génesis 32: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
