Mututo 8

Limbotwe

1Cwale Muñ'a Bupilo a li ku Mushe, “Zamaya ku Faro, u y'o li, ‘S'a bulela Muñ'a Bupilo ki se, u li, Tuhela sicaba sa ka si zamaye, si y'o ni lapela. 2Utwa, haiba u si hanisa ku ya, ni ta bakisa naha ya hao kamukana ka limbotwe. 3Nile i ka tala ya zona. Li ta omboka mwateñi, li kene mwa ndu ya hao, kwa musiyo, mane li fite ni fa mumbeta wa hao. Li ta kena cwalo ni mwa mandu a manduna ni a batu ba hao, mwa maiso a mina ni mwa lipiza cwalo. 4Mane li ta ku pahama, wena, batu ni manduna ba hao kamukana.’ ”

5Muñ'a Bupilo a li ku Mushe, “Bulelela Aruni kuli a nanulele mulamu wa hae fahalimw'a linuka, maabwa ni masa, mi a eze kuli limbotwe li tahe mwa naha ya Egepita.” 6Aruni a otolola lizoho la hae fa mezi, mi limbotwe za zwa, za tala naha kamukana. 7Kono ni bona ba mabibo ba zwisa limbotwe ka mabibo a bona mi za taha mwa naha.

8Faro kih'a biza Mushe ni Aruni, a li, “Mu lapele ku Muñ'a Bupilo kuli a zwise limbotwe ze ku na, ni kwa batu ba ka, mi ni ta lumelela sicaba sa mina kuli si ye, si y'o ezeza Muñ'a Bupilo litabelo.”

9Mushe a li ku Faro, “Ni tuse ka ku ni bulelela nako fo lu ta ku lapelela wena, manduna ni batu ba hao kaufela, kuli limbotwe li zwe ku mina, ni mwa mandu a mina, mi li siyale feela mwa Nile.”

10Faro a alaba, a li, “Kamuso.”

Mushe a li, “Ku ta ezahala ka m'o bulelela, kuli u zibe hande kuli ha ku na mulimu yo muñwi ya swana ni Muñ'a Bupilo, Mulimu wa luna. 11Limbotwe li ta zwa ku wena, ni mwa mandu a hao. Li ta zwa kwa manduna ni kwa batu ba hao, mi se li ta fumaneha mwa Nile feela.” 12Mushe ni Aruni ba zwa ku Faro, mi Mushe a lapela Muñ'a Bupilo ka ku tiiseza kabakala limbotwe z'a n'a tisize ku Faro. 13Muñ'a Bupilo a eza mw'a n'a kupezi Mushe, mi limbotwe ze mwa mandu, mwa malapa ni mwa masimu, za shwa. 14Maegepita ba li kubukanya ka mabunda a matuna, mi naha kamukana ya nunka zona feela. 15Kono Faro h'a bona kuli se ku bata ku luka, a itatafaza pilu hape, mi h'a si ka isa pilu kwa kupo ya Mushe ni Aruni, sina mw'a n'a bulelezi Muñ'a Bupilo.

Tumbulu-mbulu

16Muñ'a Bupilo a li ku Mushe, “Bulelela Aruni kuli a nate fafasi ka mulamu wa hae, mi liluli li ta fetuha tumbulu-mbulu mwa naha ya Egepita kamukana.” 17Aruni a nanula mulamu, mi a nata fafasi. Liluli la fetuha tumbulu-mbulu, mi twa t'o kataza batu ni lifolofolo. Mwa Egepita kaufela liluli la fetuha tumbulu-mbulu. 18Kamukwaoswana ba mabibo ni bona ba lika ku tisa tumbulu-mbulu ka mabibo a bona, kono ba palelwa. Batu ba katazwa ki tumbulu-mbulu hamohocwalo ni lifolofolo. 19#Luk 11.20 Ba mabibo ba li ku Faro, “Ye ki kezo ya Mulimu.” Kono Faro a itatafaza pilu, mi a hana ku mamela ze ne bulelwa ki Mushe ni Aruni, sina mw'a n'a bulelezi Muñ'a Bupilo.

Linzi

20Muñ'a Bupilo a li ku Mushe, “Kamuso i sa li kakusasa, u y'o katanyeza Faro h'a ya kwa nuka, mi u li ku yena, ‘S'a bulela Muñ'a Bupilo ki se, u li, Lukulula sicaba sa ka, si y'o ni lapela. 21Haiba u si hanisa ku zamaya, ni ku lemusa kuli ni ta lumelela linzi ku wena, kwa manduna, kwa batu ba hao ni mwa mandu a hao. Mwa mandu a Maegepita, mane ni fafasi fo ba ta yema, ku ka tala linzi feela. 22Ka lizazi leo, ni ta babalela sibaka sa Gosheni mo ba pila batu ba ka. Kwateñi ku si ke kwa ba ni linzi, ili kuli mu zibe kuli na, Muñ'a Bupilo, na sebeza mwa naha mo. 23Ni ta beya fapahano mwahal'a sicaba sa ka ni sicaba sa hao. Makazo yeo i ta ezehala kamuso.’ ” 24Muñ'a Bupilo a eza cwalo, mi linzi ze ñata-ñata za kena mwa ndu ya Faro, mwa mandu a manduna ba hae ni mwa naha kaufela ya Egepita. Naha ya sinyiwa ki linzi.

25Cwale Faro a biza Mushe ni Aruni, a li, “Mu zamaye, mu y'o ezeza Mulimu wa mina litabelo hona mwa naha mo.”

26Mushe a alaba, a li, “Ha ku swaneli ku ezwa cwalo, kakuli lifolofolo ze lu tabelanga Muñ'a Bupilo, Mulimu wa luna, Maegepita ba li ki mulatu o mutuna ku li bulaya. Haiba lu eza fapil'a Maegepita litabelo ze ba li ha li lukeli, ba ta lu pobaula ka macwe ba lu bulaye. 27Lu swanezi ku nga musipili wa mazazi a malalu mwa naheñi ku y'o ezeza Muñ'a Bupilo wa luna sitabelo sina mw'a lu laelezi.”

28Faro a li, “Ni ta mi lumelela ku y'o ezeza Muñ'a Bupilo wa mina litabelo mwa naheñi, haiba mu sa yi kwahule. Mu ni lapelele ni na.”

29Mushe a alaba, a li, “Ni sa ya feela, ni ta lapela ku Muñ'a Bupilo kuli kamuso linzi li ku siye, wena, manduna ni batu ba hao. Kono u si ke wa lu puma hape, mi wa hanisa batu ku y'o ezeza Muñ'a Bupilo litabelo.”

30Mushe a zwa ku Faro, a y'o lapela Muñ'a Bupilo. 31Mi Muñ'a Bupilo a eza ka mw'a n'a kupela Mushe. Linzi za fela ku Faro, kwa manduna ni kwa batu ba hae. Za fela ku tokwa nihaiba i liñwi. 32Kono ni ka yona nako yeo, Faro a tatafala, mi h'a si ka lumelela sicaba ku ya.

Currently Selected:

Mututo 8: Lozi09

Highlight

Copy

Compare