Sunda hi suma a sunuzinid’a 27

A sun Paul avo Rom

1Kid’a azi nga huruzi á sunumi ki batod’a á i yam andaga d’a Itali-d’id’a, a he Paul azi ki suma dangei suma dingâ abo ma ngol ma azigarâ abom kisâ, simiyêm ala Juliyus, ni ma ad’u adesâ hi Romê-na ma a yum ala Adesâ hi Sesar-râ na mi. 2Ami djagami kur bato d’a Adramit-ta, ni d’a nga d’i i kur azina teteng yam andaga d’a Asi-d’id’a. Aristarik ma Tasalonik ma Maseduwan-na, mi nga ki sed’emi mi. 3Tcha ndjivinda ami mbami sä Sidon. Juliyus mi le Paul djivid’a, mi aram mi i gen buniyôma ala azi ndjunumu. 4Ami tcholomi ata yi máma, ami imi avun gongôd’id’a hi til la Sipre-d’a, kayam simetna nga mi lami heî. 5Kid’a ami djagami alum ma ngol ma go ki Silisi ki Pamfili-na djaka, ami mbami Mira yam andaga d’a Lisi-d’a. 6Ata yi máma, ma ngol ma azigarâ abom kisâ, mi fe bato d’a Alezandri d’a nga d’i i Itali-d’a, mi tchugumi kurud’u.

7Ami nga tid’imi lalam burâ ngola. Ni ki ndaka tua ba, ami mbami go ki azì ma Sinide-na. Ata yima simetna d’elemi á imi avo’â, ami tid’imi navun gongôd’id’a hi til la Kret ta go ki Salmone-d’a. 8Ad’enga heî ki sed’emi á tid’imi avun gongôd’id’a, ami mbami ata yima ding ma a yum ala Hor ra djivid’a na go kazì ma ngol ma Lase-na.

9Kid’a yina mi kalami ngolid’a, tit ta aduk mbinid’a ti mbut ni vama matna, kayam bur ma d’el tad’a bei te tena kal wa. Kayam ndata, Paul mi gad’azi ala: 10Agi suma, an wala tit ta aduk mbinid’a ti mbut ni vama matna, nga ni batod’a kahle suma kurutna hol ba, a mba ba woi d’i, wani ki ei teid’a mi. 11Wani ma ngol ma azigarâ abom kisâ mi hum ma djang batod’a ki sala batod’a kal zla d’a Paul mi data. 12Kayam yima tchol bato máma mi nga djivid’a á kak kua vun simetna d’i, suma dingâ ablaud’a a ndjak vunazi á id’a, a djib’er ala dam azi mba tcha sä Fenis ata yima tchol bato ma Kret ma vunam abo ma fladegena kabo ma sutna, vunam abo ma fladegena kabo ma norâ mi na á kak kua vun simetna zi ge?

Babar ma kur alum ma ngolîna

13Ata yima simet ma sutna nga sir lalama, azi djib’er ala azi fe wa vama azi minima. Azi pat kawei ma ve batod’a kä na akulo, a nga tit go ki vun gongôd’i d’a Kret-ta. 14Wani bugol ndjö, babar ma ngol ma a yum ala Eurakilongâ mi tcholï yam tila abo ma norâ, nga mi sir kamiya. 15Kid’a babarâ mi ve batod’id’a, ti nga kad’enga á i adigam mbi. Kayam ndata, ami arami babarâ nga mi imiya. 16Kid’a ami nga kalami gen til la gor ra a yat ala Kloda-d’a, ni ki ndaka ba, ami tanami alum mba gora akulo. 17Kid’a azi tan alumba akulo yam batod’a tanda, a djin batod’a ki ziyona kayam ti sira ngingring. Azi le mandarâ ala babarâ mba mi izi yam lesâ avun alum ma ngol ma Libi-na. Hina, azi fok barud’a hi batod’id’a kä á ar babarâ mi iziya. 18Kid’a babarâ nga mi lami ngola heîd’a, tcha ndjivinda azi nde tchuk ahle suma kur batod’ina woi aduk mbina. 19Kur bur ma hindina, azi pat ahlena hi batod’ina, a tchuguzi woi kaboziya. 20Kid’a burâ ngola ami wami nga afata d’oze tchitchiud’a d’uo abo babar ma bibik ma nga laminid’a, ami djib’eremi ala ami bami ni woyo.

21Kid’a azi le burâ ngola bei te tenid’a, Paul mi tchol akulo adigaziya, mi dazi ala: Agi suma, ladjï agi humun avok kid’a agi bei tchologi woi kur Kret-ta ni, ei nga fei ndaka hina d’i, ahlena nga ba woi hina d’uo mi. 22Ki tchetchemba, an nga ni dagiya, agi vagi tagiya, kayam sa adigagi tu pî mba mi ba woi d’i, ni batod’a hol ba, mba d’i ba woyo. 23Kayam kama andjege, malaikana hAlo man ma an nga ni lum sundina, mi tchol gevenu, 24mi dan ala: Paul, ar ang le mandar ri; mbeî ang mba tchol avok ma te yamba Sesar. Alona, kur djivi mam mba kanga, nga mi ngom arid’a hi suma a nga tit ki sed’engâ pet mi. 25Kayam ndata, agi buniyôna, agi vagi tagiya, an tin hurun yam Alona ala vama mi dandjina mba mi le. 26Wani ei mba tchugï yam tila tu.

27Kur andjege d’a dogo yam fid’id’a, ata yima babarâ nga mi tchami tata hur alum ma Mediterane-nina, go kandjege dangâla, suma djang batod’a a djib’er ala ami mba wa go kandaga d’a dinga. 28Azi nga mbina fiyagam mba kä d’a, a fe ngad’a metred’a dok hindi yam kid’iziya. A hut avok hina nde, a nga kua, a fe ngad’a metred’a dok mbà yam klavandi. 29Azi le mandarâ ala a mba dap ata ahinad’a. A tchuk kawei ma fid’i ma ve batod’a kä na kä andjau batod’a, a nga djup yima fod’a. 30Wani suma djang batod’a a nga hal lovota á ringâ, azi ar alum mba gora kä aduk mbina. Azi nga le d’igi a tchu’î kawei ma ve batod’a kä na kä avorozi na. 31Wani Paul mi de mi azigar ma ngolâ ki azigar mama ala: Le suma wana a nga kur batod’a d’uo ni, agi ndak á sud’ugi d’uo mi. 32Kayam ndata, azigarâ a ngat ziyo alumba, a arat ti nde kä aduk mbina.

33Kid’a yina mi ar go á fod’id’a, Paul mi dazi ala: Agi pet tagi tena, ini ni bur ma dogo yam fid’i ma agi nga djubugi vama mba mi mba kagina. Agi tagi nga va d’i. 34Kayam ndata, an nga ni tchenegiya, djivid’a agi tagiya, kayam agi fagi ad’enga á sud’ugi tagiya, kayam tumusa yam sa adigagi tu pî mba d’i ba woi d’i. 35Kid’a mi de zla ndata dad’a, mi hlavungôna, mi le mersi mAlona avorozi pet, mi mbrugum kä, mi nde ted’a. 36Ata yi máma, azi pet a ve huruziya, a te mi. 37Ami suma kur batod’ina pet ni kikis mbà yam dok kid’iziya yam karagaya. 38Kid’a azi te hop dad’a, a tchuk awuna woi aduk mbina, kayam batod’a ar afefeta.

Kusa hi batod’id’a

39Kid’a yina mi fo dad’a, suma djang batod’a a we nga andagad’a d’i, wani azi we hor ra dinga avun lesâ. Azi djib’er ala le ndaga ni, azi i tin batod’a kua. 40Azi but kawei ma ve batod’a kä na woyo, a aram sä kä aduk mbina. Azi but vama d’op batod’a woyo, a hle barud’a hi batod’id’a akulo aduk simetna, a i yam lesâ. 41Kid’a azi mbaza ata yima lesâ yam graka halumid’a, bato d’a atchinat rot kä aduk lesâ. Atchinat ndak á giget ti, wani andjau batod’a nde kusa abo abil ma ngolâ.

42Azigarâ a ndjak vunazi á tchi suma dangeina woyo, kayam sa adigazi mi nus á sut tam mbi. 43Wani ma ngol ma azigarâ abom kisâ mi min á sut Paul, mi d’elezi yam nga hur mazina. Mi he vuna mi suma we nusina ala a tchuk tazi kä avok aduk mbina, a i ata yima sod’a. 44Suma a arâ a kak yam agu ma tcheta, suma dingâ yam ahlena hi batod’ina. Hina, suma pet a djak sä woi ki lafiya d’a.

Currently Selected:

Sunda hi suma a sunuzinid’a 27: BA

Highlight

Copy