Mututo 16

Manna ni makwali

1Sicaba kamukana sa Maisilaele sa funduka mwa Elimi, mi kweli ya bubeli ha i eza mazazi a lishumi ka a ketalizoho, ha ba se ba zwile mwa Egepita, ba t'o fita mwa naha ye omile ya Sini, ye li mwahal'a Elimi ni Lilundu la Sinai. 2Mwa naheñi mo, ba bilaela ku Mushe ni Aruni. 3Ba li ku bona, “Kiñi Muñ'a Bupilo h'a si ka lu bulaela mwa Egepita. Koo, ne lu itulezi kwatuko a lipiza ze tezi nama, mi ne lu ca lico mo ne lu latela. Kono mu lu tisize mwa naheñi mo, ku t'o lu bulaiseza mwateñi tala kaufel'a luna.”

4 # But 16.20-29; Joa 6.31 Muñ'a Bupilo a li ku Mushe, “Cwale ni ta mi neliseza kaufel'a mina buhobe bo bu zwa kwa lihalimu. Batu ba swanezi ku zwelanga kwande ku y'o itopelanga bo bu likani ka zazi ni zazi. Ka mukwa wo, ni ta lika ku bona kamba ba ta latelela likelezo za ka. 5Ka lizazi la busilela, ba ta nopa buhobe bo bu likana mazazi a mabeli, ba bu lukise.”

6Cwale Mushe ni Aruni ba bulelela Maisilaele kamukana, ba li, “Kacenu le, manzibwana, mu ta ziba kuli i n'e li Muñ'a Bupilo ya n'a mi zwisize mwa naha ya Egepita. 7Kakusasa mu ta bona maata a Muñ'a Bupilo. U utwile lipilaelo za mina, mo mu mu tongokela. Mina ha mu tongokeli luna. Luna lu bo mañi ha mu ka t'o bilaela ku luna?” 8Mushe kiha s'a li, “Muñ'a Bupilo ki yena ya ka mi fa nama ye mu ka ca manzibwana, mi kakusasa mu ta ca buhobe mo mu konela kaufela, kakuli u utwile mo mu bilaelezi ku yena. Luna lu bo mañi? Lipilaelo za mina ha li si ka liba ku luna, kono li libile ku Muñ'a Bupilo.”

9Mushe a li ku Aruni, “U bulelele sicaba kaufela, u li, ‘Mu tahe, mu t'o yema fapil'a Muñ'a Bupilo, kakuli u utwile lipilaelo za mina.’ ” 10Aruni h'a nz'a bulela kwa sicaba kaufela, ba fetuha, ba talima mwa naheñi, mi kapili-pili kanya ya Muñ'a Bupilo ya bonahala mwa lilu. 11Muñ'a Bupilo a li ku Mushe, 12“Ni utwile lipilaelo za Maisilaele. U ba bulelele cwana, u li, ‘Ka swalala mu ta fumana nama, mi kakusasa mu ta fumana buhobe bo mu bata kamukana. Cwale mu ta ziba kuli na, Muñ'a Bupilo, ni Mulimu wa mina.’ ”

13Ka swalala makwali a t'o tala mwa mafulo kamukana, mi kakusasa kwa ba ni puka ye potolohile mafulo kaufela. 14Puka ha i se i fufile, fafasi kwa ba ni nto ye swana ni mase a masisani inge silami ha si andile. 15#1 Bakor 10.3 Maisilaele ha ba a bona, ne ba sa zibi kuli ki nto mañi, mane ne ba nze ba buzana, ba li, “Se kiñi?”

Mushe a li ku bona, “Ze ki zona lico z'a mi file Muñ'a Bupilo kuli mu ce. 16Muñ'a Bupilo u laezi cwana, u ize, ‘Yo muñwi ni yo muñwi u ta nga ka palo ya batu ba ba mwa tende ya hae kaufela.’ ”

17Maisilaele ba eza cwalo, ba bañwi ba ñwata lico ze ñata, ba bañwi ze nyinyani. 18#2 Bakor 8.15 Ha ba se ba y'o likanya, ba ba ne ba ñwatile ze ñata, ne ba si ka fiteleza tikanyo hahulu, mi ni ba ba ne ba ñwatile ze nyinyani ne ba si ka taelelwa hahulu. Yo muñwi ni yo muñwi n'a ñwatile z'a n'a tokwa. 19Mushe a li ku bona, “Ku si ke kwa ba ni mutu ya ka ipulukela za kamuso.” 20Kono ba bañwi ha ba si ka eza s'a n'a laezi Mushe, mi ba ipulukela mikushuko ya kamuso. Ha bu y'o sa, lico ne li se li sinyehile, mane li tezi mabuku. Mushe a ba nyemela. 21Ne ba ñwatanga cwalo ka zazi ni zazi kakusasa, mutu ni mutu mw'a n'a tokwela. Mi ha ne ku se ku cisa, ne li shengunukanga.

22Ka lizazi la busilela ba ñwata lico za mazazi a mabeli, ili likomoki ze ne ku mutu ni mutu. Bahulu ba sicaba kamukana kih'a ba t'o biha litaba ku Mushe. 23#Mut 20.8-11 Mi yena a li ku bona, “S'a laezi Muñ'a Bupilo ki se, ‘Kamuso ki lizazi la ku pumula, lizazi le li kenile la pumulo le li ketezwi Muñ'a Bupilo. Mu bese ze mu bata ku besa, mi mu apehe ze mu bata ku apeha. Se si ta siyala kamukana mu si bulukele la kamuso.’ ” 24Ba bulukela la kamuso ze siyezi kaufela sina mw'a n'a bulelezi Mushe. Ha li si ka sinyeha, mane ne ku si na mabuku ku zona. 25Mushe a li, “Mu ce ze kacenu, kakuli kacenu ki lizazi la pumulo le li ketezwi Muñ'a Bupilo, mi ha mu na ku fumana lico mwa naheñi. 26Mu swanezi ku li ñwatanga ka mazazi a silezi, kono ka la busupa, ili lizazi la pumulo, ha li na ku fumaneha.”

27Ka lizazi la busupa ba bañwi ba ya ku y'o ñwata lico, kono ha ku na se ba fumani. 28Muñ'a Bupilo kih'a li ku Mushe, “Ku ta mi nga nako ye kuma kai, mina batu-tunyi, mu nze mu hana litaelo ni milao ya ka? 29Mu hupule kuli na, Muñ'a Bupilo, ki na ya mi file lizazi la Pumulo. Kabakaleo ka lizazi la busilela ni mi fa lico ze likana mazazi a mabeli. Mutu ni mutu a ine mwa sibaka sa hae ka lizazi la busupa. Ku si ke kwa ba ni ya ka ya ku sili.” 30Kabakaleo sicaba sa pumula ka lizazi la busupa.

31 # Lipa 11.7-8 Batu ba Isilaele ba biza lico zeo manna. Ne i swana ni mase a masisani. N'e li ye sweu, mi ne i swana sina mañende a lubilwe ka linosi. 32Mushe a li, “Taelo ya Muñ'a Bupilo ki ye, u li, ‘Mu i taze mwa sibulukelo, mi mu i bulukele baikulyenu, ba bone lico ze ne ni mi file, ili ze ne mu canga mwa lihalaupa ha ni mi zwisa mwa Egepita.’ ” 33#Maheb 9.4 Mushe a li ku Aruni, “U nge piza, u beye mwateñi likomoki ze peli za manna, mi u t'o i beya fapil'a Muñ'a Bupilo kuli i bulukelwe baikulu ba luna.” 34Aruni kih'a i beya fapil'a Likwati la Bulikani, kuli i bulukwe cwalo sina Muñ'a Bupilo mw'a n'a lalezi Mushe. 35#Josh 5.12 Maisilaele ba pila manna lilimo ze mashumi a mane, ku fitela ba fita mwa naha mo ne ku pila batu. Ba ca manna cwalo mane ba y'o fita kwa museto wa naha ya Kanana. 36Likomoki ze peli li likana ni tikanyo ya bulishumi ya sikala sa ze omile.

Currently Selected:

Mututo 16: Lozi09

Highlight

Copy

Compare