Luc 11

Jesus mi de yam tchenda

(Gol Mat 6.9-13; 7.7-11)

1Bur tu, Jesus nga mi tchen Alona ata yima dingâ. Kid’a mi dap tchendid’a, mam ma hata tu mi dum ala: Salamina, ang had’ami tchenda d’igi Jean ma le suma batemba mi hat mam suma hata na.

2Jesus mi dazi ala: Le agi tchenegiya ni, agi dagi ala:

Abumiya,

ar suma pet á suburung simiyêngû.

Ar ang mba á te leu manga yam andagad’a.

3Ar ang hami te mamina burâ ki burâ.

4Ar ang vat hurung ngei yam tcho mamid’a,

kayam ami vad’ami hurumi woi

yam nge nge pî ma nga mi lami tchod’ina mi.

Ar ang imi kur kuka d’i.

5Jesus mi dazi kua ala: Ni nge adigagi mi le nga ki banama, mi i atam andjege dangâla, mi dum ala: Bäna, ang ndanï avuna vuna balâ kan hindi. 6Kayam banana mi tcholï akoid’a, mi mba mi fan ka tchetchem; an nga ki vama ni tinimzi avoroma d’i. 7Ma nga klavina mba mi dum ala: Ang kawan ndi. An duk wa vuna da’, ami ki grona burumi wa kä, an ndak á tchol akulo á hang avuna d’i. 8An nga ni dagiya, mam mba mi tchol akulo kayambala mam mi banama d’a d’i. Wani kayam sek ka banam mi segema ped’eta, mam mba mi tchol mi hum vama mam minima.

9An nga ni dagiya, agi tchenegiya, Alona mba mi hagiya; agi halagi va, agi mba fagiziya; agi dabagi vun gonga, a mba malagiziya. 10Kayam nge nge pî ma nga mi tchena, Alona mba mi humu; sama nga mi halâ, mba mi fe; sama nga mi dap vun gongina, a mba malamziya. 11Ni nge adigagi ba, goroma mi tchenem yam avuna ba, mba mi hum ahinad’a ge? D’oze le mi tchenem kulufâ ni, mba mi hum guguina zu? 12D’oze le mi tchenem asena ni, mba mi hum hurd’ud’a zu? 13Le agi suma tchona agi wagi á hahle suma djivina mi grogina ni, na ni Abugi ma sä akulona mba mi he Muzuk mam ma bei tchod’a ba na mi suma a nga tchenema kal luo zu?

Jesus mi de woi yam glangâs ma aboi ma a kazi kama

(Gol Mat 12.22-30; Mar 3.22-27)

14Jesus nde mi dik muzuk ma tcho ma mbut sana ndumîd’ina woyo. Kid’a muzuk ma tchona mi nde woi dad’a, ma ndumî máma nde mi de zlad’a; ablau suma a le atchap. 15Wani suma adigazi a dala: Mi dik muzuk ma teteng ma tchona woi ni kad’eng nga Belzebul amulâ hi muzuk ma tchona mi humzid’a.

16Suma dingâ a kugumu, a tchenem ala mi tagazi vama simat ma mi tcholï akulona. 17Wani mi we djib’er ra kuruzid’a, mi dazi ala: Leu d’a lara d’a wal mbà á dur tata mba d’i b’lak keyo, azina mba mi dris kä yam ndrama mi. 18Le Seitan mi wal wa kä mbà á dur tamu ni, leu mamba mba d’i ka’î nana ge? Kayam agi nga dagi ala an nga ni dik muzuk ma tchona woi ni kad’eng nga Belzebul mi handjid’a. 19Le an nga ni dik muzuk ma teteng ma tchona woi ni kad’eng nga Belzebul mi handjid’a ni, grogina a nga digim mbei ni kad’enga hi nge ge? Kayam ndata, azi mba mbut magi suma ka sariyad’a. 20Wani le an nga ni dik muzuk ma teteng ma tchona woi ni kad’enga hAlonid’a ni, Alona mi mba wa adigagi á te leu mamba.

21Le sama ad’engâ mi tchuk ahle suma dur ayîna á ngom aziyamu ni, ahle mama a mba kak djivid’a. 22Wani le sama ad’eng ma kalama mi mba á dur ayîna ki sed’em mi kuzumu ni, mba mi yo ahle mam suma dur ayîna pet suma mam tin hurum kazina, mba mi b’rau ahle suma mam yozï ata yima dur ayînina woyo.

23Sama nga ki sed’en nduo na ni man ma djangûna, sama nga mi tok ahlena ki sed’en nduo na, mi pleî nahlena woi mi.

Hulonga hi muzuk ma tchonid’a

(Gol Mat 12.43-45)

24Jesus mi had’azi kua ala: Ata yima muzuk ma tchona mi nde woi kur sanina, mi i ata yima bei mbina á hal yima tuk tama, wani mi fum mbi. Ata yi máma, nga mi dala: An mba ni hulong kur gong man nda an ndeï woi kuad’a. 25Kid’a mi mbaza d’a, mi fat hurut minda tora woi d’id’ing. 26Wani mi i yoï muzuk ma tcho ma dingâ kid’iziya ma kalam ki tchod’ina, a tchuk kur gong ndata, a kak kua. Sa máma tcho mam mba dananda mba d’i kal la avoka.

Furî d’a kala

27Kid’a Jesus nga mi de zla ndata tua d’a, atcha d’a dinga aduk ablau suma ti er ad’ut akulo, ti dum ala: Atcha d’a vud’ung nga hang aponid’a, ti le furîd’a. 28Wani Jesus mi hulong dat ala: Suma a nga hum zlad’a hAlonid’a a nga ge yazi kä ad’utna, a mba le furîd’a kala.

Suma a djop vama simata ata Jesus

(Gol Mat 12.38-42)

29Ata yima ablau suma a tok gevema, mi nde mi dazi ala: Suma kur atchogoi d’a wandina ni suma tchona. Azi nga hal vama simata, wani an mba ni simad’azizi d’i, ni simata hi Jonas-sa hol. 30D’igi Jonas mi mbut vama simata mi suma Ninif-fâ na, an Gor Sana mba ni mbut vama simata mi suma kur atchogoi d’a wandina na mi. 31Kur bur ma ka sariyad’a, amul la abo ma sutnid’a mba d’i tchol á ka sariyad’a yam suma kur atchogoi d’a wandina, kayam ti tcholï adjeu avun dabid’a handagad’id’a, ti mba á hum ned’a hi Salomon-nda. Gola! Ma kal Salomon ki ngolina mi kä wana. 32Kur bur ma ka sariyad’a, suma Ninif-fâ a mba tchol á ka sariyad’a yam suma kur atchogoi d’a wandina, kayam suma Ninif-fâ a mbut huruzi yam wal la tchid’a hi Jonas-sa. Gola! Ma kal Jonas ki ngolina mi kä wana.

Hat ta yam b’od’a hi tad’id’a

(Gol Mat 5.15; 6.22-23)

33Sana mi tin lalam mba akud’a, mi tinit nata yima ngeid’a d’oze ad’u angotna d’i, wani mi tinit nakulo yam agu lalamba, kayam suma kal avona a we b’od’a. 34Irangî d’igi lalamba hi tangî na. Le irang nga lafiya ni, tang pet ni b’od’a. Wani le irang nga lafiya d’uo ni, tang pet ni nduvunda mi. 35Kayam ndata, ang gol tang djivi yam b’o d’a nga kurunga, ar ti mbut nduvunda d’i. 36Le hliwing pet b’od’a ni, yima ding ma ar nduvundina nga d’i, wani hliwing pet ni kur b’od’a d’igi lalamba nga d’i b’o kang na mi.

Jesus mi ve Fariziyêna ki suma hat gata ki zlad’a

(Gol Mat 23.1-36; Mar 12.38-40)

37Kid’a Jesus nga mi de zlad’id’a, ma Fariziyêna tu, mi yum á te tena ki sed’emu. Mi i avo hatamu, mi kak kä á te tena. 38Ata yima Fariziyê máma wuma, mi le atchap, kayam mi te tena bei mbus tamu. 39Wani Salad’a mi dum ala: Agi Fariziyêna, agi mbuzugi huyok kopma ki tazana, wani hurugi oîd’a ki kula ki murud’umba. 40Agi suma lilid’a. Alo ma labud’ina, ni ma mi le krovod’ina mi d’uo zu? 41Ar agi hagi he d’a hawad’a ahlena ni ki hurugi pet mi suma hohoud’a. Hina wani, ahlena pet a mba mbut yed’et kagiya.

42Wani ni zla d’a hohoud’a kagi agi Fariziyêna, kayam agi hagi dim d’utna, nala, mêta ki rud’a ki d’utna pet. Agi aragi d’ingêra ki od’a hAlonid’a woyo. Wani djivid’a agi lagiziya, agi aragi ma dingâ bei led’a d’i.

43Ni zla d’a hohoud’a kagi agi Fariziyêna, kayam agi minigi ni zlumiyô suma avo’â kur gongîyo magi suma toka, agi minigi ala suma a gagi depa ad’u su’â. 44Ni zla d’a hohoud’a kagiya, kayam agi ni d’igi asu d’a blas kä woi d’a suma a nga tit kat a nga wat tuo d’a na.

45Ma hat gata tu mi dum ala: Ma hat suma, zla d’a ang dat wanda, ang ngulumi ni ami mi.

46Jesus mi dazi ala: Ni zla d’a hohoud’a kagi agi suma hat gata mi. Kayam agi nga tinigi aneka ngola kel suma, wani agi tagid’a nga dot ki tchitchid’agi d’i. 47Ni zla d’a hohoud’a kagiya, kayam agi nga minigi asud’a hi suma djok vun Alona suma abuyogi ngolo a tchazinid’a. 48Kayam ndata, agi ni suma glangâsâ yam sunda habuyogi ngolod’a, kayam azi tchaziya, agi minizi asuwaziya. 49Kayam ndata, Alona kur ne mamba mi dala: An mba ni sunuzi man suma djok vuna azi ki suma a sunuzina. Suma a mba tchi suma adigaziya, a mba djop vun suma adigazi mi. 50Kayam ndata, Alona mba mi ka sariyad’a yam suma kur atchogoi d’a wandina yam matna hi suma djok vun Alona pet suma azi tchazi käd’u tinda hi duniyad’a deina, 51tinï ad’ud’a ata matna hi Abel-lâ dei gak mba ata matna hi Zakari ma azi tchum aduk yima ngal ahle suma ngat buzuna ki yima a tinim iram vam mAlonina. Gagazi, an nga ni dagiya, Alona mba mi ka sariyad’a yam suma kur atchogoi d’a wandina yam matna hi sum ndazina pet.

52Ni zla d’a hohoud’a kagi agi suma hat gata, kayam agi hlagi vun lakled’a hi ned’id’a woyo. Agi tagi nga kalagi kua d’i, wani suma a min á kal kuana, agi nga d’eleziya.

53Ata yima Jesus mi nde woi ata yi mámina, suma hat gata azi ki Fariziyêna a tezem ped’et, a nga djobom yam ahlena teteng. 54Azi hal lovota á fe zla d’a dinga avunamu.

Currently Selected:

Luc 11: BA

Highlight

Copy