Jean 17

Jesus mi tchen yam sum mama

1Kid’a Jesus mi dahle ndazina dad’a, mi hle iram akulo, mi dala: Abunu, yina ndaga wa, ang suburunu, kayam an suburung mi. 2Ang han wa ad’enga yam suma pet, kayam an he ari d’a didinda mi suma pet suma ang handjina. 3Ari d’a didinda ba wana, nala, a wang ala ang tu nAlo ma gagazina, a wan ala an Jesus Christ ni ma ang sununïna mi. 4An suburung wa yam andagad’a ka hî, an dap wa sun nda ang handji á led’id’a. 5Abunu, ki tchetchemba, ang suburun avorong ki subur ra an nga ki sed’et avorong avok dei bei led’a hi duniyad’id’a.

6An tagang simiyêng ngei mi suma ang handji kur duniyad’a ka hina. Azi ni mangâ; ni ang ba, handjiya, azi nga ngom zla manga mi. 7Ki tchetchemba, ar azi wahlena pet suma ang handjina a tcholï natangû, 8kayam zla d’a ang handjid’a, an haziziya wa. Azi vad’u, a wala: Gagazi, an tcholï ni gevengû, a he gagazid’a ala: Ni ang ba, sununïya.

9An nga ni tcheneng kaziya, an nga ni tchenengî yam suma duniyad’a d’i, wani ni yam suma ang handjina, kayam azi ni mangâ. 10Sum mana pet ni mangâ, sum mangâ pet ni mana, a suburun wa kazi mi. 11An nga kur duniyad’a d’uo d’a, wani azi nga kur duniyad’a. An nga ni iza gevengû. Abun ma bei tchod’a, ang ngom suma ang handjina ki simiyêngû, kayam azi kak tu d’igi ei na. 12Kid’a an nga ki sed’ezid’a, an ngomozi ki simiyêng ma ang handjina, an nga ni ngomozi mi. Sa adigazi tu ba nga woi d’i, ni ma a tinim á bad’a woina hol, kayam zla d’a a b’irit kur mbaktum mangid’a ti ndak memet. 13Ki tchetchemba, an nga ni iza gevengû. An nga ni dahle ndazina kur duniyad’a, kayam furî man nda azi lat kanda ti ndak memet. 14An hazi zla manga. Suma duniyad’a a noyôziya, kayam suma ang handji ndazina ni suma hi duniyad’ina d’i, d’igi an ni hi duniyad’ina d’uo na mi. 15An nga ni tcheneng ala: Ang yozi woi kur duniyad’a na d’i, wani, Ang ngomozi abo Ma tchona. 16Azi ni suma hi duniyad’ina d’i, d’igi an ni hi duniyad’ina d’uo na mi. 17Ang mbud’uzi sum mangâ kayam gagazid’a, kayam zla manga ni zla d’a gagazid’a. 18D’igi ang sununï kur duniyad’a na, an sunuzi kur duniyad’a na mi. 19An hang tan kaziya, kayam azi tazi mbut mang suma gagazina.

20An nga ni tchenengî yam azi hol li, wani yam suma a mba he gagazid’a kan yam wal mazi d’a tchid’ina mi, 21kayam azi pet a kak tu, d’igi ang Abun nga kuruna, an nga kurung na mi, kayam azi kak zlapa tu ki ei mi. Hina wani, suma duniyad’a a mba he gagazid’a ala ni ang ba sununïya. 22Subur ra ang suburun ki d’a, an suburuzi ki wa, kayam azi kak tu d’igi ei tu na mi. 23An nga kuruziya, ang nga kurun mi, kayam azi kak tu ndak memet. Hina wani, suma duniyad’a a mba wala ni ang ba sununïya, ang nga le kazi d’igi ang nga le kan na mi.

24Abunu, an min ala suma ang handjina a kak ki sed’en ata yima an mba ni kak kuana, kayam azi we subur man nda ang suburun ki d’a, kayam ang le kan avok dei bei ad’u tinda hi duniyad’id’a. 25Abun ma d’ingêrâ, suma duniyad’a a wang nga d’i, wani an wangû, suma ang handjina a wala ni ang ba sununïya mi. 26An tagizi simiyêngû, an mba tagazizi kua, kayam o d’a ang lat kanda, ti kak kuruziya, an kak kuruzi mi.

Currently Selected:

Jean 17: BA

Highlight

Copy