Sunda hi suma a sunuzinid’a 24

Juif-fâ a tchuk zlad’a yam Paul

1Bugol burâ vahl, ma ngol ma ngat buzuna Ananiyas, mi mba Sesare ki suma nglo suma dingâ ki grang ma dingâ simiyêm ala Tertul. Azi tchuk zlad’a yam Paul avok ma te yamba Felix. 2Kid’a Felix mi yi Paul-la, Tertul nde mi tchugum zlad’a kam ala:

3 Felix ma kal teglesâ, ni yam djivi manga ba, ami kagami kä lafiya. Ni yam ne manga ba, ang min ahlena djivid’a kayam andjaf ma wana. Ni yam djivi d’a ang nga lat ki sed’emi ata yima lara ge peta ba, suma pet a nga lang mersi ngola wan mi. 4Wani kayam an min kalang yang ngi, an nga ni tchenengû, ang hum zla mami d’a ded’a nde ki djivid’a.

5Ami fami sa máma ni sama hal zlad’a, ni mam ba, mi tchol ki huneîd’a aduk Juif-fâ yam andagad’a pet. Mam mi ma ngol ma avok adesâ hi Ma Nazarat-nina. 6Vama kal teglesâ, mi hal á mbut gong nga kud’ora hAlo maminid’a ndjendjed’a. [Wani ami vumu, ami minimi á kam sariyad’a kam yam gat mamid’a. 7Wani ma ngolâ hi azigarîna, Lisiyas, mi mba atamiya, mi b’ad’am abomi kad’enga ngola. 8Mi he vuna mi ami suma tchuk zlad’a kama ala ami imi avorongû.] Le ang tanga djobom ad’u zla mamba ni, ang mba wäd’u zla d’a ami tchugut kamba. 9Juif-fâ a ndjak vunazi ki sed’em tu, a dala: Ni na.

Paul mi väd’u zla mamba avok Felix

10Kid’a ma te yamba mi labom mi Paul á de zlad’id’a, Paul mi hulong dum ala: Kayam an wangû, angî ma ka sariyad’a handjaf ma wana bizad’a ngola, tan lan djivid’a á vang ad’u zla manda. 11Le ang min á hal ad’ud’a ni, ang mba we tetet ala kal nga burâ dogo yam mbà d’uo tua ma an i Jerusalem á kud’or Alonina. 12Azi fan nga tchi tuguyod’a ki sa kur gong nga kud’ora hAlonid’a d’oze á zut suma akulo kur gong nga toka hi Juif-fîd’a d’oze kur azì ma ngolâ d’uo mi. 13Azi ndak á fe vama tak abu ala zla d’a azi nga tchugut kanda ni zla d’a gagazid’a na d’i. 14Wani an nga ni dang ngei mbak an nga ni kud’or Alona habuyomi ngolona kur lovot ta awili d’a azi nga de kat ala ni lovot ta ata yat tuo d’a. An nga ni he gagazid’a yam ahlena pet suma gata ki suma djok vun Alona a dazina mi. 15An tin hurun yam Alona d’igi azi tazid’a a tin huruzi na á djup tchol la akulod’a hi suma d’ingêrâ ki suma bei d’ingêrâ aduk suma matnid’a. 16Kayam ndata, an nga ni b’at tan teteu á kak ki djib’er ra tchod’a kurun avok Alona d’oze avok suma d’uo mi.

17Bugol bizad’a tcha, an mba ki he d’a hawad’a mandjavan ki vama ngat buzuna mAlona mi. 18Wani Juif-fâ a a mba a fan kur gong nga kud’ora hAlonid’a ata yima an nga mbut tan yed’etna, a fan nga ki suma ablaud’a d’uo mi na, a fan nga ni kur huneî d’uo mi. 19Wani Juif suma a tcholï yam andaga d’a Asi-d’ina a nga, ni azi ba, le a nga ki zlad’a á tchugut kanu ni, a mbangzï avorongû. 20D’oze ar sum ndazina tazid’a a de vama tcho ma azi wum an lum ata yima an nga tchola avok suma b’ak zlad’a hi Juif-fîd’ina. 21Dam ni kur zla d’a tu d’a an dat ki delen akulo kid’a an nga tchola adigazi ala: Ni kayam tchol la akulod’a hi suma matnid’a ba, an nga tchola ini avorogi ata yima ka sariyad’a wana d’a kla.

22Wani Felix ma mi wäd’u zla ndata tetetna mi dazi ala: Agi i djubugi ndjö tua. Mi dazi ala: Le Lisiyas ma ngolâ hi azigarîna mi mba wa ni, an mba kagi ir zla magid’a. 23Mi he vuna mi ma ngol ma azigarâ abom kisâ á ngom Paul kur dangeina, wani mi aram mi tid’a, mi d’el buniyôm suma a mba á ndjunuma d’uo mi.

Paul mi nga avok Felix azi ki Drusil

24Bugol bur ma dingâ, Felix mi mba kamamba Drusil, ni d’a Juif-fa. Mi ge sunda á hal Paul á hum zla d’a de d’a mam nga mi dat yam he gagazi d’a yam Jesus Christ-sa. 25Wani kid’a Paul mi dum zla d’a yam tit ta d’ingêrid’a, yam ve ta d’a yam hliu tad’id’a, yam sariya d’a nga d’i mbad’a mi d’a, Felix mi le mandarâ ngola. Mi hulong dum ala: Ki tchetchemba, ang iya; fata an fe wa lovota ni, an mba ni yangî tua. 26Mi tin hurum ala Paul mba mi hum beged’a mi kla. Ni kayam ndata ba, nga mi yum yam dodogo á yo siretna ki sed’emu.

27Wani kid’a bizad’a mbà ndak dad’a, Porsiyus Festus mi vrak balum Felix. Wani kayam Felix mi min á le Juif-fâ tazi djivid’a, mi ar Paul kur dangeina.

Currently Selected:

Sunda hi suma a sunuzinid’a 24: BA

Highlight

Copy