Sunda hi suma a sunuzinid’a 22

1B’oziyona kabuyonu, agi humugi ad’u zla man nda an nga ni dagi ki tchetchem wandid’a. 2Kid’a azi hum nga mi de zlad’a ki vun Hebre-nid’a, azi pet a seng silil. Mi dazi ala:

3An ni ma Juif-fâ, a vud’un ni kur Tarsis sa Silisi-d’a. Wani a wulun ni ka hî kur Jerusalem. Gamaliyel ni ma had’an ad’u gata habuyoi ngolo d’a d’ingêra. Tan nga d’i lan zlezleû yam Alona d’igi agi tagi nga d’i lagi zlezleû ini na mi. 4An djop vun suma a nga kur lovota hi Salad’id’ina ngola heî. Suma hiuna a bo. An djin andjofâ karopma, an tchuguzi dangeina mi. 5Ma ngol ma ngat buzuna ki suma nglona pet a ndak á le glangâsâ kanu, kayam an ve mbaktumba nabozi á i ata b’oziyoi Juif suma Damas-sâ, kayam le an ni fe suma a he gagazid’ina ni, an ni yozi ni mbazi Jerusalem á lazi ndaka.

Paul mi väd’u mbut hur mama

(Gol Sun SS 9.1-19; 26.12-18)

6Paul mi de kua ala: Kid’a an nga kur tita tua d’a, an mba go ki Damas kafata falei d’ad’ar. Atogo hina zak, wile d’a ngola tcholï akulo, ti b’o nguyunu. 7An puk kä, an hum dela nga d’i dan ala: Saul, Saul, ni kayam me ba, ang djobon vunan hina ge? 8An djobom ala: Salana, angî nge ge? Mam dan ala: Ni an Jesus ma Nazarat ma ang nga djobom vunama. 9Suma ki sed’ena a we b’o ndata, wani azi hum nga dela hi sama mi dan zlad’ina d’i. 10Ata yi máma, an djobom ala: Salana, an le ni me ge? Salad’a mi hulong dan ala: Ang tchol akulo, ang i Damas. A mba tagang ahlena pet suma Alona mi hang vuna kazi á led’ina. 11Kid’a iran ndi duk abo wiled’a hi b’o ndatid’a, suma a nga ki sed’ena a gan dungûruna abonu, a in Damas.

12Sana simiyêm ala Ananiyas mi nga. Ni sama le mandara Alona kur gata hi Moise-sina, ni sama Juif suma Damas-sâ pet a nga le glangâs ma djivina kama mi. 13Mi mba, mi tchol gevenu, mi dan ala: Wiyena Saul, ang mal irang ngeyo. Ata yi máma na wat, iran ndi mal leyo, an wumu. 14Mi dan ala: Alona habuyoi ngolona mi manang avok á we min mamba, á we mam Ma d’ingêrâ, á hum zla d’a tcholï avunamba mi. 15Kayam ang mba mbut ma glangâs mama avok suma pet yam vama ang wuma, yam vama ang humuma mi. 16Ki tchetchemba, ang djup mi me d’ei ge? Ang tchol akulo, ang le batemba, ang yi simiyê Salad’a, mi mbuzung tcho manga woyo.

Paul mi vad’ud’a yam sun mamba

17Paul mi de kua ala: Ata yima an hulong Jerusalem-ma, an nga ni tchen kur gong nga kud’ora hAlonid’a, vana nde tam mbei iranu. 18An we Salad’a, mi dan ala: Ang nde woi atogo kur Jerusalem, kayam suma a nga ve zla d’a ang nga dat kanda d’i. 19An hulong ni dum ala: Salad’a, azi tazid’a we an kal kur gong nga tok ka lara ge hi Juif-fîd’a, an tchuk suma a he gagazid’a kangâ dangeina, an tozi mi. 20Ata yima suma tchi Etienne mang ma glangâsîna, an nga tchola geveziya, an ndjak vunan ki sed’ezi kua, an ngom baruna hi suma a tchuma mi. 21Ata yi máma, Salad’a mi dan ala: Ang iya, kayam an mba ni sunung ngei dei mandjaf suma dingâ.

Paul azi ki ma ngolâ hi azigarîna

22Suma a hum Paul gak ata yima mi mba ata zla ndatina. Ata yi máma, a er ad’uzi akulo ala: Sama hina na, tchum mbeyo, mi ndak á kak karid’a d’i. 23A er ad’uzi akulo, a fok baru mazina woyo, a yak andagad’a akulo ir simetna.

24Ma ngolâ hi azigar suma Romê-nina, mi he vuna mi azigar mama ala a mbeï ki sed’em hur gegerâ. Mi dazi ala a djobom ad’u zla mamba ki tod’a, ni hina ba, mam wäd’u vama ablau suma a nga siwel kama. 25Kid’a azi djinim á tom ki blafîd’a, Paul mi de mi ma ngol ma azigarâ abom kis ma nga tchola ata yi mámina ala: Djivid’a a to sama Romê-na bei ka sariyad’a kam zu?

26Kid’a ma ngol ma azigarâ abom kisâ mi hum zla ndatid’a, mi i ata ma ngol ma kalâ, mi dum ala: Ang min le ni nana ge? Kayam sa máma ni ma Romê-na.

27Ma ngol ma kalâ mi mba, mi de mi Paul ala: Ang danu, angî ma Romê-na zu?

Mam dum ala: Â.

28Ma ngol ma kalâ mi hulong dum ala: An ma wurak beged’a ngola á mbut ma Romê-na.

Paul mi dum ala: An ni ma Romê-na kur vut manda dei. 29Kayam ndata, suma a min á djop ad’u zla mamba ki tod’ina, a aram atogo zak. Kid’a ma ngol ma kalâ mi hum ala Paul lî ma Romê-na d’a, mi le mandarâ, kayam mam djinim ki kindjingâ.

Paul mi nga avok suma nglo suma b’ak zlad’a

30Tcha ndjivinda ma ngol ma kalâ mi min á we woi tetet ni kayam me ba, Juif-fâ a kal yam Paul ge? Kayam ndata, mi bud’um mbeyo, mi he vuna mi nglo suma ngat buzuna ki suma nglo suma b’ak zlad’a ala a togï pepet. Mam mba ki Paul avoroziya.

Currently Selected:

Sunda hi suma a sunuzinid’a 22: BA

Highlight

Copy