Sunda hi suma a sunuzinid’a 23

1Ata yi máma, Paul mi so iram ata suma b’ak zlad’a, mi dazi ala: B’oziyona, an nga avok Alona ki hur ma tuna gak ini.

2Ananiyas ma ngol ma ngat buzuna, mi he vuna mi suma a nga tchola gevema ala a tumum vunamu. 3Kayam ndata, Paul mi dum ala: Alona mba mi tumungû, ang ma d’igi gulumun ma a gulud’um hapina na na. Ang kak á kan sariyad’a ata minda hi gatid’a, wani ni kayam me ba, ang tchila kat ang he vuna á tonu ge?

4Suma a nga tchola kuana a dum ala: Ang ngul ma ngol ma ngat buzuna mAlonina!

5Paul mi dazi ala: B’oziyona, an we nga d’ala mam mi ma ngol ma ngat buzuna d’a d’i, kayam mbaktumba hAlonid’a ti dala: Ang de zla d’a tchod’a yam ma te yamba hi sum mangîna d’i.

6Wani kid’a Paul mi we suma b’ak zlad’a suma dingâ ni Sadusiyêna, suma dingâ ni Fariziyênid’a, mi de ki delem akulo aduk suma b’ak sariyad’a ala: B’oziyona, an ni ma Fariziyêna, gor vuta hi Fariziyênid’a mi. Ni kayam zla d’a tin hurâ ki tchola hi suma matnid’a ba, a yan ini ata yima ka sariyad’a wana.

7Kid’a mi de hina dad’a, tuguyod’a tchol aduk Fariziyêna ki Sadusiyêna, ablau suma a wal kä mbà. 8Kayam Sadusiyêna a nga hat ala: Suma matna a mba tchol akulo d’i, malaikana azi ki muzuk ma tetengâ mi nga d’uo mi, wani Fariziyêna a he gagazid’a ala azi pet a nga. 9Yalâ tchol akulo ngola. Suma ding suma hat gata hi Fariziyênina a tchol ki tuguyod’a, a dala: Ami wami nga vama tcho yam sa máma d’i. Le ba muzu’â d’oze malaikana mi dum zlad’a ni, agi mba lagi ni nana d’ang nge?

10Ata yima tuguyo mazid’a nga d’i i avogovo’â, ma ngolâ hi azigarîna mi le mandarâ, kayam dam azi mba pau ini Paul leyo. Kayam ndata, mi he vuna mi azigarâ á surop kä á vumî kad’enga adigaziya, a mba ki sed’em hur gegerâ.

11Kur andjege ndata, Salad’a mi nde tam mbei ir Paul, mi dum ala: Ang ve tangû, kayam d’igi ang le glangâs mana ka hî avo Jerusalem na, mbeî ang mba le glangâsâ avo Rom mi.

Suma a ndjak vunazi á tchi Paul

12Kid’a yina mi fo dad’a, Juif-fâ a tok taziya, a gun tazi ala azi mba te d’oze tche va d’i gak azi tchi Paul mbeî tua. 13Suma a gun tazina, a kal dok fid’i. 14Azi mbaza gen nglo suma ngat buzuna ki suma nglona, a dazi ala: Ami gunumi tami ki gun nda tchod’a ala ami tami va d’i gak ami tchami Paul mbeî tua. 15Kayam ndata, agi zlabagi ki suma nglo suma b’ak zlad’a pet, agi sunugi gen ma ngolâ hi azigarîna, mi mbeyegï Paul. Agi dum ala agi minigi á fek ad’u zla mamba fek ka kala. Avok bei mam mbaza hî d’a, ami tami minimi tami á tchum aduk glovod’o.

16Wani Paul ndjazum mi hum zla mazi d’a gumunda. Mi i hur gegerâ, mi kal kua, mi de zla ndata mi Paul. 17Paul mi yi ma ngol ma azigarâ abom kis ma dingâ tu, mi dum ala: Ang i ki gor azong ma wana mi ma ngolâ hi azigarîna, kayam mi nga ki zlad’a á dumu.

18Kayam ndata, mi vumu, mi i ki sed’em mi ma ngol ma kalâ hi azigarîna. Mi dum ala: Paul ma dangeina mi yanu, mi tchenen ala an mbang gor azong ma wana, kayam mi nga ki zlad’a á dangû.

19Ma ngol ma kalâ hi azigarîna mi vun abomu, mi i ki sed’em mbei gen nde, mi djobom ala: Ni zla me ang nga ki sed’et á dandji ge?

20Gor azong máma mi dum ala: Juif-fâ a min tazi á djobong á i ki Paul ndjivin ata yima bak zlad’a, d’igi azi min á djop ad’u zla mamba tetet na. 21Wani ang humuzi d’i, kayam suma a ngei nga tazi á tchumu, ablawazi kal suma dok fid’i. Azi gun tazi ala azi te d’oze tche va d’uo mi, gak azi tchum mbeî tua. Ki tchetchemba, azi min wa tazi da’, azi djup mi zla ma anga.

22Kayam ndata, ma ngol ma kalâ hi azigarîna mi ar gor azong máma mi iya, mi gad’am ala: Ang de zla d’a ang dandjid’a mi sa d’i.

A sun Paul mi ma te yamba Felix

23Mi yi nglo suma azigarâ abozi kikisâ mbà, mi dazi ala: Agi minigi azigarâ kikis mbà ki suma akulumeina dok kid’iziya ki suma asubuyona kikis mbà á i ki Paul Sesare kur ler ra hindi d’a andjeged’a. 24Mi dazi á min akulumeina suma dingâ kayam Paul kayam mi kak kaziya, kayam azi i ki sed’em ki djivid’a mi ma te yamba Felix. 25Mi b’ir mbaktumba ala:

26An Klaut Lisiyas nga ni b’iring mbaktum mba wanda mi ang Felix ma te yam ma kal teglesâ. An gang depa mi. 27Juif-fâ a ve sama wana, a ar go a tchumu. Ata yi máma, an mbaza atazi ki azigarâ, an prud’umu, kayam an hum ala ni ma Romê-na. 28Kayam an min á we ni kayam me ba, azi kal kam ge, an i ki sed’em ata yi mazi ma bak zlad’a. 29An we azi kal kamî yam zlad’a hi gat mazid’id’a, wani zlad’a nga kam mba ndak á tchid’a d’oze á gum dangeinid’a nga d’i. 30Kid’a a dan ala a min nga tazi gumun á tchumu d’a, an sunungzi sä atogo zak wana. An de mi suma kal kama ala azi i kal sä kam sä avorongû.

31Ata yi máma, azigarâ a le d’igi a hazi vuna na, a hle Paul kandjeged’a, a i ki sed’em gak Antipatris. 32Tcha ndjivinda azi ar suma akulumeina a i ki sed’emu, azi hulongî hur gegerâ. 33Kid’a azi mbaza Sesare-d’a, a he mbaktumba mi ma te yamba, azi tin Paul kä avorom mi. 34Kid’a mam ndum mbaktum ndata ndumba, mi djop Paul ala: Angî ma lara ge? Ata yima mam wala ni ma Silisi-na na, 35mi dum ala: Suma a kal kangâ, le a mba wa ni, an mba ni hum ad’u zla manga. Mi hazi vuna kam ala a ngomom kur azina hamulâ Herot-na.

Currently Selected:

Sunda hi suma a sunuzinid’a 23: BA

Highlight

Copy