Mututo 17

Mezi a zwa mwa licwe

(Lipa 20.1-13)

1 # Lipa 20.2-13 Sicaba sa Maisilaele kamukana sa zwa mwa naha ye omile ya Sini, ba zamaya ba nze ba yaha mafulo ka mo ne ba laelelwa ki Muñ'a Bupilo. Ba y'o tibelela mwa Refidimi, kono moo, batu ne ba si na mezi a ku nwa. 2Ba omana ni Mushe, ba li, “U lu fe mezi a ku nwa.”

Mushe a ba alaba, a li, “Kiñi se mu ni omaniseza? Kikabakalañi ha mu lika Muñ'a Bupilo?”

3Kono batu ne ba nyolilwe hahulu, mi ba bilaela ku Mushe. Ba li, “U lu zwiselizeñi mwa Egepita? Kanti i n'e li ku t'o lu bulaya ni bana ba luna, ni limunanu za luna ka linyolwa, nji?”

4Mushe a lapela ku Muñ'a Bupilo, a li, “Ni ka eza cwañi ka batu ba? Ba se ba itukiselize ku ni pobaula ka macwe.”

5Muñ'a Bupilo a li ku Mushe, “U nge bahulu ba bañwi ba Isilaele, mi u etelele sicaba. U nge ni mulamu wa hao o n'o natile ka ona fa nuka, mi u zamaye. 6Ni ta yema fapil'a hao kwale, kwa licwe lani le li kwa Horebe. U nate licwe, mi li ta zwiseza batu mezi a ku nwa.” Mushe a eza cwalo mwa meeto a ba bahulu ba Isilaele.

7Sibaka seo sa bizwa Masa ni Meriba, kakuli Maisilaele ba omana ni ku lika Muñ'a Bupilo ha ba buza, ba li, “Kana Muñ'a Bupilo u sa inzi ni luna, kamba cwañi?”

Ba lwana ni ba Amaleke

8Ba Amaleke ba taha ku t'o lwanisa Maisilaele kwa Refidimi. 9Mushe a li ku Joshua, “U lu ketele banna, kuli kamuso lu y'o lwana ni ba Amaleke. Na, ni ta yema fahalimw'a lilundu ni nze ni swalelezi mulamu o ni filwe ki Mulimu.” 10Joshua a eza ka mw'a n'a mu laelezi Mushe, mi a y'o lwana ni ba Amaleke, kanti haili Mushe, Aruni ni Huri bona ba kambamela fahalimw'a lilundu. 11Mushe h'a nanulela mazoho a hae mwahalimu, Maisilaele ba kona, kono a sa wisa feela mazoho a hae, ba Amaleke ba kala ku ba koma. 12Mazoho a Mushe ha s'a katala, Aruni ni Huri ba nga licwe, ba t'o li beya kwatas'a hae, mi a ina ku lona, bona ba nze ba mu beile mwahali ba swalelezi mazoho a hae. Ba a swalelela cwalo mane la ba la likela. 13Mi Joshua a fenyeleza Amaleke ni sicaba sa hae.

14 # Mul 25.17-19; 1 Sam 15.2-9 Muñ'a Bupilo kih'a li ku Mushe, “Ñola taba ye mwa buka, kuli i hupulwe. Hape, u bulelele Joshua kuli ni ta feleleza ba Amaleke mi ha ba sa na ku hupulwa hape.” 15Mushe a yaha katala, a ka biza Muñ'a Bupilo ki ndembela ya ka. 16Mi a li, “Muñ'a Bupilo u ta zwelapili a nz'a lwanisa ba Amaleke kuya kuile.”

Currently Selected:

Mututo 17: Lozi09

Highlight

Copy

Compare