Simuluho 12

Abrame u bizwa ki Mulimu

1 # But 10.5; Lik 7.2-3; Maheb 11.8 Cwale Muñ'a Bupilo a li ku Abrame, “U tute mwa naha ya henu, u siye banabahenu, ni munzi wa ndat'aho, mi u ye mwa naha ye ni ta ku supeza yona. 2Ni ta atisa lusika lwa hao, mi lu ta ba sicaba se situna. Ni ta ku tohonolofaza, mi libizo la hao li ta tuma, mane li sebeliswe ha ku tohonolofazwa.

3 # Magal 3.8 “Ni ka tohonolofaza

ba ba ku tohonolofaza,

kono ni ta kuta ba ba ku kuta.

Macaba kamukana a lifasi a ta ni kupa

kuli ni a tohonolofaze

sina mo ni ku tohonolofalelize.”

4Abrame ha s'a na ni lilimo ze mashumi a supile ka ze ketalizoho, a tuta mwa Harani mi a ya ni Lota sina Muñ'a Bupilo ha n'a mu bulelezi. 5Abrame a nga musal'a hae Sarai ni Lota mwan'a munyan'a hae, ni liluwo la bona kaufela hamohocwalo ni batanga ba bona kamukana ni ze ne ba na ni zona mwa Harani, mi ba funduka ku ya kwa naha ya Kanana.

Ba fitile mwa Kanana. 6Cwale Abrame a zamaya naha yeo mane a ba a t'o fita fa sibaka se si kenile sa munzi wa Sikemi, kwa kota ya oke ya More. Ka yona nako yeo, Makanana ne ba sa pila mwateñi. 7#Lik 7.5; Magal 3.16 Muñ'a Bupilo a iponahaza ku Abrame, mi a li ku yena, “Ye ki yona naha ye ni ka fa lusika lwa hao.” Hona foo, Abrame a yaha katala. A yahela Muñ'a Bupilo ya n'a iponahalize ku yena. 8Mwamulaho a zeo, a tutela kwa mboela kwa lilundu le li li kwa upa wa munzi wa Betele mi a y'o toma mafulo a hae mwahal'a Betele kwa wiko, ni Ai kwa upa. Ni hona fa sibaka seo, a yaha katala mi a lapela Muñ'a Bupilo. 9Kih'a tutela kwa mboela. A zamaya a nz'a toma mafulo, a libile kwa sibaka sa Negebe.

Abrame u ya kwa Egepita

10Kono ne ku si na lico mwa naha yeo, mi kakuli tala n'e li ye tuna, Abrame a zwelapili a ya kwa mboela, kwa Egepita, ku y'o pila kwateñi nakonyana. 11Ha n'a sa bata ku tula museto kuli a kene mwa Egepita, a li ku musal'a hae Sarai, “Bona, wena u musali yo munde. 12Ha ba ta ku bona, Maegepita ba ta li, ‘Ki musal'a Abrame yo.’ Ibehe ba ta ni bulaya kuli ba ikungele wena. 13#Sim 20.2; 26.7 Cwalehe, u ba bulelele kuli u kaizel'a ka, mi kabakala hao, ba ta ni pilisa hande.” 14Ha s'a tulile museto ku kena mwa Egepita, Maegepita ba bona kuli musal'a hae n'e li yo munde hahulu. 15Manduna ba mu bona, mi ba y'o bulelela Faro ka za bunde bwa hae, mi Sarai a iswa kwa ndu ya hae. 16Kabakala hae, Faro a pilisa hande Abrame, mane a mu fa batanga ba banna ni ba basali, limbongolo za banna ni za basali, ni likamele.

17Kono kakuli Faro n'a ngile Sarai, Muñ'a Bupilo a kenyeza Faro ni ba ndu ya hae matuku a maswe. 18Kiha s'a biza Abrame, mi a t'o mu buza, a li, “Kiñi s'o ni ezelize cwalo? Kikabakalañi ha n'o si ka ni bulelela kuli yo ki musal'a hao? 19Kiñi ha n'o ize ki kaizel'a hao, mane na ba na mu nga ku mu nyala? Ki yo musal'a hao. U mu nge, mi u zwe fa!” 20Faro kiha s'a laela batu ba hae ku nga Abrame ni musal'a hae ni za bona kamukana, mi ba ba zwisa mwa naha ya hae.

Currently Selected:

Simuluho 12: Lozi09

Highlight

Copy