Jean 16

1An dagi ahle ndazina hina, kayam agi pugugi kä d’i. 2Suma a mba digigi woi abu kur gongîyo mazi suma toka. Yina nga mi mba, ata yi máma, sama lara pî ma mba mi tchagina, mba mi djib’er ala mam le ni sunda mAlona. 3Azi mba lagi hina kayam azi we nga Abun ndi, a wan nga an nduo mi. 4Wani an dagi ahle ndazina hina, kayam fata yi máma mbad’a, agi mba djib’eregi yam zla d’a an dagizid’a.

Sunda hi Muzuk ma bei tchod’a ba nid’a

Jesus mi dazi kua ala: An dagi nga ahle ndazina avok kei d’i, kayam an nga ki sed’egiya. 5Ki tchetchemba, an nga ni i gen mam ma sununïna, wani sama adigagi ma djobon ala: Ang i ni lara ge na nga d’i. 6Yam zla d’a an dangzid’a, agi hurugi nga mi hat ngola. 7An nga ni dagi zla d’a gagazid’a. Ni djivid’a kagi d’ala an iya d’a. Le an i d’uo ni, Ma ndjunda mba mi mba kagi d’i. Le an iya ni, an mba ni sunugizïya. 8Fata mi mbad’a, mba mi mal suma kur duniyad’ina irazi woi yam tcho mazid’a, yam d’ingêra, yam sariyad’a hAlonid’a mi. 9Mba mi malazi irazi woi yam tcho mazid’a kayamba azi nga he gagazid’a kan nduo d’a, 10yam d’ingêra kayam an nga ni i gen Abunu, agi dok wan nduo d’a, 11yam sariyad’a kayam Alona ka wa sariyad’a yam ma te yam duniyad’ina da’.

12An nga ki zlad’a ngola tua á dagiziya, wani ki tchetchemba, agi ndak á vagizi kagi d’i. 13Fata Muzuk ma tak gagazid’a hAlonid’ina mbad’a, mba mi tagagi gagazid’a pet, kayam mam mba mi de zlad’a ni yam tam mbi, wani ahle suma mam humuzina pet ba, mba mi dagiziya, mba mi tagagi ahle suma a nga mbana mi. 14Mam mba suburunu, kayam mba mi yoï nahle suma atana ba, mba mi dagiziya. 15Ahlena hAbuna pet ni mana. Kayam ndata, an dala: Mba mi yoï nahle suma atana ba, mba mi dagiziya.

Hur ma wurana mba mi mbut hur ma hapma

16Jesus mi dazi kua ala: Ar ndjö, agi mba wan ndi, bugol ndjö, agi mba wan kua.

17Kayam ndata, suma dingâ aduk mam suma hata a de tazi ala: Zla d’a mam deizi ndata, ad’ut nana ge? Tala: Ar ndjö, agi mba wan ndi, bugol ndjö, agi mba wan kua, kayam an nga ni i gen Abunu d’a.

18Kayam ndata, a dala: Zla d’a mi dat ala: Ar ndjowu d’a, ad’ut nana ge? Ei wat nga ad’ut ti.

19Jesus mi we tcha ala a nga min djobomu. Mi dazi ala: Agi nga djobogi tagi ni yam zla d’a an dala: Ar ndjö, agi mba wan ndi, bugol ndjö, agi mba wan kua d’a zu? 20Gagazi, an nga ni dagiya, agi mba tchigi tchi ma hohoud’a, wani suma kur duniyad’ina a mba le furîd’a. Agi mba kagagi ki hur ma wurana, wani hur ma wura magina mba mi mbut hur ma hapma. 21Le atchad’a hurut nga mi tat á vuta ni, ndat nga kur ndaka, kayam yi mat ma vuta mba wa. Le ti vut wa gorâ woi da ni, ti dok djib’er yam ndak mata d’uo d’a, kayam ti nga ki hur ma hapma, kayam ti vut wa sana woi kur duniyad’a. 22Hina mi, ki tchetchemba, agi nga ki hur ma wurana. Wani an mba ni hulongî á gologi kua, agi mba lagi hur ma hapma. Sama mba mi walagi woi ki furî magid’ina nga d’i.

23Kur bur máma agi mba djobon yam va d’i. Gagazi, an nga ni dagiya, agi le tchenegi Abun ni me pî ki simiyênu ni, mba mi hagiziya. 24Avok dei gak ki tchetchemba, agi tchenem nga va ki simiyên ndi. Agi tchenegiya, agi mba fagiya, kayam furî magid’a ti ndak memet.

Jesus ni ma kus duniyad’ina

25Jesus mi dazi kua ala: An dagi ahle ndazina ni ki d’ogolâ. Yina nga mba, an dok dagi zlad’a ki d’ogolâ d’uo d’a, wani an mba ni dagi zlad’a woi yam Abun abu mbak. 26Kur bur máma agi mba tchenem va ki simiyênu. An dagi nga ala: An mba ni tchen Abun kagiya d’i, 27kayam Abun tamba nga mi le kagiya, ni kayamba agi lagi kanda, agi hagi gagazid’a ala an tcholï ni gen Alona d’a mi. 28An tcholï ni gen Abunu, ni mba kur duniyad’a ka hî. Ki tchetchemba, an nga ni ar duniyad’a, an nga ni i gevemu.

29Mam suma hata a dum ala: Gola! Ki tchetchemba, ang de zlad’a woi abu mbak bei d’ogolâ. 30Ki tchetchemba, ami wami ala ang wahlena pet da’, sama dok mi djobong yam va nga d’uo d’a. Kayam ndata, ami hami gagazid’a ala ang tcholï ni gen Alona.

31Jesus mi hulong dazi ala: Ki tchetchemba, agi hagi wa gagazid’a d’a? 32Agi gologiya! Yina nga mba, ki tchetchemba mi mba wa, ata yi máma, agi mba b’rawagi woi yayak, nge nge pî mba mi i avo hatamu. Agi mba aran van tu, wani an nga van tu d’i, kayam Abun nga ki sed’enu. 33An dagi ahle ndazina, ni yam zlap pa tu d’a ki sed’enda ba, agi mba fagi b’leng nga halasa. Agi mba fagi vun ma djopa kur duniyad’a ka hî, wani agi vagi tagiya, an kus wa yam duniyad’a.

Currently Selected:

Jean 16: BA

Highlight

Copy