Sunda hi suma a sunuzinid’a 28

Paul mi nga kur til la Malte-d’a

1Kid’a ami sud’umi woi suta, ami wami ala ni til la a yat ala Malte-d’a. 2Suma kur til ndata a le kami ngola heî, a vami atazi pet, a tchugumi akud’a, kayam alona nga mi se, ab’lenga nga d’i le mi. 3Ata yima Paul mi tok aguna mi tchugum aduk akud’ina, mageid’a buzuk kei abo huwaka, ti d’ut del abomu. 4Kid’a suma kur tila a we guguid’a d’uta del abomba, a de tazi ala: Gagazi, sa máma ni sama tchi matna. Mi sut wa woi kur aluma, hina pî, d’ingêra hAlonid’a aram nga á suta d’i. 5Wani Paul mi yam abom mbeyo, guguid’a ti tchuk aduk akud’a, va lum mbi. 6Wani a nga djuba, a djib’er ala tam mba d’i hop ini, d’oze mi puk ini kä, mi mid’a. Kid’a azi djup tatä va lum mbuo d’a, a mbut djib’er mazid’a ala mam mi alo ma dingâ.

7Go ki yi máma, asinena hamulâ hi tila ma a yum ala Publiyus-sâ mi nga kua. Mi vami atam ki od’a, mi lami akoid’a burâ hindi. 8Ata yi máma, Publiyus abum tam nga d’i kumurum ngola, nga mi vo sutna buzuna mi. Paul mi kal avo hatamu, mi tchen Alona, mi tin abom kamu, mi tcholom akulo. 9Ata yi máma, suma tugud’ei suma ding suma kur tilina, a mba gevemu, a tchol akulo mi. 10Kid’a ami djagami kur batod’a á id’id’a, a lami ad’umi heî, a hami ahle suma kid’agamina mi.

Paul mi mba avo Rom

11Bugol la ami lami tilâ hindid’a, ami djagami kur bato d’a Alezandri-d’a, ni d’a a yat ala Alo ma ngoneid’a d’a, ni d’a nga d’i kak vun simetna kur til ndatid’a. 12Ami kalami kur azì ma Sirakus-sâ, lami burâ kua hindi. 13Ami tcholomi kua, ami kalami kur Reziyo. Bugol burâ tu, simet ma abo ma sutna nga mi sira. Bur ma mbàna ami kalami kur Puzole. 14Kur azì máma, ami fami b’oziyoina kua. Azi tchenemi ngola ala ami kagami ki sed’ezi dimas tu. Bugola, ami imi Rom.

15Kid’a b’oziyoi suma kur azì ma ngol ma Rom-ma a humumi zlamid’id’a, a tcholï dei gak a mba d’ugulomi ad’u Suk ma Apiyus-sâ, avun Gong nga akoi d’a hindid’a. Kid’a Paul mi we sum ndazina, mi le mersi mAlona, hurum b’lengâ. 16Kid’a ami mbami sa Rom-mba, suma te yamba a ar Paul á kak vam tu ki azigar ma ngomoma.

Wal la tchid’a hi Paul la avo Rom-mba

17Bugol burâ hindi, Paul mi yi suma nglona hi Juif-fîna. Ata yima azi to’â, mi dazi ala: B’oziyona, an le nga vama kak djangûna ki Juif-fâ d’oze ki zlad’a hi simiyeîd’a d’uo pî, Juif-fâ a gan dangeina avo Jerusalem, a han abo Romê-na. 18Kid’a Romê-na a djop ad’u zla manda dad’a, azi min gan akulo, kayam a fe nga zla d’a ndak á tchanda d’i. 19Wani ata yima Juif-fâ a noî zla mandina, an ala ni i ki zla manda avok Sesar mbeî. Wani an nga ki zlad’a kandjavan ndi. 20Ni kayam ndata ba, an yagi á wagiya, á dagi zlad’a mi. Ni kayam hur ma tinda hi Israel-lîna ba, a djinin ki kindjingâ wana.

21Azi hulong dum ala: Suma ding suma Jude-na a sunumi nga mbaktumba yam zla manga d’i. B’oziyomi suma a mba ka hina, a dami nga zla manga d’oze vama tcho ma ang luma d’uo mi. 22Wani ami min humumi zla d’a avunang nga ang djib’eret kurunga. Kayam ami wami suma a nga kak djangûna kandjaf hat ta ang nga had’ata ata yina pet.

23Kid’a azi ngam burîd’a, suma ablaud’a a mba fum ata yima mam nga kaka kuana. Mi vazi ad’u zla ndata, mi lazi glangâsâ yam leud’a hAlonid’a, nga mi vazi ad’ud’a kur gata hi Moise-sa, kur mbaktumba hi suma djok vun Alonid’a yam Jesus. Mi tin ad’ud’a ki yorogod’a dei gak afata niga.

24Suma dingâ a he gagazid’a yam zla d’a mam data, wani suma dingâ a noî bei he gagazid’a mi. 25Vunazi ndjak nga tu yam zla ndata d’i. Kid’a azi nga id’a, Paul mi dazi zla d’a dinga tu ala: Muzuk ma bei tchod’a ba na mi de zla d’a gagazid’a mabuyogi ngolo avun ma djok vun Alona Isai ala:

26Ang i ata sum ndazina, ang dazi ala:

Agi mba humugiya, wani agi mba humugi ad’ud’a d’i;

agi mba gologiya, wani agi mba wagi ad’ud’a d’uo mi.

27Kayam sum ndazina huruzi mbut tib’iri’â,

a tos humazi woyo,

a duk irazi woyo,

tala azi we ki iraziya,

a hum ki humaziya,

a wad’ud’a kuruziya,

tala a mbut huruzi an sud’uziya d’a.

28Paul mi dazi kua ala: Agi wagiya, Alona mi sun wa zla mam mba suta mandjaf suma dingâ, azi mba humut mi. [29Kid’a mi de zla ndata dad’a, Juif-fâ a iya, a nga tchi tuguyod’a ngola aduk taziya.]

30Paul mi kak bizad’a mbà kur gong nga mam nga wurak kata. Nga mi ve suma a nga mba gevema pet atamu. 31Nga mi tchazi wala yam leud’a hAlonid’a, nga mi had’azi ad’u ahlena yam Salad’a Jesus Christ bei mandarâ ba, sama d’elem nga d’uo mi.

Currently Selected:

Sunda hi suma a sunuzinid’a 28: BA

Highlight

Copy