Sunda hi suma a sunuzinid’a 20

Ambas sa Maseduwan-nda ki d’a Gres-sid’a

1Kid’a yalâ ba dad’a, Paul mi tok suma a he gagazid’ina. Bugol la mi gigid’ezi gigeta, mi gazi depa, mi tchol á i Maseduwan. 2Kid’a mi tit yam andaga ndata peta, mi giget suma d’engzengâ ki wal mam mba tchid’a ngola. 3Bugola, mi i yam ambas sa Gres-sa, mi kak sä kua tilâ hindi. Kid’a mi min á djak kur batod’a á i Siri-d’a, Juif-fâ a ndjak vunazi á vumu. Kayam ndata, mi nga hurum á hulong ki lovot ta Maseduwan-nda. 4Suma a tinima ba wana: Sopater Pirus ma Bere-na goroma, Aristarik ki Sekundus ni suma Tasaloni’â, Gayus ma Derbe-na ki Timote, Tisik ki Trofim ni suma Asi-na. 5Wani sum ndazina a i avogo, a djubumi sä Trowas. 6Kid’a bur ma vun til ma lum kavungô ma bei angufina kal dad’a, ami tcholomi avo Filip ki batod’a. Ami lami burâ vahl tua ba, ami fazi sä Trowas, ami kagami kua burâ kid’iziya.

D’u d’a dananda hi Paul la avo Trowas-sa

7Kur bur ma dimasâ, kid’a ami nga toka á mbruk avungônid’a, Paul mi had’azi zlad’a ngola. Kayam mi nga hurum ala le yina mi fo wa ni, mam iya, mi dazi zlad’a gak andjege dangâla. 8Lalamba ablaud’a ti nga kur gong nga fiyak ka yam ndrata akulo d’a ami nga toka kuad’a. 9Gor azongâ, simiyêm ala Eutis, mi nga kaka ir fenetred’a akulo. Mi bur sena d’ad’ak kayam Paul mi de zla d’a fiyaka. Kur sena mi ndeï kä ir fenetred’a hi gong nga yam ndrata akulo á hindid’id’a, a hlumî matna. 10Wani Paul mi tchuk asem kä, mi hud’o kä kamu, mi vum atamu. Mi dazi ala: Agi bagi tchi ma wüna, kayam mi nga karid’a. 11Kid’a Paul mi hulong djak akulod’a, mi mbruk avungôna kä, mi te, mi dazi zla d’a fiyaka gak yina fo. Bugol ndata, mi iya. 12Azi i ki gor azong máma karid’a, a le furîd’a ngola.

Tit ta avo Trowas ki Milet-ta

13Ami imi avogo djagami kur batod’a á imi Asos, ata yima ami min hlami Paul kuana, kayam mi dami ala mam min á tit kasemu. 14Kid’a ami ngavam Asos-sa, ami hlum kur batod’a, ami imi Mitilen. 15Ami tcholomi kua ki batod’a, ami lami burâ tu, ami kalami kur til la Kiyo-d’a. Kid’a yina fo dad’a, ami mbami sä Samos, ndjivinda ami kalami Milet. 16Paul mi min kal Efes, kayam mam min ve yam Asi d’i. Mam nga mi b’at tam ala le ndaga ni, mam le bur ma Pantekot-na avo Jerusalem.

Paul mi de zlad’a mi suma nglo suma Efes-sâ

17Kid’a Paul mi nga avo Milet-ta, mi ge sunda Efes, mi yï nglo suma gol toka gevemu. 18Kid’a azi mbaza gevemba, mi dazi ala: Agi tagi wagiya, ni nana ba, an kak adigagi ki dedei d’a an tin asen yam andaga d’a Asi-d’a gak ini ge. 19Ata yi máma an le sunda mi Salad’a ki kukud’oka ki simina iran ki kuk ka mba kanda ki vun ma Juif-fâ a ndjagam kana. 20Agi wagiya, an ar nga bei dagi ahle suma ala ni djivid’a kagiya na d’i. An had’agi avok suma pet, hur azina hur azina mi. 21An le glangâsâ mi Juif-fâ kandjaf suma dingâ ala a mbut huruzi yam tchod’a avok Alona, a he gagazid’a mi Salad’a Jesus mi.

22Ki tchetchemba, Muzuk ma bei tchod’a ba na nga mi zud’un á i Jerusalem, an we nga vama mba mi fan sä hina d’i. 23Wani Muzuk ma bei tchod’a ba na mi lan glangâsâ kur azì ma ngol ma lara ge pet ala djinda ki djop vuna a nga djubunu. 24Wani an gol tan ni vama kal tegles si, á ndak vun tit manda ki sun nda Salad’a Jesus mi handjid’a, nala, á tchi wal Zla d’a Djivi d’a yam sumad’a hAlonid’a.

25Agi suma an tit adigagi á tchagi wala yam leud’a hAlonid’ina, an wala ki tchetchemba, agi mba wan iran nduo d’a. 26Kayam ndata, an nga ni lagi glangâsâ ini, le sa adigagi ba woyo ni, zla nga kan ndi. 27Kayam an dagi minda hAlonid’a woi pet, an ngeyegi nga va d’i. 28Agi gologi tagi djivi kadesâ hi suma pet ma Muzuk ma bei tchod’a ba na mi tinigi kam á polina. Agi pologi suma toka hAlona d’a mi guzut ki buzuna hi Goromid’a. 29An wala bugol i manda, suma d’igi ngûna na a mba kal adigagiya, a mba ar adesâ hi tumiyônina d’i. 30Suma a mba tchol nadigagi á hat hat ta tchod’a á tan suma a he gagazid’ina ad’uziya. 31Kayam ndata, ar agi kagagi ki ndjola. Agi djib’eregiya, kur bizad’a hindi, andjege ki faleya, an gat nge nge pî adigagi ki simina iranu.

32Ki tchetchemba, an aragi abo Alona, kur suma mam mba nga kad’enga á minigi akulo á hagi ahle suma djivi suma mam nga mi ngomozi akulo yam suma mi tinizi irazi vazina. 33An le nga d’od’oka yam beged’a d’oze lor roze baru hi sa d’i. 34Agi tagi wagiya, an le sunda kabon á fe vama kid’agana ki ma hi suma zlapa ki sed’ena. 35Kur ahlena pet, an tagagi á le sun nda djivid’a, kayam agi ndjunugi suma hohoud’a. Agi djib’eregi yam zlad’a hi Salad’a Jesus d’a mam tam dat ala: Alona mba mi b’e vunam yam sama hed’a kal ma ved’a d’a.

36Kid’a Paul mi de hina dad’a, mi grif kä, mi tchen Alona ki sed’ezi pet. 37Azi pet a tchi ngola, a ve Paul ataziya, a gum depa. 38Azi nga ki hur ma wurana yam zla d’a mi dazizi ala azi dok wum iram bugol luo d’a. A tinim gak kur batod’a.

Currently Selected:

Sunda hi suma a sunuzinid’a 20: BA

Highlight

Copy