Sunda hi suma a sunuzinid’a 3

Ma gugutud’a mi tchol akulo tita

1Pierre azi ki Jean a nga i kur gong nga kud’ora hAlonid’a ki fladege d’a afata tchuk siyata á tchen Alona. 2Wani sana nga, ni ma a vud’um ki gugutud’ina, a nga hlum a tinim kä avun gong nga kud’ora hAlonid’a teteu go ki vun agrek ma a yum ala Vun agrek ma djifâ na, kayam mi tchen he d’a hawad’a abo suma a nga kal kurutna. 3Kid’a mi we Pierre azi ki Jean a nga i á kal kur gong nga kud’ora hAlonid’id’a, mi tchenezi he d’a hawad’a. 4Pierre azi ki Jean a so irazi kamu, a dum ala: Ang golomiya!

5Mi so iram atazi gola, mi djib’er ala mba mi fe ini va aboziya. 6Wani Pierre mi dum ala: An nga ki bege d’a hapa d’oze lora d’i, wani vama an nga ki na, an nga ni hangziya. Nala, ki simiyê Jesus Christ ma Nazarat-na, ang fagakulo, ang tid’a! 7Mi vum abom ma ndjufâ, mi tcholom akulo. Ata yi máma na wat, ir asem mbut ad’enga. 8Mi fagakulo, mi tchola, mi nde tita. Mi kal ki sed’ezi kur gong nga kud’ora hAlonid’a, nga mi tid’a, nga mi lak akulo, nga mi gile Alona mi.

9Suma pet a golom nga mi tid’a, nga mi gile Alona. 10Azi wum tetet ala ni ma nga kaka ata Vun agrek ma djifâ hi gong nga kud’ora hAlonid’a á tchen he d’a hawad’a abo sumina. Zlad’a vid’izi silil, a le atchap kayam vama le ki sed’ema.

Pierre mi tchi wala kur gong nga kud’ora

11Kid’a mi nga zlapa ki Pierre azi ki Jean tua d’a, suma a ringî a tok gevezi ad’u azang ma a yum ala Azangâ hi Salomon-na na, a le atchap ngola. 12Kid’a Pierre mi we hina d’a, mi de mi sum ndazina ala: Agi Israel-lâ, ni kayam me ba, agi lagi atchap yam sut mamba ge? Ni kayam me ba, agi sogi iragi kami d’igi ni kad’eng mamid’a d’oze d’engzeng mamid’a yam Alona ba, sa máma nga mi tit ki wana hina zu?

13Alona hi Abraham-ma, Alona hi Isa’â, Alona hi Jakob-ma, Alona habuyoi ngolona, ni mam tamba, mi subur azong mama Jesus. Agi hum abo suma te yamba, agi noyôm avok Pilat kid’a mi min á gum akulod’a. 14Wani agi noyôgi Ma bei tchod’a ma d’ingêrâ, agi tchenegi Pilat ala mi gagi ma tchi matna akulo. 15Agi tchagi Sala arid’a, wani Alona mi tcholom akulo aduk suma matna. Ami ni suma glangâsâ yam zla ndata. 16Nata ad’enga hi Jesus-d’a, nata he gagazid’a yam simiyêm ba, sama wana mi mbut ad’enga, agi nga gologizi agi wagizi wan mi. Ni yam he gagazi d’a yam Jesus-d’a ba, sa máma mi tchol akulo avorogi wan pet na.

17Ki tchetchemba, b’oziyona, an wala agi ki magi suma te yamba, agi lagi hina yam bei wed’a. 18Wani Alona mi ndak vun ahle suma mi dazi avok avun mam suma djok vuna pet ala Mesi mba mi fe ndaka na. 19Kayam ndata, agi mbud’ugi hurugi yam tcho magid’a, agi hud’ugi gen Alona mi, kayam mi hazagi tcho magid’a woyo. 20Hina wani, Salad’a mba mi mba katchogoi d’a halasa kagiya, mba mi sunugï Mesi ma mam manam avok dei kagina, nala, Jesus. 21Djivid’a mam kak sä akulo gak Alona mi tin ahlena pet suma mi dazi avun mam suma djok vun suma mam tinizi irazi vazi avok deina ata yazi tua. 22Moise mi dala: Ma didina Alo magina mba mi tchol ki mam ma djok vuna tu aduk b’oziyogina d’igi an na. Agi mba humugi ahlena pet suma mam mba mi dagizina. 23Wani nge nge pî ma mi hum nga ma djok vun máma d’uo na, a mba bam mbei aduk suma hAlonina.

24Gagazi, suma djok vun Alona pet suma a de zlad’a adjeuna, tinï ad’ud’a ata Samuel ki suma a mba blogoma, a de zlad’a yam bur ma tchetchem wana mi. 25Vun ma djin ma Alona mi djinim avun suma djok vuna ni kagiya. Agi ni darigïd’a yam vun ma djin ma Alona mi djinim kabuyogi ngolo ata yima mi de mi Abraham ala: An mba ni b’e vunan yam andjaf suma yam andagad’ina pet ni yam andjavangû na mi. 26Kid’a Alona mi tchol azong mama akulo aduk suma matnid’a, mi sunumï atagi adjeu tala nge nge pî adigagi mi ar tcho mamba woi Alona mba mi b’e vunam kamu d’a.

Currently Selected:

Sunda hi suma a sunuzinid’a 3: BA

Highlight

Copy