Sunda hi suma a sunuzinid’a 4

Pierre azi ki Jean a nga avok suma b’ak zlad’a

1Kid’a Pierre azi ki Jean a nga de zlad’a mi suma tua d’a, nglo suma ngat buzuna ki ma ngolâ hi suma ngom gong nga kud’ora hAlonid’ina zlapa ki Sadusiyêna a mba ataziya. 2Huruzi zal ata suma a sunuzi suma mbà ndazina, kayam a nga hat suma yam tchola hi Jesus-d’a akulo aduk suma matnid’a, a nga tak kei ala suma pet a mba tchol akulo aduk suma matna mi. 3A yo Pierre azi ki Jean, a tchugizi dangeina gak djup ndjivini, kayam yina kal da’. 4Wani ablaud’a aduk suma a hum zla ndatina, a he gagazid’a, ndum mazid’a suma ni d’igi dudubud’a vahl na.

5Kid’a yina fod’a, amuleina hi Juif-fîna ki suma nglona ki suma hat gata a tok kur Jerusalem. 6Anne ma ngol ma ngat buzuna mi nga kua, zlapa ki Kayif ki Jean ki Alezandre kandjafâ hi ma ngol ma ngat buzunina pet mi.

7Kid’a azi mba ki Pierre azi ki Jean avorozid’a, a djobozi ala: Ni kad’eng nga lara d’oze ki simiyê nge ba, agi lagi kahle ndazina hina ge?

8Ata yi máma, Pierre mi oî ki Muzuk ma bei tchod’a ba na, mi dazi ala: Agi amuleina hi sumina ki suma nglona hi Israel-lîna, 9le agi nga djobomi ini yam sun nda djivi d’a a lat ki sama tugud’ei ma wanid’a, ni nana ba, mi tchol akulo ge ni, 10ar agi pet wagi djiviya, agi Israel-lâ pet wagi mi, ni kad’enga hi simiyê Jesus ma Nazarat ma agi b’alam akulo ata aguna ma Alona mi tcholom akulo aduk suma matnina ba, sa máma mi nga tchola akulo avorogi wana. 11Mbaktumba hAlonid’a ti de yam Jesus ala:

Mam mi ahina d’a agi suma djak gonga gat teid’a,

ni d’a mbut ta djik gong nga akulod’a.

12Suta nga ata sama ding ngi, kayam simi ma ding ma nga yam andagad’a ka hî ma Alona mi hum aduk suma mala ei fei ki suta atamu na, mi nga d’i.

13Kid’a suma b’ak zlad’a a we Pierre azi ki Jean a nga ki hur ma ade’esîd’a, a le atchap, kayam azi ni suma bei hat mbaktumba, azi ni suma hawana. A we tetet ala azi ni suma a nga zlapa ki Jesus adjeuna. 14Kid’a suma nglona a we sama fe lafiyana mi nga tchola gevezid’a, a fe nga vama á dazizi baluma d’i. 15A hazi vuna ala a buzuk kei ata yazi ma b’ak zlad’a. Azi ndjak vunazi ala: 16Ei lei ni nana ki sum ndazina ge? Kayam a lahle suma atchapma woi ir suma Jerusalem-ma pet, ei ndak á tchi tuguyod’a yam ahle ndazina d’uo d’a. 17Wani ei ar zla ndata ti i avok aduk suma d’i, ei ngoboziya, ar azi hat sa ki simiyê Jesus d’uo d’a. 18A yazïya, a gad’azi ala a de zla d’oze a hat sa ki simiyê Jesus d’uo mi.

19Wani Pierre azi ki Jean a hulong dazi ala: Na ni ni d’ingêr avok Alona tala ami gami yami kä avorogi kal la ami gami yami kä avok Alonid’a zu? Agi kagi ir zla ndata. 20Wani ami ndak á arami bei de zlad’a yam vama ami wamizina ki vama ami humumizina d’uo mi. 21Azi ngobozi kua, a araziya, kayam a fe nga lovota á lazi va d’i, kayam suma pet a nga gile Alona yam vama lena, 22kayam sama a lahle suma atchapma ki sed’em a tcholom akulo kur tugud’ei mambina, bizam kal dok fid’i.

Tchenda hi suma a he gagazid’ina

23Bugol la a tchuguzi akulod’a, Pierre azi ki Jean a i gen ndrozina, a dazi ahlena pet suma nglo suma ngat buzuna ki suma nglona a dazizina. 24Kid’a a humba, a zlap vunazi tu mAlona, a de ki delezi akulo ala: Salad’a, angî ma lakulod’a kandagad’a kalum ma ngolâ kahlena pet suma a nga kurumina. 25D’igi Muzuk ma bei tchod’a ba na mi zut abumi ngolo David azong mangâ na ala:

Ni kayam me ba, andjaf suma dingâ a nga siwel hina gandjau ge?

Ni kayam me ba, suma a nga djib’er djib’er ra hawa yaka hina ge?

26Amulei suma yam andagad’ina a tchol ki huneîd’a,

suma te yamba a tok zlapa á kak djangûna

ki Salad’a ki Mesi mama.

27Gagazi, kur azì ma ngol ma wana a kak djangûna kazong mang ma bei tchod’a ba na, nala, Jesus ma ang manama. Herot ki Pôs Pilat kandjaf suma dingâ ki Israel-lâ a zlap vunazi kamu. 28A lahlena pet suma ang gazi kur ad’eng manga ki min manga avok dei á led’ina. 29Ki tchetchemba Salad’a, ang gol ngop mazid’a, ar ami azungeî mangâ ami dami zlad’a ki hur ma ade’esâ. 30Ang mat abong á sut suma tugud’eid’a, á lahle suma simata kahle suma ndandalâ ki simiyê azong mang ma bei tchod’a ba na Jesus.

31Kid’a azi tchen Alonid’a, yima azi nga tok kuana mi yir gigidji, azi pet a oî ki Muzuk ma bei tchod’a ba na, a nga de zlad’a hAlonid’a ki hur ma ade’esâ.

Suma a he gagazid’ina a b’rau ahle mazina aduk taziya

32Ablau suma a he gagazid’ina, a tok huruzi tu ki muzugazi tu. Sama adigazi ma dala ihî ni va mama katama nga d’i, wani ahle mazina ni toka tu adigaziya. 33Suma a sunuzina a nga le glangâsâ kad’enga ngola yam tchol la akulod’a hi Salad’a Jesus-d’a, Alona mi b’e vunam kazi pet mi. 34Wani sama adigazi ma kid’ak va nga d’i. Azi pet ni suma a nga kasinena kazinina, a guzuzi woyo, a mba ki beged’a hahle suma azi guzuzi woina pet, 35a tinit kä avok suma a sunuzina; suma a b’rau mi nge nge pî ndak yam kid’ak mamba.

36Josef ma suma a sunuzina a tinim simina ala Barnabas-sâ, nala, Sama b’leng hurâ, mam mi ma ad’u andjafâ hi Levi ma a vud’um yam til la Sipre-d’ina, 37mi gus asinem mbeyo, mi mba ki beged’a, mi tinit kä avok suma a sunuzina.

Currently Selected:

Sunda hi suma a sunuzinid’a 4: BA

Highlight

Copy