Sunda hi suma a sunuzinid’a 21
21
Paul mi hulong Jerusalem
1Bugol la ami walami ki sed’ezi wala, ami djagami kur batod’a, ngami voromi aduk d’ingêr á imi yam til la Kos-sa. Tcha ndjivinda ami mbami Rot, ami tcholomi kua, ami imi Patara. 2Ata yi máma, ami fami bato d’a ding nga nga d’i djak á i Fenisi-d’a. Ami djagami kua, ami imiya. 3Kid’a ami mbami go ki til la Sipre-d’id’a, ami arat yam bigami d’a gulad’a, ami kalami gak mba mi sä Siri. Ami tchugumi asemi avo Tir; ni kua ba, azi mba yo ahlena hi batod’ina kä woyo. 4Kid’a ami fami suma a he gagazid’ina fed’a, ami lami burâ kid’iziya ki sed’eziya. Muzu’â hAlonina mi dazi ala a de mi Paul ala mi djak i Jerusalem mbi. 5Kid’a bur ma kid’iziyana dapa, ami tcholomi á imi avogo. Azi kamiyôzina ki grozina pet, azi tinimi gak a ndami sä woi bugol azì ma ngolâ. Ata yi máma, ami grivimi kä avun alum ma ngolâ, ami tchenemi Alona. 6Ata yi máma, ami gami tami depa, ami djagami kur batod’a, azi hulong avo hataziya.
7Ata yima ami dabami tit mami d’a Tir-ra dapma, ami mbami sä Potolemeis, ami gami b’oziyoina depa, ami lami burâ tu ki sed’eziya. 8Tcha ndjivinda ami tcholomi mbami sä Sesare. Ami kalami avo hi Filip ma tchi wal Zla d’a Djivid’ina, ni ma aduk suma kid’iziya suma a manazi avo Jerusalem-ma. Ami kagami ki sed’emu. 9Mam nga ki grom yuguneina fid’i suma a nga djok vun Alonina.
10Kid’a ami kagami kua burâ ngolid’a, ma djok vun Alona ma simiyêm ala Agabus-sâ, mi tcholï Jude, mi mba gevemiya. 11Mi yo d’i’â hi Paul-lâ, mi djin asem kabomu. Mi dala: Muzuk ma bei tchod’a ba na mi de woi ala: Juif suma Jerusalem-ma a mba djin sala d’ik máma hina, a mba hum abo andjaf suma dingâ mi.
12Kid’a ami hum zla ndatid’a, ami ki suma ata yi mámina, ami tchenemi Paul ala ar mi djak i Jerusalem mbi. 13Ata yi máma, Paul mi hulong dami ala: Ni kayam me ba, agi tchigi á pad’an vunadigan na ge? Kayam an min tan ná djinda hol li, wani á mit sä Jerusalem yam simiyê Salad’a Jesus. 14Ata yima ami ndagami á d’elem mbi, ami dami ala: Ar Salad’a mi le min mamba.
15Bugol bur máma, ami minimi ahle mamina, ami djagami imi Jerusalem. 16Suma hat suma Sesare-na a mba ki sed’emi mi. A imi avo hi Minason ma Sipre-na, ni ma ami mba tchugumi avo hatama. Sa máma ni ma he gagazid’a avok deina.
D’ud’a hi Paul la avo hi Jacques-ka
17Kid’a ami mbami sä Jerusalem-mba, b’oziyoina a vami ki furîd’a. 18Tcha ndjivinda Paul mi i ki sed’emi avo hi Jacques; suma nglo suma gol toka pet a nga toka kua mi. 19Bugol la Paul mi gazi depa ged’a, mi nde mi vazi ad’u ahle suma Alona mi lazi aduk andjaf suma dingâ kur sun mambina.
20Kid’a azi hum zla mamba dad’a, a gile Alona, a dum ala: Wiyemina, ang we Juif-fâ ni dudubu suma a he gagazid’ina, azi pet tazi nga d’i lazi zlezleû yam gata hi Moise-sa. 21Azi hum zla manga ala ang nga hat Juif suma a nga kaka aduk andjaf suma dingâ ala a ar gata hi Moise-sa woyo, a ngat grozina bayâd’a d’uo, a ngom zlad’a hi simiyêzid’a d’uo mi. 22Ei lei ni nana? Gagazi, azi mba hum ala ang mba wa. 23Kayam ndata, ang le vama ami nga dangzina. Ami nga ki suma fid’i suma a hle vunazi mAlonina. 24Ang yoziya, ang mbut tang yed’et ki sed’eziya, ang wurak kaziya, kayam azi wel yazi woyo. Hina wani, suma pet a mba wala zla d’a azi humut kanga ni zla d’a kad’a, wani azi mba wala ang nga ngom gata hi Moise-sa mi. 25Wani kayam andjaf suma ding suma a he gagazid’ina, ami b’irizi mbaktumba ala azi tahle suma a ngad’azi á tuwal fileinina d’oze buzuna d’oze vama guluta d’i, a le mizeuna d’uo mi.
26Ata yi máma, Paul mi yo suma fid’i ndazina. Tcha ndjivinda mi mbut tam yed’et ki sed’eziya. Mi kal kur gong nga kud’ora hAlonid’a á de woi ala fata bur mazi ma azi mbut tazi yed’etna dapa, nge nge pî adigazi mi he vama ngat buzuna kamu d’a.
A ve Paul kur gong nga kud’ora
27Kid’a bur ma kid’iziyana ar go á dapid’a, Juif suma Asi-na a we Paul kur gong nga kud’ora hAlonid’a. Azi zut ablau suma akulo ala a vumu. 28A er ad’uzi akulo ala: Agi Israel-lâ, agi mbeï ndjunumiya. Wana ni sama nga mi tchi wala ata yina pet ala suma a noî Israel-lâ ki gata hi Moise-sa ki gong nga kud’ora hAlona d’a wanda woi mi na. Wani ki tchetchemba, mi mbeï wa kandjaf suma dingâ kur gong nga kud’ora hAlonid’a á mbut yi mei ma a tinim iram vama ndjendjed’a. 29Kayam azi we Trofim ma Efes-sâ adjeu ki Paul hur azì ma ngol ma Jerusalem-ma. A djib’er ala Paul mi kal wa ki sed’em kur gong nga kud’ora hAlonid’a. 30Suma hur azì ma ngolîna pet a tum akulo, a ringîya, a ve Paul, a tanam mbei abu kur gong nga kud’ora hAlonid’a. Ata yi máma na wat, a duk vun gong nga kud’ora hAlonid’a. 31Kid’a azi hal á tchumba, vuna mi i mi fe ma ngolâ hi azigar suma Romê-nina ala: Suma Jerusalem-ma a nga le hina wü. 32Ata yi máma na wat, mi yo azigarâ ki suma nglo suma avorozina, a ring ataziya. Kid’a Juif-fâ a we ma ngol máma ki azigar mama mi d’a, a ar Paul bei tod’a. 33Ata yi máma, ma ngolâ hi azigarîna mi mba go, mi vumu, mi de mi sum mama ala a djinim ki kindjingâ mbà. Mi djop Juif-fâ ala: Ni ma lara ge? Mi le ni me ge? 34Aduk ablau sum ndazina, suma dingâ a er ad’uzi akulo ki zla mazid’a vaziya, suma dingâ a er ad’uzi akulo ki zla mazid’a vaziya. Kid’a mam ndak á wäd’u zla ndata tetet tuo abo sor ndatid’a, mi de mi sum mama ala a i ki Paul hur gegerâ. 35Kid’a mi mbaza avun gonga, ata yima djak akulona, azigarâ a hle Paul akulo abo b’at ta suma a nga b’at tazi kam kukud’a. 36Kayam ablau suma a mbeï blogomu, a nga er ad’uzi akulo ala: Tchum mbeyo!
Paul mi väd’u zla mamba
37Ata yima azi nga i ki Paul kur gegerîna, Paul mi de mi ma ngolâ hi azigarîna ala: Ang aran lovota á dang zlad’a zu?
Mi djobom ala: Ang we vun Gre’â zu? 38Angî ma Ezipte ma zut suma fata ka tchetchem á le yam mba ad’enga ki suma te yamba ang yo suma tchi matna dudubu fid’i ang i ki sed’ezi abagei hur fulîna d’uo zu?
39Wani Paul mi dum ala: An ni ma Juif ma Tarsis ma Silisi-na. Azì mana nazì ma ngolâ. An nga ni tchenengû, ang han lovota á de zlad’a mi sum ndazina.
40Kid’a mam hum lovotid’a, Paul mi tchol ata yima djak akulona, mi lazi abomu. Kid’a suma pet a senga, mi dazi zlad’a ki vun Hebre-na ala:
Currently Selected:
Sunda hi suma a sunuzinid’a 21: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
