Luc 12

Agi gologi tagi djivi ki suma lop ira

(Gol Mat 10.26-27)

1Kur bur máma suma dudubu a tok gen Jesus, a nga miret taziya. Mi tin ad’ud’a de zlad’a avok mi mam suma hata ala: Agi gologi tagi djivi kangufa hi Fariziyênid’a, nala, lop ir mazid’a. 2Wani vama nga ngeid’a kä ma a mba ba bei ndum mbei pid’a’â nga d’i, vama gumun kä ma a mba ba bei ndum mbei pid’a’â nga d’uo mi. 3Kayam zlad’a pet ta agi mba dat andjeged’a, a mba humut tei faleya; zla d’a agi mba kud’uzot kur gongid’a, a mba tchat walat tei yam azuweina akulo.

Ma ndak á lum mandarama

(Gol Mat 10.28-31)

4Jesus mi had’azi kua ala: Buniyôna, an nga ni dagiya, ar agi lagi mandara suma tchagi hliwigina d’i, kayam azi ndak á le va bugol li. 5Wani an nga ni dagi yam sama agi lum mandarama. Ar agi lagi ni mandara Alo ma le mi tchagiya wa ni, mi nga kad’enga á tchugugi aduk aku d’a Jahanama-d’ina. Gagazi, an nga ni dagiya, agi lagi ni mandara mamu.

6Hira vahl a guzut ni ki sisi mbà d’uo zu? Wani ta Alona mi mar kata nga d’i. 7Tumus sa kagid’a pet, Alona mi ndumut wa mi. Kayam ndata, agi lagi mandar ri, kayam agi zlagi kal hira woi dei.

De d’a woid’a ki vun ma tin ma yam Jesus-na

(Gol Mat 10.32-33; 12.32; 10.19-20)

8Jesus mi had’azi kua ala: An nga ni dagiya, nge nge pî ma mi dan zlan ndei avok sumina, an Gor Sana mba ni dum zlam mbei avok malaikana hAlonina mi. 9Wani sama mi tin vunam kan avok sumina, an Gor Sana mba ni tin vunan kam avok malaikana hAlonina ala an wum nga d’uo mi.

10Nge nge pî ma de zla d’a tcho d’a las an Gor Sanid’a, Alona mba mi vat hurum mbei yam tcho mamba, wani sama las Muzuk ma bei tchod’a ba nina, Alona mba mi vat hurum mbei kam mbi.

11Fata azi mba igi avok suma ka sariyad’a kur gongîyo mazi suma toka d’oze avok amuleina d’oze avok suma te yambid’a, ar vunadigagi pat yam vama agi mba duma tala agi mba dagi nana ge d’a d’i. 12Kayam Muzuk ma bei tchod’a ba na mba mi tagagi vama ndak á ded’a ata yi mámina.

D’ogol ma yam sama ndjondjoî ma lilid’ina

13Sama dingâ aduk ablau suma mi de mi Jesus ala: Ma hat suma, ang de mi wiyena mi b’rawami djona habumina aduk tamiya.

14Wani Jesus mi dum ala: Bäna, sama tinin á kagi sariyad’a d’oze á b’rawagi djona ni nge ge? 15Mi dazi kua ala: Agi gologi tagi djiviya, ar agi lagi yam beged’a d’i, kayam ari d’a gagazid’a hi sanid’a nga ni yam ahle mam suma djivina d’oze yam ndjondjoîd’a d’i.

16Mi dazi zla d’a d’ogola ala: Asinena hi sama ndjondjoînina mi wul awuna heî. 17Mi djib’er kurum mi dala: An le ni nana ge? Kayam an nga ki yima ndak á tok awu mana kuana d’i. 18Mi de tam ala: An mba ni le na, mba ni to avurei mana woyo, mba ni min suma nglo suma kalâ, an mba ni tchuk awu mana kahligiyen pet kua. 19An mba ni de mi tan ala: Ang nga kahlena ngola kur avureina á le bizad’a ablaud’a. Ang tuk tangû, ang te, ang tche, ang le furîd’a. 20Wani Alona mi dum ala: Ang ma lilid’a, kur andjege d’a wanda, ang mba mid’a. Ahle suma ang minizina, mba arî hi nge ge?

21Jesus mi de kua ala: Hina mi, sama nga mi tok ahlena kayam mam tambina, mi nga ki ndjondjoîd’a avok Alona d’i.

Hat ta yam deng ta d’a ata Alonid’a

(Gol Mat 6.25-34)

22Jesus mi de mi mam suma hata ala: Kayam ndata, an nga ni dagiya, agi djib’eregi yam ari magid’a tala agi mba tagi ni me d’oze agi mba tchugugi ni me ge d’a d’i? 23Kayam arid’a kal tena, tad’a kal baruna mi. 24Agi gologi gagauna. Nga mi zar ri, nga mi dut ti, mi nga ki yima tchuk va d’i, mi nga ki avir ruo mi, wani Alona nga mi hum tena. Wani agi zlagi kal aluweina woi dei d’uo zu? 25Ni nge adigagi ba, mi ndak á ndir bizam fiyaka kur djib’er mamba ge? 26Le agi ndagagi á le va ngiyeû d’uo ni, ni kayam me ba, agi djib’eregi yam ahle suma arâ ge? 27Agi djib’eregi yam tamas sa abageid’a ki wul mata. Ndat nga d’i le sun ndi, nga d’i tchil baru d’uo mi. Wani an nga ni dagiya, Salomon kur subur mamba pet pî, mi tchuk nga baru ma djif ma d’igi b’o mata na na d’i. 28Wani le Alona nga mi tchuk baru ma djivina masu ma ini ndjivin a mba tchugum kur gring ma akud’ina na ni, mba mi tchugugi baruna atagi kal luo zu? Agi ni suma he gagazi magid’a akid’eid’ina. 29Ar agi halagi vama agi tuma d’oze agi tchuma d’i, ar vunadigagi d’i pat ti. 30Kayam ahle ndazina, andjaf suma bei wAlona suma yam andagad’ina pet a nga halaziya. Wani Abugi mi we vama agi minima. 31Wani agi halagi leud’a hAlonid’a avok tua ba, mam mba hagi ahle suma arâ kam kua.

Hat ta yam ndjondjoî d’a sä akulod’id’a

(Gol Mat 6.19-21)

32Jesus mi had’azi kua ala: Agi ades ma gorâ, ar agi lagi mandar ri, kayam ni djivid’a ir Abugi á hagi leu mamba. 33Agi guzugi ahle magina woyo, agi hazi he d’a hawad’a mi suma houd’a. Agi dubugi bid’im mba bei b’laka ba d’a, agi togogi ahle magina sä akulo ata yima bei b’laka, ata yima bei suma kula a tcha kua ba na, ata yima bei fotna b’lagazina. 34Kayam ata yima ndjondjoî magid’a ti nga kuana, hurugi mi sä tinda kua mi.

Azong ma nga kak kä ki ndjolîna

35Jesus mi had’azi kua ala: Agi djinigi d’i’â furugi ad’enga ndinding, ar lalam magid’a ti b’o mi. 36Agi kagagi d’igi suma a nga djup salazina hulong mam mba ei ata yima telid’a na, kayam le mi dap vun gonga ni, azi mba malamzi atogo zak. 37Azungeî suma salazina mba mi fazi ndjola ata yima mi hulongîna, a le furîd’a. Gagazi, an nga ni dagiya, mba mi djin d’ik mama furumu, mi kagazi kä avun tena, mba mi lazi sunda. 38Le mi mba ni kur ler ra ndjol la mbàd’a d’oze ler ra ndjol la hindid’a mi fazi a nga djubumu ni, azungeî ndazina a le furîd’a. 39Wani agi wagiya, le sama azina mi we yima sama kula nga mba kuana ni, mba mi aram mi kal avo hatam mbi. 40Agi kagagi ki ndjola mi, kayam an Gor Sana mba ni mba ni ata yima agi nga djib’eregi d’uo na.

Azong ma d’engzengâ ki ma bei d’engzengâ

(Gol Mat 24.45-51)

41Pierre mi dum ala: Salamina, ang de zla d’a d’ogol ndata ni mi ami d’oze ni mi suma pet tchu?

42Salad’a mi dum ala: Ni nge nazong ma d’engzeng ma ne ma salama mba mi tinim yam suma avo hatama á b’rawazi tena ata yama ge? 43Azong ma salama mi hulongî avo hatam mi fum nga mi le hina na, mi le furîd’a. 44Gagazi, an nga ni dagiya, salama mba mi tinim yam ahle mama pet. 45Wani le azong máma mi de kurum ala: Salana mba mi mba atogo d’i, mi nde mi to azungeî suma dingâ ki yuguneina, mi te, mi tche gak mi gurut ki süma ni, 46sala azong máma mba mi mba kur bur ma mam nga mi djubum mbuo na, ata yima mam we d’uo na mi. Salama mba mi tom ki blafâ ngola, mba mi wuragam ki suma batrangâ.

47Azong ma we minda hi salamid’a, wani nga mi min ahlena d’i, nga mi le minda hi salamid’a d’uo mi na, a mba tom ngola. 48Wani sama we nga d’uo na, mi le vama ndak á tod’a, a mba tom akid’eid’a. Sama a hum ahlena ngolina, a mba djobom ahlena ngola; sama a hum ahlena ngola á ngombina, a mba djobom ahlena ngola kala.

Jesus mi mba ki wala

(Gol Mat 10.34-36)

49Jesus mi dazi kua ala: An mba á gakud’a yam andagad’a. Le nga d’i ngal ka tchetchem pî, an djib’erî me d’ei ge? 50Wani batemba nga ni d’a mbeî an lata, hurun nga hat kat gak an lat tua. 51Agi djib’eregi ala an mba ni ki b’leng nga halasa yam andagad’a zu? An nga ni dagiya, nga na d’i, wani an mba ni ki wala. 52Avok hî wani, suma vahl kur azì ma tuna a mba wala, suma hindi a mba kak djangûna ki suma mbàna, suma mbàna a mba kak djangûna ki suma hindina mi. 53A mba wala sana mba mi noî goroma, gorâ mba mi noî abumu, atchad’a mba d’i noî gorota, gora mba d’i noî asud’u, atchad’a mba d’i noî akunota, akunota mba d’i noyôt mi.

Wäd’u vama simata yam yina

(Gol Mat 16.2-3)

54Jesus mi de mablau suma kua ala: Le agi wagi d’ugula tcholï abo ma fladegena ni, atogo hina zak agi dagi ala: Alona mba se ini, nga mi le na mi. 55Le agi wagi simetna nga mi sir iram abo ma sutna ni, agi nga dagi ala: Yina mba le ini zumala heî, nga mi le na mi. 56Agi suma lop ira, agi wagi simata handagad’id’a ki d’a hakulod’id’a, wani ni kayam me ba, agi wagi simat ta ka tchetchemba d’uo ge?

Ang min zla manga ki mang ma djangûna

(Gol Mat 5.25-26)

57Jesus mi had’azi kua ala: Ni kayam me ba, agi tagi nga djib’eregi á wagi vama d’ingêrâ d’uo ge? 58Ata yima ang nga i ki mang ma djangûna ata yima ka sariyad’ina, ar ang min zla ndata ki sed’em kid’a ang nga glovot tua d’a, dam mam mba mi hang abo ma ka sariyad’a, ma ka sariyad’a mba mi hang abo ma ngom dangeina, ma ngom dangeina mba mi gang dangeina kla. 59An nga ni dangû, ang mba nde woi ata yi máma d’i, gak ang mba wurak bal mangâ pet tua.

Currently Selected:

Luc 12: BA

Highlight

Copy