Mututo 11

Mushe u talusa lifu la baeli

1Muñ'a Bupilo a li ku Mushe, “Ni sa utwisa Faro ni Maegepita butuku ka koto i liñwi feela. Kihona a ka mi lumelela ku zamaya, mi u ta mi leleka mo kaufel'a mina. 2Cwale bulelela batu kamukana, munna ni musali, ba kupe ku ba ba yahelani ni bona lika ze ezizwe ka silivela ni gauda.” 3Muñ'a Bupilo a eza Maegepita kuli ba kuteke Maisilaele. Mi kaniti manduna ni sicaba ba lemuha kuli Mushe n'a li mutu yo mutuna hahulu.

4Mushe a li ku Faro, “S'a bulela Muñ'a Bupilo ki se, u li, ‘Malungasiku ni ta zamaya mwahal'a Maegepita. 5Mwana wa mweli kaufela mwa Egepita u ta shwa, ku kalela ku mwan'a Faro wa mweli, yena ya ka mu yola, ku y'o feleleza ka mwan'a mutanga wa mweli, ili ya sita lico. Ni likomu kamukana za maizibulo li ta shwa ni zona. 6Ku ta ba ni sililo se situna mwa Egepita kaufela. Sililo se si cwalo ha si si ka utwahala kale, mi ha si sa na ku ba teñi ni kwapili. 7Kono mwahal'a Maisilaele, ha ku na ku ba ni nja ye ka huhula batu kamba lifolofolo, kuli mu zibe kuli Muñ'a Bupilo u bonisa fapahano mwahal'a Maegepita ni Maisilaele.’ 8Manduna ba hao kamukana ba ka taha ku na ku t'o ni kandelela, ba nze ba li, ‘Zamaya, wena ni sicaba sa hao kaufela!’ Mwamulaho a zeo, ni ta funduka.” Cwale Mushe a zwa ku Faro a nz'a nyemile luli.

9Muñ'a Bupilo n'a ize ku Mushe, “Faro h'a na ku ku teeleza, ili kuli ni kone ku eza limakazo ze ñwi ze ñata mwa naha ya Egepita.” 10Mushe ni Aruni ba eza limakazo zeo kaufela fapil'a Faro, kono Muñ'a Bupilo a tatafaza pilu ya hae, mi h'a si ka lumelela Maisilaele ku zwa mwa naha ya hae.

Currently Selected:

Mututo 11: Lozi09

Highlight

Copy

Compare