Mututo 5

Mushe ni Aruni fapil'a Faro

1Cwale Mushe ni Aruni ba ya ku Faro, ba li, “Se, ki sona s'a bulela Muñ'a Bupilo, Mulimu wa Isilaele, u li, ‘Lukulula sicaba sa ka, si y'o ni ezeza mukiti mwa lihalaupa.’ ”

2Faro a alaba, a li, “Muñ'a Bupilo ki mañi ye ni ka teeleza, mane ni lumelele Maisilaele ku ya? Ha ni mu zibi, Muñ'a Bupilo yo, mi ha ni na ku lumelela Maisilaele ku ya.”

3Ba li, “Mulimu wa Maheberu u iponahalize ku luna. Cwale, u lu lumelele ku ya mwa lihalaupa mazazi a malalu, lu y'o ezeza Muñ'a Bupilo, Mulimu wa luna, sitabelo. Haiba lu sa yi, u ta lu bulaya ka butuku kamba ka ndwa.”

4Mulena wa Egepita a li ku Mushe ni Aruni, “Kiñi ha mu tuhelisa batu misebezi ya bona? A mu zwe, mu kutele kwa misebezi ya mina, batanga-tunyi.” 5Faro a zwelapili, a li, “Batu ba, se ba atile hahulu ku fita bañi ba naha. Cwale mu bata ku ba siisa misebezi ya bona, nji?”

6Ka lona lizazi leo, Faro a laela bazamaisi ba batanga, ni manduna ba Maisilaele mwa misebezi, a li, 7“Ku zwa hona fa, mu si ke mwa fanga batu bucwañi bwa ku ezeza litina, sina mo ne mu ezezanga. Mu ba tuhele ba y'o ikungela bona. 8Kono nihakulicwalo, ba eze yona palo ya litina ye ne ba ezanga pili. Mu si ke mwa i fukuza ni hanyinyani. Ba buzwa, kikabakaleo ha ba lila, ba li, ‘U lu lukulule, lu y'o ezeza Mulimu wa luna sitabelo!’ 9Mu sebelise batu ba ka tata hahulu, mi ba patehiswe ki musebezi, ili kuli ba si ke ba teeleza kwa litaba za buhata feela.”

10Bazamaisi ba batanga ni manduna ba Maisilaele ba ya kwa sicaba, mi ba y'o li ku bona, “Faro u bulela cwana, a li, ‘Ha ni sa tola ni mi fa bucwañi. 11Mu swanezi ku y'o ikungela bona ili mina, ko mu ta bu fumana kaufela, kono mu eze yona palo ya litina ye ne mu ezanga pili.’ ” 12Cwale batu ba hasanela mwa naha ya Egepita kamukana ku y'o bata bucwañi. 13Bazamaisi ba ba akufisa, ba li, “Ka zazi ni zazi mu swanezi ku eza palo ya litina ye ne mu eza ha ne mu sa fiwanga bucwañi.” 14Bazamaisi ba batanga bao ba nataka baeteleli ba Maisilaele, ba ba ne ba beilwe ku zamaisa musebezi, mi ba ba buza, ba li, “Kiñi ha mu si ka eza litina ze likana ni ze ne mu ezanga pili?”

15Cwale baeteleli ba Maisilaele ba y'o bilaela ku Faro, ba li, “Muñ'a ka, kiñi ha u lu eza cwana? 16Ha lu sa fiwa bucwañi, kono nihakulicwalo lu sa bulelelwa kuli lu eze litina! Lwa titikiwa, muñ'a ka, mi mulatu ki wa batu ba hao.”

17Faro a ba alaba, a li, “Mu na ni buzwa, mu buzwa hahulu, mi kikabakaleo ha mu li, ‘U lu lumelele, lu y'o ezeza Muñ'a Bupilo sitabelo.’ 18Cwale, mu kutele kwa misebezi ya mina. Ha ku na bucwañi bo mu ta fiwa, kono mu swanezi ku eza yona palo yeo ya kamita ya litina.” 19Baeteleli ba Maisilaele ba bona kuli ba zielehile, ha ba bulelelwa kuli, “Mu si ke mwa fukuza palo ya litina ze mu swanezi ku eza ka zazi ni zazi.”

20Ha ba zwa ku Faro, ba katana Mushe ni Aruni ba ba ne ba ba litezi. 21Ba li ku bona, “Muñ'a Bupilo a bone se mu ezize ku luna, mi a mi utwise butuku ka ku lu toyisa Faro ni manduna ba hae. Mu ba file sabule ya ku lu bulaisa.”

Tapelo ya Mushe

22Cwale Mushe a kutela hape ku Muñ'a Bupilo, mi a li, “Mulena, u nyandisezañi sicaba se? U ni lumeziñi kwanu? 23Haisali ni taha ku Faro ku t'o bulela ka libizo la hao, ki peto yena s'a kala ku nyandisa hahulu sicaba sa hao. Mi ha ku na tuso y'o si ezelize!”

Currently Selected:

Mututo 5: Lozi09

Highlight

Compare

Copy