Mututo 19

Maisilaele kwa Lilundu la Sinai

1Ka lizazi la pili la kweli ya bulalu, Maisilaele ha ne ba se ba zwile mwa Egepita, ba t'o fita mwa Lihalaupa la Sinai. 2Ba zwa mwa Refidimi, mi ba t'o fita mwa Lihalaupa la Sinai, mo ba til'o tibelela fakaufi ni lilundu. 3Mushe a kambamela fa lilundu ku y'o kopana ni Mulimu.

Muñ'a Bupilo a nz'a li fa lilundu a mu biza, a li, “S'o swanezi ku taluseza lusika lwa Jakobo, bona Maisilaele, ki se, u li, 4‘Mu boni se ni ezize kwa Maegepita, ni mo ni mi lwalezi sina mbande ha i lwezi bana fa mafufa a yona, ni ku mi tisa ku na. 5#1 Pit 2.9 #Mul 4.20; 7.6; 14.2; 26.18; Tite 2.14 Cwale haiba mu ka ni utwa ni ku buluka bulikani bwa ka, mu ta ba sicaba sa ka luli. Lifasi kaufela ki la ka, kono mina mu ta ba sicaba sa ka se si ketilwe. 6#Sin 1.6; 5.10 Mu ta ba sicaba sa batu ba ba ka ni sebeleza ka ku ba baprisita, batu ba ba ineezi na feela ni li nosi.’ Ki sona s'o swanezi ku si bulelela Maisilaele seo.” 7Cwale Mushe a y'o biza bahulu ba sicaba, mi a ba bulelela lika kamukana z'a n'a laezwi ki Muñ'a Bupilo. 8Batu kiha ba alaba hamoho, ba li, “Lu ta eza lika kaufela z'a bulezi Muñ'a Bupilo.” Mushe kih'a bihela Muñ'a Bupilo mo ne ba alabezi batu.

9Muñ'a Bupilo a li ku Mushe, “Ni ka taha ku wena mwa lilu le lituna, kuli sicaba si ni utwe ha ni bulela ni wena, mi si ku kolwe kamita.”

Mushe a bulelela Muñ'a Bupilo mo ne ba alabezi batu. 10Muñ'a Bupilo a li ku Mushe, “Zamaya, u y'o bulelela batu kuli ba itukiseze ku lapela kacenu ni kamuso. Ba swanezi ku tapisa liapalo za bona. 11Ba itukiseze la kamusomuñwi. Ka lona lizazi leo, na, Muñ'a Bupilo, ni ka taha fa Lilundu la Sinai, ko ba ta ni bona batu kamukana. 12#Maheb 12.18-20 U beele batu milulwani ku potoloha lilundu, mi u ba bulelele, u li, ‘Mu tokomele kuli mu si ke mwa kambama fa lilundu kamba ku swala fo li kalela. Haiba mutu a ka swala fateñi, u ta bulaiwa. 13U swanezi ku pobaulwa ka macwe kamba ku kunupiwa ka masho, ku si na ya ka mu swala. Fo, i ka ba mutu kamba folofolo, li swanezi ku bulaiwa.’ Kono ha ku ta lizwa tolombita, batu ba ta kambama fa lilundu.”

14Mushe a zwa fa lilundu ku taha kwa batu, mi a ba taluseza kuli ba itukiseze ku y'o lapela. Ba tapisa liapalo za bona. 15Mushe a li ku bona, “Kamusomuñwi mu itukise. Basali ni banna ba si ke ba y'o kopanela likubo.”

16 # Mul 4.11-12 #Sin 4.5 Ka la bulalu kakusasa kwa ba ni mishika ni mamonyi fa lilundu, lilu le lituna ni mulumo wa tolombita. Batu kamukana mwa mafulo ba njanjiswa ki sabo. 17Mushe a etelela batu ku ba zwisa mwa mafulo ku y'o katanyeza Mulimu, mi ba t'o yema kwatas'a lilundu. 18Lilundu la Sinai kaufela ne li tezi musi, kakuli Muñ'a Bupilo n'a shetumukezi ku lona mwa mulilo. Musi wa tunya inge musi o zwa mwa liyonga, mi batu kamukana ba ngangama hahulu. 19Mulumo wa tolombita wa utwahala ku hula. Mushe a bulela, mi Mulimu a mu alaba ka mushika. 20Muñ'a Bupilo a shetumukela fahalimw'a Lilundu la Sinai. A bizeza Mushe fahalimw'a lilundu, mi Mushe a kambama. 21Muñ'a Bupilo a li ku Mushe, “Zamaya, u y'o kalimela batu. Ba si ke ba tula milulwani ku t'o ni bona, hakusicwalo ku ta shwa ba bañata ku bona. 22Nihaili baprisita ba ba ka sutelela ku na, ba swanezi ku ikenisa pili, hakusicwalo ni ta ba utwisa butuku.”

23Mushe a li ku Muñ'a Bupilo, “Batu ha ba na ku kambamela kwanu, kakuli u lu kalimezi, u ize, ‘Beya milulwani kwa lilundu, mi li be le li kenile.’ ”

24Muñ'a Bupilo a li ku yena, “Sheumuka, mi u y'o nga Aruni, a tahe ni wena. Kono baprisita ni sicaba ba si ke ba tula milulwani ku kambamela ku na, ni ka swana na ba utwisa butuku.” 25Mushe a shetumukela kwa sicaba, mi a y'o si bulelela litaba zeo.

Currently Selected:

Mututo 19: Lozi09

Highlight

Copy

Compare